يا هيك تكون النسوان يا عمرا ما تكون

سهى : بتحبني يا مزعل؟

مزعل : هسة وقت الحكي الفاظي

سهى : شو مش قادر تقولها؟

مزعل : شو حب و ما حب عيب هالحكي

سهى : عيب الواحد يحب مرته؟

مزعل :متعودة حظرتك...حبيّبة من يوم يومك

سهى : شو قصدك؟

مزعل : قصدي حبيب القلب الخطيب القديم

سهى : ولا حبيبي ولا بعرفه. هلأ خطبة اسبوع صار حبيب القلب؟

مزعل :ولا شو..مش خطبك يعني حبيتيه

سهى :كانت خطبة بين الاهل و فرطت..بدناش نخلص من هالموال؟

. كل هدا عشان بدي اسمع منك كلمة حلوة

مزعل : سنحك.. انتي فيش وراكي شغل؟ روحي اعمليلنا اشي ناكله

سهى : افف شو همك ع بطنك!! هلا قمنا عن الغدا

مزعل : غدا؟.. غدا؟.. هاظ بتسميه غدا؟ ..انا ..مزعل.. اتغدى صواني كفتة..هزلت

سهى : مالها الصواني؟ ما انا بشتغل متلك و برجع معك و يا دوب العصر

الحق عالاولاد و تصليح الورق و تنضيف البيت و الغسيل و الكوي و يا ريتك بتساعد

مزعل : هلا والله ..هلا عمي.. حلو كثير..قال اساعد قال.. شو بدك ارظع عنك الولد؟

سهى : انا ما قلت هيك بس لو بتقعد معهم شوي لاخلص طبخ بوكرا

مزعل : الله يا زمن..اخص بس..انا مزعل قعيد ولاد ؟ امي و خواتي حذروني منك قالولي اوعى يا مزعل

بوكرا بتسحبك شوي شوي ولا انت عالمجلى..معاهم حق

سهى: الله يسامحهم هدا اللي طلع منهم؟

مزعل: بتدعي على امي و خواتي..؟

يا ريتني كنت تجوزت ميلاني..ما كان هاظ حالي

سهى : و مين هاي ست ميلاني؟

مزعل : ميلاني ..صاحبتي قلت لك عنها..اللي كانت صاحبة عمار ابن ابو صبحي

اللي كان ساكن معي بشيكاغو و حبتني و تركته و عاشت معي ثلاث سنين

سهى : و بتقولها و مش مستحي..عيب عليك

مزعل : الرجّال ما بعيبه اشي ..ياللا عاد سيبينا من هالحكي الفارط

و روحي حظريلي عشا خفيف..ما بدي اتعبّك..شوية مقالي

***

اخ بس لو اني تجوزت ميلاني. ماتت لاتجوزها . اخخخخ

****

وتدور الدوامة بمزعل و يأخذنا المسلسل الى زمن تزوج فيه مزعل من ميلاني

****

مزعل : ميلاني..هني..ماي كب كيك ( يا عسلي يا شقفة كيك

ميلاني : ياه؟؟ انا هون باللفنغ رووم (غرفة المعيشة

مزعل : موااا موااه اشتقتلك سويتي ( المواه هاي بوسةو سويتي يا حلوتي

ميلاني :اوعى تكون نسيت تاخد كاثي عالبالية و سام عتدريب البيسبول (اي هو بيسترجي

مزعل : معقول انسى بيبي..بعد الشغل طرت عالمدرسة واخدتهم و استنيتهم ليخلصوا

ميلاني :ممتاز..جبت معك عشا؟

مزعل : يعني ما طبحتي؟

ميلاني : شو؟ اطبخ؟ انا من الصبح ما ارتحت..طلعت شوبينغ و كنت بالجيم

و سارة كانت متدايقة لانه صاحبها تركها و كل العصر معها( يا حرام بتتعب الولية

مزعل : اسف حبيبتي ما كنت اعرف يعطيكي العافية (لا اسد بس بتشاطر على سهى

ميلاني :بعدين لسة عالويك اند اكلنا هاي الي طبختها انت...ملقوبة

مزعل : قصدك مقلوبة..ما هو انا طق قلبي على اكل بيت و انتي ما عم تطبخي هني

ميلاني : خلص روح حمّم الاولاد و عشيهم و غيّر لجوي البامبرز و طلّع بوبي يتمشى

و ما تنسى الزبالة و لما ترجع بتحكي مع بيبي سيتر و منطلع نتعشى بره.كيف هيك؟ ؟

مزعل : غريت دارلنغ هيني طالع موااه مواه بحبك ماي بمبكن بس..ال..ال جلي المطبخ قايم قاعد

ميلاني:دونت وري مزئل..بس نرجع بتبقى تجلي (لا تقلق مزعل

مزعل: حنووونة كان يوم سعدي يوم تجوزتك مواااه

****

و اخد مزعل الاولاد و هو مبسوط و بغني..يا هيك تكون النسوان يا عمرا ما تكون
***

**

تنويه

هذه عينّة من بعض الازواج و لا تنطبق عالجميع

هنالك عبر و دروس و كل واحد يلقط اللي بدو اياه

اي اسم ورد هنا و فيه اي تشابه مع اي اسم حدا بتعرفوه..مش هوه

تحديث

النقاط اللي حبيت الكل يشوفها

**
بعد الزواج البعض ينسى الرومانسية و ينظر للزوجة كطباخة و مربية و ينسى انها امراة

**
بعض الازواج لا يرى ولا يسمع ولا يتكلم الا باذن الماما.

الام لها مكانتها و احترامها لكن دورها بعد الزواج يجب ان لا بتعدى ذلك

**
الزوج مسموح ان تتعدد علاقاته قبل الزواج ولا يجد حرجا منا التفاخر بها بينما يعيب على الزوجة مجرد انها تكلمت مع رجل قبل الزواج

**
مساعدة الزوج لزوجته بالاعمال المنزلية..مش عيب و لا تقلل من رجولته

**
عند الزواج من اجنبية تصبح كل العائلة رهن اشارتها..عقدة نقص عننا و عقدة زيادة عند الاجنبي خلقناها نحنا

**
اختيار اسم مزعل كان عن قصد.لم اختر طارق او لؤي ..

مزعل اسم قديم يدل على العقلية القديمة التي اردت ان اعكسها هنا

..بس ما بمنع انه في طارق او لؤي يقومو بدور مزعل..

(قلائل

**

شكرا لاضافاتكم و للقراة و التعقيب