فنجان قهوة مع ام العيال

تاغ من ام العيال و هاجاوبة بالمصري عشانها

و عشان بقى اتمرن و عشان التغيير

و هيكون على شكل حوار مش تاغ و استجواب
لاني ما بحبش الاستجواب

***

وقفت ام العيال على البلكونة و رأت ملائط تنشر غسيل

ام العيال: عاملة ايه يا ملائط انتي ما بتتعبيش م النشر يختي؟؟
ملائط: اعمل اية يا ام العيال ..قسمتي بأة

ام العيال: تعالي اعملك فنجان قهوة م اللي قلبك يحبو و اشوفلك الفنجان

ملائط: بس اخلص التعليقين اللي ف ايدي


دخلت ملائط شقة ام العيال الملاصقة لشقتها و التي تشبهها شبها كبيرا في التقسيم و الغرف و لكن الاختلاف في بعض الالوا ن و الصور

ام العيال: تعالي اقعدي دا نتي شقيانه..انا عارفة هينوبك اية م الغسيل دا
تفتكري لا سمح الله ايه اللي هيحصل لإيميلك لما تموتي ؟

ملائط: يختي برة و بعيد..ان شاء الله عدويني..هوة يعني كان ايميل وزارة الدفاع..انا لما اغيب عنه كام شهر الاقية قافل..اكيد يعني لما اموت مش هاقدر اعملة اكتيفيت و خلاص

ام العيال: ما انا قلت لا سمح الله..طب ما اديتيش الباسوورد لحد؟ يعني علاقتك اية فيهم؟

ملائط: يختي..ربنا يعين كل بني ادم على ايميله..همة هيلاحقو مين ولا مين..انا كنت عايزة اسيبة للورثة بس قلت بلاش يتخانقوا..انا ما اديش حاجة لحد

ام العيال: تعرفي بقالنا جيران يجي كام شهر كدة و لسة ما اعرفش اسمك الحقيقي ولا عمرك؟

ملائط: طب تعالي اوشوشك..اصل الحيطان لها ودان

ام العيال: هيهيههي..تعرفي انا حسيت انه اسمك كدة..عندك حركات با ملائط!! انتي برجك اية بالمناسبة؟

ملائط: ما كانش فنجان قهوة داّ !! هو انا ف تحقيق يختي..برجي الدلو الدلو اجدع ناس..من كام يوم كنتي لسة معزومة ف عيد ميلادي ولا نسيتي؟

ام العيال: و لا نسيت ولا حاجة..و دي حفلة تتنسي برضة..يعني حسيتك كدة ميالة للاغاني الفرنجي.انت مجال دراستك ايه؟

ملائط:..انا مجال دراستي افرنجي ..يعني لغات انجليزي و فرنساوي

ام العيال: انا قلت كدة..انا ما تفوتنيش حاجة...انتي بتحبي الضحك اوي بس بحسك مرات كدة حزينة.شخصيتك نوعها اية؟

ملائط: شخصيتي..ديمي سيزون..يعني من كل حاجة تلاقي

بس الطبع الغالب هوة اني بحب اشوف كل حاجة من ناحيتها الحلوة.. و دا دايما بيعملي شوية صدمات لانه في ناس وحشين..بس برضه بوكرا تعرفيني اكتر و انتي تقولي يأة شخصيتي اية

ام العيال:ابو العيال عايز ياخدنا السنة دي نصيف ..مش عارفة نروح فين..السفر بالنسبة لك اية؟

ملائط: انا بحب السفر اوي..و اليوم بس كنت بفكر بالناس اللي بعرفهم و ناجحين اوي و عندهم تجارة ناجحة او مشروع ناجح و قلت ف نفسي السفر هوة السبب..الاختلاط بالحضارات بيوسع الافاق و يخلي التفكير يطلع من الصندوق

ام العيال: أي دا يختي انا سالت سؤال تجاوبيني بمقاله ..الموود بتاعك ايه بالزبط؟

ملائط: الموود بتاعي؟ انا المود العام و بشكل عام موود متفائل برمي وراي و ما ببصش بس يعني و عشان ما اطولشي عليكي موودي الصبح غير بعد الضهر غير الليل..


ام العيال: عندك وقت فراغ كتير؟ بتعملي ايه؟

ملائط: مالك يا ام العيال مالك يختي..وقت فراغي بقعد فيه عالنت اكتب شوية اقرا شويتين و مرات بقرأ في كتاب او بشوف التلفزيون

ام العيال: انا النهاردا عاملة بيتزا ايه رأيك تتغدي معايا؟ ولا اية اكلتك المفضلة؟

ملائط: لا انا معزومة على سمك و جمبري و دي اكلتي المفضلة.

ام العيال: اكيد دي حاجات و صفات خدتيها من باباكي و مامتك..مش من اهل البحر برضة؟

ملائط: يمكن,انا خدت من بابا حاجات اهم ,كان الله يرحمه متسامح اوي يعني عمري ما سمعته او شفت بيحقد على حد او بيكره حد , و عصبي شوية عايز كل حاجة تخلص مبارح قبل النهاردا..اما ماما بيقولو اني بشبهلها في الشكل..اما البحر فانا بموت فيه

ام العيال: انا ما بحبش الحقد كمان..بس اية كمان حاجات ما بتحبيهاش

ملائط: الغباء..ما اقدرش اتعامل مع الغباء..ولا الدم التقيل و الناس اللي دايما بتشتكي و
متشائمة و اكتر حاجة بكرها الغرور و الوسوسة من الامراض

ام العيال: معاكي حق يا ملائط انا بموت في الضحك الرومانسية و انتي كمان صح ؟

ملائط: اوي اوي.. بس اكتر حاجة بحبها و بحسها مفقودة هية العدل..ما فيش عدل يا ام العيال

ام العيال: ايه يا ملائط معاكي حق ..الواحد بيشتغل ليل نهار و بالاخر ياخد ملاليم..الشغل هوة كل حاجة.. اثبات للذات و منعا للتخلف و لا اية رأيك؟

ملائط: الشغل هوة اللي بيعطي اهمية للحياة..الايد البطالة نجسة ولا نسيتي كلام ام العربي جارتنا

ام العيال: و دي تتنسي..بس انا بشوفك كدة بتشتغلي كتير عالانترنت ..يعني بحس انهم حاجة مهمة اوي عندك

ملائط: طبعا با ام العيال يا جميلة انت.. لولاهم ما كنتش اصلا قابلتك و لا عرفتك..انا المدونة بتاعتي ما بتاخدش من وقتي حاجة بس انا بقعد كتير و بقرا كتير عن حاجات تكنلوجية و بتعلم كل يوم حاجة جديدة

ام العيال:ممم ملائط..ريحة..شياط.. البيتزا شاطت... يا لهوي يا ملائط

ملائط: اللهّّ !!! مش انتي اللي بتسألي !! و عاملالي فيها المحقق كونان..متشكرين عالقهوة يا ام العيال و ابقي اعملي ديليفري و سيبك م الطبيخ

+++++++

الاسئلة بالاحمر و الاجابات بالاحمر الغامق

++++

و كل اللي بيعمل كومننت و بيحب يعمل التاغ يعتبر نفسه متيغ او تعتبر نفسها متيغة