جاج تكنو
انجوي
هاي عالسريع بس في موضوع كبير و خطير عن الجاج
July 15, 2008
July 10, 2008
أفراح ال بلوجر -ميوش و قويدر
اهلا و سهلا شرفونا حبابنا
و نور المنشر فيكم و يا هلا بدارنا
و يا بلوجرز يالله بدينا
و بوجودكم تحلى دايما افراحنا
و نطت ملائط قال يعني
أويهـــا يا ميوش سمبـــوســـك بـــالهـــو ا
أويهـــاحطيتــوا بــالفــرن بعــدو مــا إستــوى
أويهـــا وتعــوا تفــرجــوا يــا جيــــران
أويهـــا مــش كــل العــرايــس ســـوا
و منى علّت الصوت و قالت:
اويها... يا قاعدة على المراتب قعدة البنا
أويها... والكحل بعيونك زقفتلوا غنا
أويها... حط القدم على القدم ما اسمعتلو رنة
اويها... ويجعل البطن يلي حملك مسكنو الجنة
و كمّلت منى
أويهــــا جيــــت أغنـــي وقبلـــي مــا حـــدا غنـــا
أويهــــا بقــــاع وادي فيــــه الطّيــــــر بيستنــــــا
أويهــــا وريتـــك يـــاسامر بميوش تتهنـــا
أويهــــا وتظــــل ســــالـــم ويظـــل الفـــــرح عنّــا
و دخلت نيدو عالخط بعد ما جحرت منى بعينها
اووووووها نأة نأة
اوووها و سامر عرف مين نقى
اووها و اللي ما بيحب ميوش
اووها تدخل بعينو بقة
اما ياسمينة دمشق فما سكتت
و سمعتهم اكم زغروتة شامية معتبرة
اووها طبخنا لبنية و حشيناها شراطيط
اوها والناس بتنقط بالدهـــــب
اوها ونحنا منّقّط بالزلاغيط
و تابعت احسن يروح دورها
اوها عاللعللي عاللعلي اوها يا صبايا تجمعي اوها يا ليل طول طول
اوها ويا شمس لا تطلعي و لحقت حالها بكمان وحدة
اوها يا عريس ريتو مبارك اوها يا عريس السبع بركات اوها وان شا الله لما يجيك الصبي
اوها وبتكمل الفرحات
لولولولليييييييييييييشش
و اجو خوات قويدر ووقفو سوى و قالوا آآآويييها .. و الهش الهشّيييي
آآآويييها ... و طبخنا كوسا محشيييي
آويييهاااا ... واحنا دار قوييدييير
آآآويييها ... و بيلبقلنا كل شيييي
لولولولولولللييييييش
********
وايناس مدت هالمناسف والبلوجرز شمروا عن سواعدهم
و عريسنا اشقر مين قال عنه اسمر
و ابيظ من الزبدة
و احلى من السكر
و تلولحي يا دالية
يا ام قطوف العالية
تلولحي عرضين و طول
تلولحي ما اقدر اطول
يا ام كميم مزمزم زم زميني و انا بنزم
شميني و انا بنشم
شامم ريحة حنداقوق
شلعت قلبي هاللي فوق
و يا سامر يا ابو حطة
من وين صايد هالبطة
و يا سامر يا ابو العقال
من وين صايد هالغزال
شنكليلة شنكليلة
و بهالليلة صارلو عيلة
و شطبنا اسم قويدر من دفتر العزوبية
و سجلنا معه ميوش بالاحوال المدنية
لولولليييييييييييييييش
و سحب عبد الشباب و بلشوا يدبكوا
(الكواليتي مش هالقد لانه الفيلم تمرمر بين اكم برنامج لوصل هون يعني تعب
الكليب ملطوش من يوتوب و اغنية الكليب اضيفت و هي مهدا من عبد حمدان
