شعر البنات

شعر البنات

و اللي بدي احكي عنه مش شعر البنات الزاكي

اللي بيتاكل

اللي لونه زهري
مع انه جاي عبالي هلأ

شعر البنات

اللي على روسهم

طبعا كتير حكوا عن اهمية الشعر و كتير كتبوا عن موديلات الشعر

و الكل بيقول الشعر تاج المراة و من هالحكي
انا بدي احكي عن موضوع تاني اله ارتباط بالشعر

الشعر و علاقته بالشرف و القوة و الكرامة و النبل و كل الاخلاقيات و الصفات المحببة

و نبدا من الاول

الاول الاول

و الانسان الاول

و هيك بدنا نحكي عن شعر الرجال كمان

رجل الكهف

من قديم الزمن من ايام رجل الكهف اللي كان شعره

مكنفش و كان يزينة بالعضم و الاسنان و الشعر اله اهمية
وقت رجل الكهف متل ما منشوف بالكاريكاتيرات (لانه اكيد ما كان في صور و كاميرات)

الشعر كان مهم
كان وسيلة مواصلات

او وسيلة تربوية

او وسيلة غرامية

رجل الكهف كان يشحط حرمته من شعرها
و نحنا مش عارفين كان يشحطها عن زعل ولا عن حب ولا بساعدها تمشي لانها تعبانة

بس المهم انه شعرها كان الوسيلة

تخيلوها مثلا بقصة شعر ستبس كان تغلب غلبة

الفراعنة وقدماء المصريين
الفراعنة و المصريين القدماءهدول حكاية لحالهم

كانوا يحلقوا عالزيرو ..ملط

لانه الدنيا شوب
بس وقت الاحتفالات كانوا يلبسوا باروكات

معناتو الشعر عندهم اله اهمية

و بيعطي هيبة

بس لعدم احتمالهم للطقس كانوا يحلقوه

يوليوس قيصر

اما يوليوس قيصر..و هدا زلمة كان مهووس بشعره و يخاف علية

و متل ما قلت لكم في موضوع سابق اللي بيخاف من البعبع بيطلعله

هوة من كتر ما كان يخاف انه شعره يسقط

..شعره صار يسقط

و بلش يصلع

و ما كان ايامها في زراعة شعر ولا باروكات رجالي

(كانت الموضة منقرضة بعد الفراعنة)

المهم شو عمل قيصر؟؟

لبس تاج الغار
هيك بيقولواانه لبسة عشان يغطي فيه المنطقة المصلعة

و من كتر ما هوة كان معقد و كلاكيعو

كان لما يكون عنده اسرى حرب يحلقلهم عالصفر عشان يحس انه اقوى منهم
ممم
استنوا شوي
فكركم هدا اله علاقة انه بيحلقوا للشباب عالصفر لما يوصولوا على المخفرهالايام؟؟

مش بس عنا

.بكل العالم

انا عارفة ممكن الحلاقة للمساجين عشان ما تنتشر الحشرات ما غيرها

و انه انضف بس ممكن يكون كمان هدا سبب
ما علينا

نرجع لموضوعنا

الهنود الحمر

كانو يسلخوا راس الزلمة لما يمسكوه هيك يكونوا جردوه من قوته

في اليابان الست لما تحزن على فراق الحبيب و ينكسر قلبها

بتقص شعرها

غير هيك بيضل طويل طبعا ملفوف و مربوط و مش مفرود
حتى السومو (المصارعين الناصحين كتير)

بتلاقي شعرهم طويل

و السومو بعد ما يتقاعدوا و في حفل بيقصوا من شعرهم
طبعا في القديم ما كانوا الستات يقصوا شعرهم.. و مرات ولا حتى الرجال
و كانوا طبعا دايما يجدلوه او يضفروه او يرفعوه بدبابيس او عضام حسب الفترة التاريخية
الشعر كان دليل القوة و العزة و الكرامة و الشرف
و الست ما كانت تترك شعرها ينزل الا

لما تحممه

(الله اعلم كل اديش)

او لما تمشطه

و في جملة بالانجليزي
let your hair down

و الها معنى مجازي يعني خدي راحتك
طيب
هل معنى هدا انه الجملة الي بالعربي ماشية على حل شعرها الها علاقة بهالموضوع؟

ماشية على حل شعرها مش متل ما قال عادل امام بتفرد شعرها و بتمشي عليه

لا..يعني انها بتعمل الي بدها اياه

ماخدة راحتها عالاخر

و بالاحرى انسانة فلتانه

اذا

الشعر اله دلالات و معاني هامة عند الشعوب

ملاحظة انا لاحظتها
لما تيجي سيريلانكية عالبلد هون و تمسكها ست البيت

و تقلبّها عشان الحاجات اللي بتمشي

و لما تلاقي انه ما في فايدة

بتجيب هالمقص و اخرط

و المسكينة السيريلانكية بتصير تبكي

عنا قص الشعر عادي و يمكن نقول شو هالهبل ما هو برجع بطول
هلا الظاهر و الله اعلم انه عندهم الست المتزوجة هية اللي بتقص شعرها

بتلاقيهم لما يجوا يتصورو بيفردو الشعر

و بيجيبوه على جنب

و بيبعتوا الصور لاهلهم

انه هاي اثبات انه نحنا لسة شرفاء
و انا واهد سريف عفيف سعري نضيف

شايفين اختلاف وجهات نظر الشعوب؟
الشعر لو بدنا نحكي عنه تاريخيا ما منخلص

رجالا و نساء

الشعر كان اله اهمية و انكتب فيه شعر و تغنى فية الحان
يعني ما تلومونا لما نهتم بشعرنا و نلونة و نقصة و نطوله
و نخاف لما يسقط و نهستر لما يقصف

فما نحن الا نتاج من الجينات المتراكمة عبر ملايين السنين