سان تريللا ..حبيبة التلفزيون

تنبية

لا ينصح بقراة هذا الموضوع للي عندهم فقر دم و صلع و تبول لا ارادي

**

كما قلت سابقا اني رح اكتب قصة سندريلا المطسّة

و كلمة مطسّة مشتقة من طسَ يطسُ

و بالانجليزي

Toss

يعني بالعربي سندريلا الملطشة اللي تركت كل الناس يلطشّوا فيها

و بما اني وعدت اكتب عنها

و بما انه موضوعها وجدت انه استنفذ من الكثيرين
سندريلا الفلسطينية و سندريلا العراقية و سندريلا التكنلوجية
ما ضل الا سندريلا بنت التلفزيون

اللي طول نهارها قاعدة بس بتتفرج عالافلام و الدعايات

**
سندريلا كانت بنت وحدانية
كانت حلوة تحل عن حبل المشنقة
(لو لحق شافها بس
امها يا حرام ماتت

ابوها صار بده يتجوز..قال عشان حدا يربي البنت

الحجج اياها

كان يوم بشوف قناة وسيط الخير و عجبته وحدة كتبت

"فتاة لم يسبق لها الزواج,مطلقة,ارملة,تجيد الرقص ,تقدس التنزيلات تود الزواج من رجل اعزب مطلق ارمل لا يهم العمر"

قال احسن من غيرها

و بعت للقناة و تجوز

وصلت العروس

عندهم خدمة التوصيل المجاني للمنازل

و كانت المفاجأة

كان معها بنتين

اتارية كان قي وقتها عرض خاص بالقناة
marry one get children free

قال مش مشكلة

بيلعبو مع بنتي

***

طبعا الاب دايما مسافر

اجتماعات و لقاءات

لحد ما يوم كان في مركز التجارة العالمي

بنيويورك

طبعا كلكم عارفين شو صار

لأ ما مات بالانفجار

كان عم بتفرج على دعاية ام اند امز
و جرب انه يعمل متل الشباب بالدعاية
و يلقط ال ام اند امز من بعيد
علقت ام اند امز صفرا بحلقه
و مات

سندريلا بكيت على ابوها كتير
بالاخر قالت ما الي الا شامبو جونسون: لا دموع بعد اليوم

و صارت تقضي وقت اكتر عالتلفزيون

ووزنها زاد كتير

و مرت ابوها قالت لسندريلا : هاتي هالريموت من ايدك

و ياللا عالمطبخ
سندريلا تحولت لخادمة في بيتها
و صارت مرت ابوها تتامر عليها
سندريلا صدقت انها خادمة و عاشت الدور

حضري الفطور
سندريلا:اوكي مدام
مرت ابوها: وين الفيلاديلفيا؟
ما فيلادليفيا ما في مصروف

**
اخوات سندريلا كمان كانوا ينادوها سان تريلا
لانها كانت تمشي بسرعة و تخبط اللي جنبها

في يوم قرأت عن الامير بالجريدة و انه بده يخطب

و قالت لازم اروح عشان يتجوزني

بدأت سان تريلا بالتحضير

صارت تستعمل فير اند لفلي لتنور بشرتها

و سانسيلك لتنعم شعرها المكنفش
استعملت كلين اند كلير
و قالت وداعا للرؤوس السودا

مع كل عجقتها نسيت تحضّر فستان

و صار يوم الحفلة و صارت تبكي و تشد شعرها

و تتمنى تظهر الها العرابة او الجنية لتساعدها

و فجأة ظهر الجني الاصفر

الذي يتحدى الملل

كان ناوي ينزل ضرب بسندريلا لانها فقعت قلبه

بس ترجتة يساعدها

قالها هاتي يقطينة عشان احولها الى عربة

قالت له:نحنا ساكنين بالطابق التالت ما عنا جنينة

قالها: طيب ما فيش معلبات؟؟

جابت علبة تونا

اكلها (كان جوعان

و قالها :عايز غيرها

جابت علبة كيوي(دهان للاحذية

و رماها بالشارع و حولها الى سيارة بيتل سودا

سندريلا:طيب و الفستان؟ بدك اروح بالجينز؟

الجني : ما قدرتش ادخل مكة مول لانه اليوم خميس وعائلات بس

جابلها فستان امه

اما الحذاء المشهور الزجاجي فما اجا على اجرها

كان ضيق شوي لانه اجرين سان تريلا كانوا 43

لبست بوط رياضة

و قال لها الجني الاصفر: المهم ترجعي قبل الساعة 12

قالت: بالله شو؟ اصلا المطرب ما بيجي قبل ال12

قالها الجني : ما ليش دعوة دي شروط نقابتنا

عايزاهم يفصلوني و اشتغل صبي قهوجي بمصباح قديم معفن؟

سندريلا: انتو عندكم نقابة؟

الجني الاصفر: ده وقته برضه..ياللا بسرعة

سندريلا (بدلال و غنج): ادينا مندردش ورانا اية ورانا اية

منحكّي و نفرفش ورانا ايه ورانا ايه

هنا اضطر الجني اسفا لضرب سندريلا

راحت سندريلا عالقصر لاقت الياب مسكر

اجا الشرطي: نعم ستي

سندريلا: انا جاي عشان الحفلة

الشرطي: ما في حفلات

سندريلا : حفلة خطبة الامير

الشرطي: كل الامراء هون متجوزين..مين انتي و مين بعتك؟

و ع الواكي تاكي: مشتبه بها عالبوابة الجنوبية حووّول

و اجت المخابرات و نزلت فيها اسئلة واسئلة... الذي منه

و رجعت سندريلا عالبيت تجر وراها علبة الكيوي

لقت الجني الاصفر قاعد لانه راح علية الباص..اشتغلت معه و صارت تتحدى الملل

***

طبعا في بالقصة عبرة و درس.متل باقي القصص

يا اللي قاعد قدام التلفزيون و بتحلم تربح المليون

حلمك بتحققه بالعمل مش بتغميض العيون

و انتي يا بنت لا تحلمي بأمير يكون فيكي مجنون

الامير مش فاضيلك ولا على حاله بمون