***
و كنت اعزب داير مجنون
داير بين العزبان
و قاللي عقلي اتجوز
و تجوزت و اخدت الزين
و حبل الزين و جاب غلام
و صار يقولي يا بابا
بدي حلاوة منفوشة
مديت ايدي عالجيبة
لقيت الجيبة منكوشة
ضايع منها عشر قروش
و مني و منه طاب الهوش
و اخدونا عالسرايا
و طعمونا ميت عصاية
و الباقي على كعابي
يا كعابي عقد اللولو
شقحلو
هالبيتنجان
احمر مقلي هالبيتنجان
و عريسنا زين الشباب زين الشباب عريسنا
هذا الحفل برعاية
ميلانو روجر _ اغنية كنت اعزب
ايناس_ للمناسف
منى_ زغاريت
رزان_ اغنية ايهاب توفيق الف كلمة حب
نريات_ دي جي اربع اغاني حب و زفات
نيدو_ زغاريت
ياسمينة دمشق_ ملف وورد مليان اغاني و زغاريت
عبد حمدان _عالهوارة
سمر_ اغاني الزفة و الافراح
حميدي قال بدو يبعت مناسف منعتبرهم وصلو
امجد اهداهم جزيرة حلوة لسة ما شفناها
شكرا كتير كتير و عقبال العايزين
دامت الافراح حليفة دياركم العامرة
هذا الحفل تم في صالة المنشر للافراح
زورونا تجدوا ما يسركم
July 06, 2008
التحضير لعرس ميوش و قويدر
مرحبا يا احلى مدونات و مدونين
اخونا قويدر خلص بدو يتجوز و العروس ميوش
ياااااي
و انا قلت السهرة و حلاقة العريس و حنة العروس و كل لوازم الفرح بالمنشر و العرس في 13 الشهر يعني معناش وقت بدنا نبدا نحضر كل واحد يشوفله اغنية حلوة صور كليبات و طبعا اهم اشي بدنا زغاريت عشان نعمل الحفلة اللي حابب يشترك يبعتلي
mala2e6@hotmail.com
وطبعا رح اكتب كل واحد و شو بعت مع هديته لقويدر و ميوش
الهدية هية اي اشي من صور اغاني زفات اللي بدكم اياه
مشاركة معنوية يعني
بدنا نعمل عرس لقويدر و ميوش على الانترنت
و نكون معهم بيوم فرحهم و لو من بعيد
ياللا شباب و صبايا
نشوف شو بدنا نقدم لقويدر و ميوش و عقبال الكل
الف الف مبرووووووووووووك
June 11, 2008
قبل و بعد علم النفس
مرات كتير بسأل حالي
قبل ما يكتشفوا او يعرفوا اشي اسمه علم نفس
كيف كانوا الناس يبرروا تصرفات الغير؟
شو كانوا يقولو؟
علم النفس نشأ بالقرن السابع عشر بس ما صار من العلوم الحديثة الا سنة 1879
قبل هيك شو كان الوضع؟
خلينا نلقي نظرة سريعة على اكم حالة
زمان قبل علم النفس
و الان بعد ما تغلغلنا بعلم النفس
زمان
حرامي سرق من دكانة
بوكل ضرب بوزع على بلد و بيزتوه بالسجن ليعفن
الان
حرامي سرق من سوبرماركت
جلسة تحليل نفسي و النتيجة انه سرق علبة النيدو
لانه امه ما رضعته و هوة زغير
زمان
موظف حكومي ارتشى و اختلس و نهب
بيقولو عنه حرامي و ما حدا بيحكي مع ولاده
و الجارات بقاطعوا مرته
الان
موظف حكومي ارتشى و اختلس و نهب
بيصير محبوب و بكتروا صحابه
و بتنعزم مرته على صبحيات
و بيقولوا بجلسة تحليل نفسي
انه عنده ازمة عاطفية....بيحب المصاري
