مزعل و سهى 6 _ التغير المناخي Blog Action Day

ام مزعل و سعيد ( ابن مزعل و سهى ) بتفرجوا على التلفزيون

برنامج عن التغير المناخي على الجزيرة

ام مزعل: يا ولد..اقلب لنا على المسلسل التركي

سعيد: ياتيتا خليني اشوف ..المعلمة بالمدرسة قالت لنا نشوفه

ام مزعل: ولك شو تشوف!.. اقلب بدي اعرف مسكوها ولا لأ

سعيد:الكرة الارضية يا تيتا حرارتها عم ترتفع

ام مزعل: و نحنا شو دخلنا ..يجيبولها دكتور هيهيهي

سعيد: بتمزحي يا تيتا؟ مش نحنا عايشين عليها؟

ام مزعل: اقلب عالمسلسل بلاش اوصلك

سعيد: طيب يا تيتا ما بتخافي علينا,انا و اخوتي؟

ام مزعل:انت واخوتك؟(و احمروا عيونها) اعترف ولك!! ليكون الك ايد بالموظوع؟

سعيد: مش هيك قصدي ..بس برضه النا ايد كلنا

ام مزعل: شو؟ و ابوك بيدري؟ يا ويلي عليك يا مزعل رح تنحبس يما..

(و صارت تولول و تنوح)

عملوها الزغار و راحو فيها الكبار

سعيد: هالمرة بالعكس يا ستي عملوها الكبار و راحوا فيها الزغار..انتو سبب اللي بيصير

(فجأة راحت الدراما و بدأ الرعب)

ام مزعل:روّحت نص المسلسل و انت بتسولف و انا مش فاهمة

سعيد:اسألك سؤال

ام مزعل:ليش في حد بيسأل جواب هيهيي

سعيد:ستي ركزي معي هلا متزكرة ايام ما كنتي صبية؟

ام مزعل:وجع يخلع نيعك ولك..ليش انا ختيارة؟

سعيد: يا تيتا مشان الله بس جاوبيني ..يا احلى الصبايا..الطقس زمان كيف كان

..

..ام مزعل: ( نظرة حالمة) ايام ما كان جدك جظعان يوخذني و نطلع بالبرية و نوخذ معنا الفحمات و نولع

(نظرة مشرانية)

و شو الك بهالسوالف هاي

سعيد:يعني يا تيتا انتي مش ملاحظة انه الطقس كله تغير؟

مش ملاحظة انه الصيف صار كتير حار مثلا؟

ام مزعل:طول عمرة الصيف شوب ولا شو اسمه صيف

سعيد: انتي عارفة كمان 50 سنة شو رح يصير بالدنيا؟

كيف الحرارة اللي عم بتزيد رح تذوب التلج اللي بالقطب الشمالي

يمكن يصير فيضانات يغرق العالم

ام مزعل:يوهوو.. 50 سنة؟..للعايش..احيني اليوم و موتني بوكرا

سعيد: يا ستي يمكن ما نكون عايشين بس ولادنا بكونوا عايشين

!ام مزعل: وك يا ازعر انت عندك ولاد

سعيد: يا ستي انا عمري عشر سنين كيف عندي ولاد انا بحكي عن المستقبل

ام مزعل:هسة مظيعلي وقتي عشان اشي بيصير بعد 50 سنة

سعيد: يمكن اقل.. و يمكن كل سنة يتغير اشي

و التغير عم بيصير شوي شوي و الناس مش حاسة ولا مهتمة

ام مزعل:انت بتصدق كل شي بالتلفزيون هاظ كله تمثيل

سعيد: المسلسلات اللي بتحضريها تمثيل بس هاي حقيقة

ام مزعل: كوماري ..يا ظرابّة.. هاتي التلافون

خنني احكي مع ام زهدي تقولي شو صار بالمسلسل ..ظيعتو علي

سعيد: يمكن احسن طريقة يعملوا مسلسل تركي عن الموضوع

يمكن الناس اهتمت شوي

او تغني هايفة اغنية عن الاحتباس الحراري

ام مزعل: ناقصني انت يا ابو نص لسان رووح انصرف

كوماررري ..

سعيد: تيتا.. كوماري صعب تسمعك لانها سافرت من سنة

ام مزعل: سافرت وانا ما بدري؟ ما حدا قال لي؟

سعيد بيحكي مع حاله:ما بدري..ما حدا قال لي

هالجملة رح نسمعها كتير بعد اكم سنة