18_

شو ممكن الواحد يعمل اشياء قبل ما يصير 18

او بالاحرى شو ما يعمل

يعني مكسب قبل ما الدنيا تبلش فيه شلاليت

تاغ داير بالمدونات و اجا دوري

لانه شريفو قرر هيك
هلا و الحقيقة تقال انا من زمان بطلت 18

مش باين صح؟

نحكي شوي عن هالسن

قبل لا توصل ال 18 بتكون مريت بفترة المراهقة الزنخة جدا

مش الفترة زنخة انت بتكون زنخ

نعم

زنخ و سقع و مفكر حالك كبرت و بتفهم

و انت ولا بتفهم ولا اشي

مفكر انك ختمت العلم و خلصت كي جي وان و يعني مقلع و يا دنيا استقبليني بالاحضان
وسع للصقر

وانت ما حصلت صوص

نصائح من وحدة تركت هالسن

و كانت مفكرة انها ختمت العلم و انها بتفهم اكتر وحدة

قبل ما تصير 18

لا تفكر انك اذا دخنت و ارجلت انك فايع و صرت زلمة او صرتي ست

لا تفكر انك بتفهم اكتر من اللي اكبر منك لانك بعدين بتكتشف انك ما بتفهم اشي

اذا اهلك نصحوك و قالولك تعلم من غلطنا مش عشان يتحكموا فيك ولا عشان يمارسوا عليك سلطات الاهل(بضم السين)

همة بس ما بدهم توقع باغلاطهم و تزكر انه اهلك كمان كانوا 18 قبلك و كانوا فايعين او مفكرين انهم فايعين و مقلعين و كل حسب زمنه

لا تعمل تاتو دائم بوكرا بتندم عليه اشد الندم خصوصا اذا كان اسم بنت الجيران شلبية

لا تفكري انه كتر المكياج بحليكي و بخليكي تبيني اكبر لانه كمان اكم سنة رح تحطي مكياج لتبيني ازغر..عيشو طفولتكم قد ما بتقدروا

لا تشحط بالسيارة و تبطنج و تبتون و تلفلف لانك ممكن من غير شر انك ما تتجاوز هالسن

او تحرم غيرك انه يتجاوزه..التفعيط بالسيارة و السرعة مش رجولة ولا بتخلي البنات يقولو ياي

بقولو ما اهبله بدو بس يلفت نظر و بيضحكوا عليك..صدقني

حاول انك تتطلع 20 سنة لقدام دايما و اللي بتقبله لولادك بعدين اقبله لنفسك هلا

..و اللي بتقبله لبنتك اقبله لبنات الناس هلا و اللي بتعملية يا بنت بشاب هلا بوكرا بنعمل بولادك..

ما تفكر انك ختمت العلم و انك فصيح زمانك و ما حدا بيفهم قدك

اللي بفهموا اكتر منك كتار

و رح تضل تتعلم لحد ما تموت لانك اليوم اللي بتوقف تتعلم فيه هو يوم ما تموت

صاحبك اللي بيدلك على الخراب و بيبررلك كل شي غلط انه صح مش صاحبك..

اللي هلا مش عاجبك و انت شايفه اقل منك ممكن يكون ف يوم مديرك بالشغل و يمكن في لحظة تيجي تطلب منه اجازة..دايما احفظ خط الرجعة لا تبزق بالصحن اللي ممكن ترجع تاكل منه..

اللي بتشوفه بالمسلسلات و الافلام الامريكية حلو و بيضحك بس مش واقعي

..و سبايدر مان ما بيمشي عالحيط و هاري بوتر ما بيختفي و جيم لو مرته بالحقيقة عملت هيك بفتح راسها مش بيضحكلها..خليك واقعي

لو حدا عملك بلوك عا ام اس ان او حدفك من الفيس بوك مش نهاية العالم

..اللي عافك عافة ولا تتغطي بلحافه و اللي حلقلك احلقله و نعمّ اله

.الحياة برة مش عالنت... لا تقضي الليل و النهار و انت بتحكي بالموضوع و تقزز البشر بقصصك اللي ما بتهم حدا غيرك

البنات اللي هلا صاحباتك بعد اكم سنة يمكن يمروا من جنبك ما يسلموا عليكي..اسرارك الك يا بنت لانه اذا انتي مش قادرة تحتفظي فيها لنفسك فكرك صاحبتك بتقدر؟

تزكري انه السر اذا جاوز اثنين ذاع و الاثنين هم الشفتين مش شخصين

يمكن بعد عشر سنين تسمعي قصصك بالبلد..نحن شعب لا ننسى

الزيت اللي بيقلي فية ماكدونالدز متل الزيت اللي بيقلي فيه عمو ابو ربحي بياع الفلافل ..مش كل فرنجي برنجي (سمعتها بمسلسل سوري و

عجبتني

_الجمال و الحلاوة و القوة و اللياقة و الصبا و الشباب.. حلوين..بس مش دايمين ..يعني اشتغلوا شوي عالشخصية و اقرأو اكمن كتاب غير كتب المدرسة يمكن خبرات اللي سبقوكم تنفعكم

تمتعي بشعرك الطبيعي قد ما بتقدري..شعرك اذا بدك تبدي تصبغية من هلا و تعمليلو هاي لايتس .عالتلاتين بتصلعي

أخوك الزغير او اختك الزغيرة بيتعلموا منك و انت مثلهم الاعلى..فكر بهالحكي و انت بتدخن قدامهم او انت بتطبق الباب بوجه ابوك و

بتقولو شو هالحياة بدي انتحر..الزغار بعملوها لو جابوا 12 من 20 بالرياضيات

كأبتكم ؟؟

سميت بدنكم؟

مش القصد اكيد
انا ما بعرف مين عمل التاغ و مين ما عمله

و بما انه من اتيكيت التاغات اني اتيغ حدا بعدي

سمر

أدوش

امجد

غاردينيا

نورا