زمان
طالب غش بالامتحان
بسحبه الاستاذ من دانة
و قدام كل الصف بترفشه و بيقولهم قولولو يا غشاش
و بيوقفه عالحيط
الان
طالب غش بالامتحان بيروح عالمدير
اللي بيحوله على المرشد الاجتماعي
اللي بيطلع بنتيجة انه الولد اضطر يغش لانه نفسيته تعبانة ما درس
و بيحللو نفسية امه و ابوه و جده و بيطلعوا هم الغلطانين
زمان
رجل بيضرب مرته كل يوم اتلة قبل الوجبات
بيقولو عنه زلمة عادي شو يعني
الان
بيرفع الزلمة صوته على مرته
بتضربه
بتتحول لطبيب نفسي
بيطلع بنتيجة انه عندها انفصال بالشخصية
و انها شافت ابوها تبع زمان بيضرب امها
فتشكل لديها تصور انه زوجها هوة ابوها فضربته
زمان
ابو صبحي بوزو شبرين على طول
بيقولو هيبة و مقاعد الرجال ملازم و الضحك بدو سبب قلة ادب
الان
ابو صبحي جونيور بوزو شبرين
بيقولو عندة اكتئاب ارتكازي حاد مزدوج بسبب غلاء الاسعار
زمان
ام نوال بتغسل الاواعي كل ما توسخوا
بيقولو ا اه و ماله ما بتيجيلها ام العبد الغسالة بتساعدها كل اسبوع
شو وراها
الان
ام سوسو بتغسل ايديها مرتين باليوم
بيقولوا عندها وسواس قهري مزمن
زمان
ابو مراد اشترى بنطلون تاني
بيقول متقلط و مصاريه كثيره
الان
ابو مراد جونيور اشترى بورش حمرا
بيقولو معلش هاي ازمة منتصف العمر
و ينصحوا مرته تنفخ شفايفها و تشفط الشحم من بطنها و تلبس له برمودا
زمان
ام خليل بتقول لابو خليل روح اطلع جيب خليل من الشجرة
بيرفض بدون معرفة او اعطاء اسباب
و بيقولها خلية يطلع زلمة بيننزل لحاله زي ما طلع
او بلخمه حجر و بينزله
الان
ام لؤي بتقول لابو لؤي يطلع يجيب لؤي عن الطاولة
بيقولها عندي فوبيا المرتفعات ما بئدر هلا بدوخ
زمان
ابو الوليد مكشر بوجه مرته بدون سبب
..بتسألها جارتها بتقولها عادي شو الغريب؟
ما هو طول عمره هيك
الان
الزلمة بيكشر بوجه مرته بتسألها صاحبتها مالو جوزك؟
بتقولها شو بيعرفني انفصم مرة وحدة
زمان
رسمية بدها جوزها يجيبلها جوز مباريم
اساور ذهب عيار 21 بيلفوا عالايد
بتضل تنق و تبكي و تجوح و تنوح ليجيبهم
الان
نسرين بدها شقة بالعقبة بتقولها صاحبتها
استعملي معه الريفيرس سايكولوجي
بتقوليلو معك حق هلا الشقق بالعقبة غالية ما بدنا وحدة
زمان
الولد بيقرد امه بتروح بتلخمه كف و شلوتين و تلات شحاطات
من هون ليجي ابوه يكمل عليه
الان
الولد بيقرد امه بتقوله لا يا ماما ما بيصير هيك
بيقردها اكتر
بتيجي تضربه
(زي ما هية بالزمانات اكلت اتلة)
بتتزكر علم النفس
و انه ابنها رح بيطلع معقد
و بوكرا بكبر و هوة بيكره الستات
و ممكن كمان ينحرف
يا ورديي
بتوقف و بتسكت
و بيكبر الولد و بيطلع ازعر و ضريب شفرات
****
علم النفس شو قدملنا؟
ساعدنا نفهم نفسنا و غيرنا؟
اعطى مبررات لافعال ما كان لازم تنعمل
