شو اسمو؟

شفت فيلم زغير لحجة من غزة بتحكي بالسياسة

الحجة بتحكي عن الزعماء اللي بيجاهدوا بأولاد الشعب

و ما بيهمهم عدد الشهداء ولا بيهمهم مين مات

المهم بالنهاية انه لو صار اشي منيح بينحط تحت اسمهم

و على عهد فلان الله يكطع اسمه متل ما قالت

اللي بيصير بغزة و بلبنان و العراق

الي بيموتوا كل يوم

عشان الوطن و عشان القضية

صاروا مجرد احصائية بدون اسماء

ولاد البلد

ولاد غزة

مش متل اي ولاد زغار بيفطروا كورن فليكس و بيروحوا عالسينما

و دادي بياخدهم باي

ولاد غزة بيصحوا على اصوات رصاص

و بيناموا على اصوات مدافع

مش على صوت نانسي ولا على هز هيفا

و يمكن نسأل نفسنا

ليش هيك يا ربي بيصير فينا

ليش نحنا دايما موجوعين و متالمين و مصايب الدنيا فوق راسنا

ليش نحنا ؟

متل ما كل واحد فينا بيسأل نفسه هالسؤال لما تصيرلو مصيبة: ليش انا من دون العالم

فكركم الحق على مين؟

ممكن نرفع اي مسؤولية عن نفسنا و نحط الحق على العدو

تعودنا نستعمل كلمة العدو

مين عدونا؟

اسرائيل و اميركا؟

ولا نحنا اعداء نفسنا؟

نحنا المقسومين اللي ما منحب بعض

اللي مندور على اي اشي بس عشان يميزنا و يفرقنا عن غيرنا

و بالاخر منتقسم لمليون حزب و جهة و اسم

لو اللبنانين اتحدوا تحت اسم لبنان فكرركم حدا بيسترجي يتدخل فيهم؟

لو اهل غزة اتفقوا سوى و كانت قضيتهم وحدة فكركم بيصير هيك؟

لو العراق مش مليون عراق كان صار هيك

؟؟؟؟؟؟

انا ما بحب السياسة و ما بحب احكي فيها لاني بشوفها قضية فارطة خسرانة

بس كل ما اشوف شو بيصير ما بقدر احط اللوم بالاول الا علينا كلنا

كلنا مسؤولين

ب سكوتنا مسؤولين

بانقسامنا مسؤولين

بانانيتنا مسؤولين

و الخسران هو الشعب الاطفال الي بيروحو دعس و ما حدا حاسس فيهم

كلمتين موقفين بحلقي و كنت بدي اقولهم

و خلي الحجة كمان تقولكم