اعطى مسميات لجرائم
بدون علم النفس شو منعمل؟
ولا اشي
بقول انا انسانة عادية عايشة عالانترنت لانه اشي طبيعي
مش انسانة مفصولة عن الواقع
و لا استطيع ان اندمج مع المجتمع الخارجي
عشان هيك بلاقي الحياة الافتراضية اسهل
مش انا طبعا بس هادا مثل
بس بحب انوه اني من اشد المعجبين بعلم النفس و الباراسيكولوجي
و انتو كيفكم؟ انا اشتقتلكم
May 15, 2008
النكبة 60
النكبة 60
و النكسة 40
و النخزة و النكشة و ال... و ال...و اللي بتحبو تعبوه بالفراغ عبوه
لو سالك ابنك في يوم شو هية النكبة شو بتجاوبه؟
بتقولة يوم ما اسرائيل اخدت فلسطين؟
يوم ما تهجرنا و طلعونا من بيوتنا تحت الرصاص؟
يوم ما كان مسموح للاسرائيلي يحمل سلاح و نحنا كننا ممنوعين نحمل سكين؟
يوم ما العرب نسيوا فلسطين و التهو بهايفة و نانسي ؟
ولا يوم ما رضينا بالوضع و قلنا مستحيل نرجع؟
ووافقنا و سلمنا
و حتى في ناس منا بيعيدوا عليهم بعيد استقلالهم
اللي هوة عيد نكبتنا؟
طيب لو سألك ابنك سؤال محرج
انتو شو عملتوا عشان تقلبوا الوضع و ترجعوا؟
بتقوله رفعنا ايدينا و دعينا على اسرائيل على قد ما منقدر
و الله ستك كانت تصحى كل يوم و تقول الله يعدمني اسرائيل
الله ياخدهم و يذلهم و يشتتهم
و امك لهلا بتدعي على اسرائيل
و رح نضل ندعي عليهم
ترى دعوة الولايا مستجابة
و ما تنسى تقوله انه العرب ما قصروا
و جامعة الدول العربية عملت اجتماعات كتيرة
و سافروا
و قضوا وقت كويس
و تعشوا عشاء تقشفي
و سهروا للصبح و هم بيحكوا عن فلسطين
يعني عيب الواحد يحكي و الله عيب
ستين سنة
و الشعب مشتت
ستين سنة
و متل ما قال عادل امام :الساعة بعشرة جنية و الحسابة بتحسب
و الحسابة لسة بتحسب
و العداد شغال
اسرائيل اليوم بتحتفل بعيد استقلالها
عن مين استقلت؟
ليكون كننا محتلين فلسطين و طلعنا ؟؟
ولكم بلكي هيك؟
ييي
نحنا المغتصبين المحتلين
و النا سنين مندعي على المغتصب و المحتل؟؟؟؟
و انا بقول شو الي جايبنا ورا
اتاري الدعاوي بترجع علينا
و قاعدين مندعي ع حالنا
بس هلأ بما انه عرفنا سبب عدم رجوعنا
فأظن لازم نغير نوع الدعاوي
عشان نرجع
سنرجع يوما
حلم جدي و جدك
و حلم ابني و ابنك
و حفيدي و حفيدك
و يستمر الحلم
هذا الموضوع كتب تضامنا مع يوم التدوين لفلسطين
May 01, 2008
قصة النمل و الجندب الطربان
بمناسبة عيد العمال اهديكم هذه القصة عسى فيها عبرة
كان ياما كان في جديد الزمان
نمل يعيش في احد البلدان
في بيت بالطعام ملآن
كانت تكفيه فتافيت الجيران
او بقايا طعام الانسان
و الى الجوار عاش جندب كسلان
كان نصف الوقت سكران
يقضي اوقاته بالهذيان
و الغناء و استماع الالحان
عاشوا لسنين في امان
و في زمن من الازمان
ضربت البلدة مجموعة غيلان
و ساعدتها مجموعة من الغربان
اكلوا الاخضر و كل الالوان
و لم يتركوا للنمل الا الحيطان
فبدا رئيس النمل بالغليان
و قال: يالله يا فرسان
لنغزوا الحقول و الوديان
فبطني من الطعام خويان
و ذهب النمل الى الجار الطربان
و طلبوا ان يخرجهم من البنيان
فهم بحاجة الى مساعدة الفنان
فقال اخرجكم و تعطوني الحلوان
وافقوا و امتطوا رقبة الجربان
وصلوا فوجدوا الحقل خربان
و الوادي و قد اصابه النشفان
فاقترح الجندب ان يغنوا في قهوة سلطان
و اسرعوا الى هنالك يسنون الاسنان
رآهم الجرسون و ابتسم بحنان
و اخرج بيف باف اصفر رنان
و هذه نهاية من لا يعمل يا شجعان
April 26, 2008
موظوع مزوزك جخة
و شو بدكو بطول السولافة
هظول الربداوية هبروني
ف اني قلت اعملهم موظوع ربداوي مزوزك مهندز
الشغلة مش دوشرة
و المنشر يستنكر الاتهام
و اني هسعيات بدي امزط من هالسولافة
مش بسفط راحة
لأ
بفيديو كليب لمطرب الشمال الاول
توفيق النمري
و اخر لعمر العبدلات
***
شملّت و النية اربد
قلبي عليها متعود
و اجبد
April 18, 2008
وثيقة عمان الغربية
بونجور او بونسوار كل حسب توقيته
قبل فترة بسيطة اجتمعت فعاليات شعبية سلطية في الارينا
(اه في الارينا تستقلوش السلطية)
و اتفقوا على سلسلة من البنود لاحياء عادات شعبية قديمة و الغاء عادات مكلفة و ما الها داعي
همة في بداية الثمانينات عملوا وثيقة قبل هاي و بيقولو فشلت
وثيقة السلط هدفها نبيل و الحق يقال
و هو التخفيف من الاعباء و التكاليف الاجتماعية على المواطن
و من بعض بنود الوثيقة
تحديد المهر و الشبكة ب الفين دينار بس
(السلطية مقرشين بحكوا بالالوف )
و انه اهل العروس يساعدو بالجهاز مش بس يتأمروا و يتطلبوا
و هنالك بند اثار القلاقل
و القلاقل بالتعريف المنشري: جمع قلقول و هو جمع قال و قيل
و البند هو تحديد عدد المناسف في المناسبات الفرحية و الحزينة ب عشرة مناسف ماكس
مهما كان العدد
و بند هام الا و هو : انه اكل المناسف يكون بالمعلقة و الصحن
(يا شماتة الكركية فيكم و يا فرحة الرماثنة و الربداوية)
و منع الدحبرة و التلقيم و التشريب و خوذ هاي عشاني
و اللي بدو ياكل ياكل و اللي ما بدو الله لا يردوا بيوفر
صورة ارشيفية للمنسف المنقرض
كمان اكدت الوثيقة انه زيارة المريض مش ضرورية خلية يعفن بالمستشفى
و بس بتحكوا معه تلفون يعني برضة توفير
و اللي بيدخل عالمستشفى عشان يلم شوكولاتة راحت علية
و الو مرحبا لد جاي انا كنت حاب اشوفك بس ابقدرش بيقظبوا شللي
(اي بيشلوا املي باللغة السلطية و بيجيبوا سيرتي
و يا ريت اضافو بند انه لو تمت الزيارة عدم احضار اكتر من بطيخة لشقحها هناك
و الاستعاضة عن البزر بالترمس ان امكن
الغاء النقوط في الاعراس و بعد اداء الحج و الغاء التقبيل بالعزاء.. ..
منيح ما لغوا التقبيل بالاعراس كان انقرضوا السلطية
الوثيقة مش غلط وبس بدها تزبيط و لو الكل مشي عليها بتتمزع..دبشة
لا جد لو الناس عملت بها الكل بيتساوى
****
انا قلت بما اني مندوبة عمان الغربية هون
و دايما بتعاطف معهم
(بس بلاش)
و بحس بالامهم
اعمل وثيقة ليش السلطية احسن مننا؟
***
و اليكم وثيقة عمان الغربية
كما صدرت من فندق الفورسيزنز الطابق التالت عشر_المنشر
****
لبسة الذهب ممنوعة منعا باتا و يستعاض عنها بالالماس
على ان لا يزيد عدد القرراريط عن 30 و لا يقل عن 10
الجهاز الشخصي للعروس لا يزيد عن 50 الف دولار او تلاتين الف يورو
و من المحبذ ان يكون الشوبينغ من بلدة واحدة اما فرنسا او روما
ان يحي الزفة و العرس مطربين فقط
اما اذا كان احدهما عمرو دياب او راغب علامة فيكتفي بواحد
اما الراقصة فيمكن الاستعاضة عنها و احضار مطربة و راقصة في ان واحد
(تو ان وان)
من درجة هايفة و دندن و في هذه الحالة يلغى عمرو و راغب
(سوري غايز)
البوفية في الاعراس يجب ان لا يتجاوز طولها كيلومترين
يستعاض عن النقوط بشيكات تصرف لحامله
اما
حفلات الكلاب يجب ان لا يتجاوز عدد المدعوين فيها المئة كلب
و من الممكن دعوة بعض البسس لاضفاء بعض الاكشن على الجو
على ان لا يتجاوز تكلفة الحفل 20 الف دينار
رايح عالحفلة
***
في حالة الوفاة و العزاء يسمح باالون الابيض مع الاسود المخطط و القليل من البيبي بينك
لاضفاء اللون للوجوه الشبه شاحبة
و يمنع التقبيل لاكثر من دقيقة للشخص
اوقات العزاء الرسمي بين السادسة و السادسة و النصف مساء
ليتسنى للمعزين و اهل المتوفي تكملة السهرة فيما بعد بلا نكد بلا هم
***
_في حالة الحوادث لا سمح الله لا داعي لعطوة او جاهة
يتم شلفقة الموضوع و تلبيس التهمة لاي وافد و الاختفاء في باريس لتهدا الامور
و الجدير بالذكر ان هذا البند قد بدا العمل به قبل التفكير بالوثيقة
***
هذا و بعد ان صدرت الوثيقة العمانية الله لا يورجيكم شو صار
اعترض ميمو و صرخ صرخة مدوية و قال:...مش معئوول
و من هنا ظهرت حركة مش معئول الثورية المناهضة للوثيقة
و طالبوا باعدام ملائط و احراق المنشر بسيجارة دافيدوف لايتس
*****
هدية للسلطية
مش مسح جوخ او خوف
حباَ و الله حباَ
March 30, 2008
قصاقيص
كيفكم يا اهل بلوجر الشمالي
و اسعد الله اوقاتكم يا اهل ورد برس الجنوبي
و متعكم الله بالصحة يا ايها المدونون اصحاب الدومينات الحرة المستقلة
^^^^^^
متل ما صرتوا متعودين اني بغيب شهر و برجع
المهم اني لسة برجع
و خايفة يوم اطلع و ما ارجع
بس بشتاقلكم
و هدا اللي بيرجعني
******
المهم اكتشفت و انا بدعبس على اكبس
انه منزلين اشي اسمة والله العليم ويدجيت
(ابصر اذا هيك اللفظ صح)
و بس تاخدوا اليو ار ال بتزبطو اموركم
و بتنزل افلامكم او صوركم على البلوجات
انا صراحة انبسطت و كيفت عالموضوع
يعني افلامك تحت ايدك و تحت عينك
بتعرفوني بموت باي اشي فيه تغيير
صحيح بلوجي عطب من ناحية ديزاين
و صحيح انه ما تغير من ايام الافتتاح
بس انا تعودت عليه هيك
يمكن لو اغيره انتو كمان تحسو بغربة
هلا بتدخلوا بتعرفوا وين المطبخ ووين الاكل
و ما بتضيعوا
*****
بحب التغيير صح بس برضة بتعلق بالقديم
خصوصا اذا كان اله مواقف و ذكريات حلوة
و هاي شغلة مرات مزعجة لانه بتلاقي عندي اشياء من ايام الاحتلال الديناصوري للارض
هل تعلقنا بالقديم بيشعرنا بالامان؟
يعني ممكن ما ترمي بلوزة مصدية لانه لما كنت لابسها مرة قالت لك حبيبتك كلام حلو؟
او ممكن ما ترمي قنينة بيرفيوم فاضية لانها هدية من ناس غاليين؟
او ورقة تشيلي هاوس عليها رسمة هبلة بس الها ذكرى حلوة؟
اديش بدنا نلم و نعبي ذكريات و قصاقيص ورق
اديش منحتاج لو لانه ذاكرتنا بطلت توسع؟
نحنا بحاجة لشي يذكرنا؟
يعني لو اشي كتير مهم ما رح ننساه
بس لأ
يكون عندك بقايا من الامس
لو قصقوصة ورق
بيرجعك لورا
و لنفس الاحساس
عشان هيك بتلاقي عند الامهات دايما اول قصة شعر للبيبي
اول رسمة رسمها
فستان قديم او بنطلون مهري
ما بيعني لحدا اشي بس بيعنيلك كتير
بس تشم ريحة بيرفيوم قديم او تسمع اسمه بيرجعلك نفس الاحساس
حتى لو صارت ريحتة بشعة بالنسبة الك هلا بس بتضل اله ذاكرتة و ذكرياته
اذا القديم يشعرنا بالامان
يمكن لانه انتهى ما في خوف منه
عشان هيك لو رحت عند ستك او جدك بتلاقي عنده بلاوي
و كلها عزيزة و غالية و بقعد يحكيلك عنها
بتلاحظو اديش منحب نحكي عن افلام كرتون زمان
او لما نشوف اصحاب قدامى منصير نحكي اشياء هبلة
بس حتى نحس انه ما فقدنا اتصالنا بالماضي
***
انا ما كان عندي نية اكتب هالحكي
كنت جاي اسلم عليكم
ما بعرف كيف و ليش كتبتة
يعني كلمة جابت التانية
بس كمان مرة بقولكم بضل اشتاقلكم و مقصرة معكم
March 12, 2008
قصة خيالية اردنية
blog about jordan day
A jordanian fairy tale
قصة خيالية اردنية
كان يا ما كان في قديم الزمان و في سالف العصر و الاوان
بلد صغيرة جميلة يعيش فيها عائلة صغيرة مكونة من اب و ام وولد فقط
يصحى ابو عقلة من النوم نشيطا مبتسما
و ينظر الى ام عقلة بحب ووله
ابو عقلة: يسعدلي هالصباح شو هالحلاوة هاي اي انا الي تلاتين سنة بتصبح بهالقمر
ام عقلة: يي يا ابو عقلة انا اللي بتصبح ب احلى قمر احضرلك الفطور؟
ابو عقلة: اه بس اطفي التدفئة شوبت كتير و الله هدول بالارصاد دقيقين بطريقة مش معقولة
يعني اللي بيقولوه بيطلع صح
ام عقلة: شايف شو الطقس حلو برة؟ التلج داب من مبارح
و الجرافات رفعتة من الطريق و كل شي برة نضيف..
خليني اصحي عقلة يلحق يتحمم و يفطر و يروح على دوامه و بحضر الفطور
ابو عقلة :ما تنسي العسل و القشطة يا قشطة
ام عقلة تذهب لايقاظ عقلة ,تدخل غرفة عقلة المرتبة النظيفة جدا و تراه نائما كالملاك
ام عقلة: عقلة اصحى يما الساعة ستة
عقلة يصحى بسرعة شديدة و يقفز من سريره بنشاط
عقلة: يسعد صباحك يما..يا باي يما شو بحب يوم الاحد بعد العطلة
هيك ارجع ع دوامي ..انا يما بحب شغلي كتير
ام عقلة: بس يما زي ما بوصيك دايما انت شرطي سير و الناس امانة برقبتك
عقلة: و لو يما..انا اصلا كل مواطن اخ و كل مواطنة اخت بديش وصاة
يفطر ابو عقلة و ام عقلة و عقلة في جو من الالفة العائلية الجميلة
و يقبّل ابو عقلة ام عقلة بعد ان يضع في يدها خمسين دينار مصروف اليوم
يذهب عقلة الى عمله مبتسما و يقف في مكانه على دوار عبدون
تمر سيارة مسرعة و يوقفها و يذهب للسائق مبتسما
عقلة: صباح الخير يا اخي ..كيف حالك؟ بس يا ريت تخفف السرعة شوي عالدوار
و بلاش التشحيط و كمان لو تحط الموبايل من ايدك لانه خطر على سلامتك و سلامة غيرك اتمنى لك نهار سعيد
المواطن مبتسما: شكرا سيدي الله يعطيك العافية
و يقود سيارته بتمهل و حذر
يتحدث عقلة لنفسه: ما شاء الله ما احلى سيارته الله يزيد و يبارك
ابو عقله في دوامة باحدى الدوائر الحكومية ينهمك في عمله
ولا يلتفت يمينا او يسارا
ولا يحادث زملائه
ولا يشرب الشاي
او يحل الكلمات المتقاطعة
و يبدا المواطنون بالتوافد على الدائرة التي تتسم بالنظافة الشديدة
و التي يوجد بها كراسي نظيفة جدا مرتبة غير مكسورة او مطبشة او مكتوب عليها
و يقفون بترتيب في طابور منظم بدون تأفف مع احترام النظام و اعطاء الاولية لغيرهم
يقترب اول مواطن من ابو عقلة مبتسما
المواطن: صباح الخير
ابو عقلة: صباح النور شو طلباتك نحنا هون في خدمتك و لراحتك و مساعدتك
المواطن: بس بدي توقعلي هالورقة
ابو عقلة: بكل سرور بس بدها توقعين تانين بعد هيك و بتكون جاهزة
يشكر المواطن ابو عقلة و يوقع التوقعين و تنتهي معاملتة خلال نصف ساعة و يغادر الدائرة
يخرج للشارع و يوقف تاكسي
و يجلس قرب السائق النظيف الذي تخلو سيارته من اية زينة او علبة كلينكس معلقة بالسقف
و التي يمنع فيها التدخين
و يقود السائق سيارته بكل لياقة و ادب و اخلاق
دون ان يتجاوز او ييتوقف على المنعطفات بدون انذار
و دون ان يشتم او يسب او يتافف من الحكومة او الغلاء او المخالفات الغير موجودة اصلا
و دون ان يفرض ارائه السياسية و نظرياته على الراكب
و دون ان يبصق من النافذة
و تنتهي الرحلة و يدفع الراكب النقود بدون نقاش
و يعيد له السائق الباقي بكل سرور لوجود الكثير من الفكة بحوزته
و يتابع السائق طريقه مبتسما هادئا
يستمع لصوت الوكيل الشجي على الراديو الذي قرر ان يستقيل لان البلد خالية من المشاكل
يتوقف على اشارة المرور ولا يقترب منه اي شحاد او بائع زهور او العاب لا معنى لها و لا يزمر للذي امامه او يقرفه
و يشكر الله على نعمته و يحمده على خيراته
و يقول لنفسه: يا الله شو بحب هالبلد يا رب اعيش فيها للابد
ولا بدي اطلع ولا اخد فيزا ولا اهج
و توتة توتة خلصت الحدوتة
انا قلت انها قصة خيالية بس بحب اعيد و اذكر
Subscribe to:
Posts (Atom)
Posts
