كابتن ابو رائد

فيلم اردني درامي

من تاليف و اخراج امين مطالقة

امين تعرفنا علية زمان من اكم فيلم قصير شفناهم و كانو كوميدي

متل لفي لفي, صفي صفي ,صليبا في الحمام, اخرس

بس هدا اول فيلم درامي مصور اله
الحلو بالفيلم انه مصور بالاردن

التصوير و الاخراج كتير حلو و في حرفية عالية
الموسيقى بتجنن ..بس مرات كانت تمللني

الفيلم حاز على جائزة افضل ممثل لنديم صوالحة بمهرجان دبي

و جائزة الحضور بمهرجان ساندانس الامريكي

*

القصة

ابو رائد رجل كهل بيشتغل عامل نظافة بالمطار

اولاد الحارة بيفكروه كابتن طيارة لانه بيلاقي طاقية كابتن و بياخدها معه

بيصير يحكيلهم قصص عن بلاد بتمنوا يزوروها و قصص عن التاريخ

ابو رائد كان الانترنت و التلفزيون لولاد زغار ما عندهم اشي يتسلوا فية غير كرة القدم

لا بلاي ستيشن ولا موبايل

يا دوب عايشين

و كان برضه الامل لمستقبل مش واضح ابدا

القصة بتتعرض بصورة مقتضبة لصور اجتماعية

اب سكرجي بيضرب مرته وولادها

اب غني شاف انه بنته قربت عالتلاتين

يعني بالنسبة اله عنّست بيصير يجيبلها عرسان

ام مغلوبة على امرها ضعيفة

عمالة الاطفال و كيف الاولاد اللي منشوفهم عالطرقات بيبيعوا علكة الهم طموحات

و بيحبوا يكونو بالمدارس بس الاهل بيدفعوهم للشغل

ولد و حلم بعيد انه في يوم يصير كابتن..

بس بيقول انا اصير طيارجي؟ اللي زينا ما بيصيرو طيارجية

عمان بجمالها.عمان القديمة اللي بيوقفوا سكانها و بيتطلعوا على عمان الغربية من بعيد زي الحلم

عمان الغربية بشوارعها و قصورها بس برضه اهلها عندهم مشاكلهم

الشخصيات

ابو رائد: نديم صوا لحة

من خلال التصوير الجميل مندخل بيت ابو رائد

بيت بسيط جدا بس بلحظة بتتعرف على ابو رائد من خلاله

بيته في كتب و هدا بقولنا انه انسان مثقف

بيحب يقرأ كتير

تذكارات من دول متعددة بتبين انه ابو رائد كان يحلم يسافر

و بتدل كمان انه ابو رائد انسان محبوب الناس بتهدية تذكارات

اشي من ايطاليا اشي من اليونان

و اللي بيدل على قناعة ابو رائد و رضاه بحياته اية قرانية " و اما بنعمة ربك فحدث"

ابو رائد بيسكن ببيت في القلعة بيشرب الشاي مع مرته المتوفية

لا مش مجنون بس حنون و كان يحبها كتير

بيته على بساطتة مرتفع و بيطل على عمان كله او بيحس انه طاير بالسما و هوة قاعد برة

نور

رنا سلطان

انا بعرف انه رنا مذيعة بس و الله انها امورة و شاطر و تمثيلها حلو

رنا هية كابتن طيارة

يمكن لو كانت مضيفة كان شوي الوضع مبلوع اكتر

بس اظن انه امين اختار بنت لتكون كابتن اله اسبابه

لو كان الكابتن شاب كان يمكن ما اهتم لابو رائد

او صار صديق اله

و كان ما تدخل بالطريقة اللي حدثت في الفيلم

(ما رح احكي خلية سيربرايز)

بالاردن في كباتن طيارة ستات بس مش كتير

نور بنت قربت عالتلاتين غنية كتير بيتهم حلو ابوها و امها بيحاولو يجوزوها بأي طريقة

بنت غنية بس بسيطة بتحس بالناس و ما عندها عنطزة و نفس محمضة..و كمان ما الها اصدقاء

يعني بلحظة تضايقت راحت لابو رائد

يمكن لانه بنات مجتمعها غير عنها

الاولاد الزغار

بيجننواعندكم طارق و مراد

البارزين

و كمان تلات ولاد و بنتين

البنتين يا دوب طلع حسهم

برضة رؤية.. كيف الاولاد بيلعبوا مع بعض و بيتركوا البنات صافين على جنب

الاولاد متل ما قلت مش مرفهين امنياتهم و احلامهم عى قدهم ما بتوصل انه يسافروا

امنية هلال اخو مراد مثلا انه يشوف المطار

بيعيشوا و بيحلموا مع ابو رائد

ابو رائد مع انه انسان حزين بس بيسعدهم و بيعطيهم امل و بيغير حياة بعضهم
ما رح احكيكلم عنهم عشان ما تقولو حرقتي الفيلم و يجي امين يطخني

عامل النظافة الجديد سامح

و هوة مثّل مع امين بالافلام القصيرة زمان

اضفى بعض الكوميديا على الفيلم

الظاهر اشتغل عامل نظافة لانه هادا الشغل الوحيد الي لاقاه

احلامه يفتح كافية بعمان و بيبع القهوة بتلات ليرات

يبصبص عالبنات من بعيد و ما بيسترجي يحكي معهم لانه عارف لو حكى شو بيصير

ابو مراد

سكرجي بيضرب مرته وولاده

بس في لمحة زغيرة لماتشوفو و هوة ببيع و ما حدا معبرة بتحزن علية

الاشياء اللي انا شفتها غلط بالفيلم

طاقية الكابتن بالزبالة

يعني انا اعتقد انه ممنوع اي كابتن او اي واحد بالجيش او الامن العام يرمي طاقيتة

.. فيها محاكمة ..بس منمشيها لامين معلش
الشغلة التانية :البنات بيروحوا عالمدرسة بمراييل

مش متل مراييل مدارس الحكومة بالاحرى بيشبهوا مراييل بنات الوردية زمان
ابو رائد بيلطش فرنسي و تلياني: ما بعرف هاي النقطة بالذات ما حسيتها واقعية

هلا لو ابو رائد من الناس اللي بيتعاملوا مع السياح بشكل مباشر متل اللي بالبتراء ..ماشي و عادي

بس المطارالي داخله مستعجل و اللي طالع منه مستعجل

يعني كيف لقط اللغة؟

السائح بيجي عالبلد و بيضل ساحب لبرة لانه في ناس بتستناه و مش فاضي يطء حنك مع عامل النظافة

اشي تاني

نديم صوالحة عاش معظم حياته بلندن و لغته العربية منيحة بس بتحس مرات ان حرف الار عندة مش عربي يعني في لكنة بسيطة

اخر شغلة

الاولاد كل الفيلم بياكلوا مستر تشيبس و بسكوت ايسبرغ

ما بعرف اذا صدفة او الدعاية مدفوعة

لانه بالافلام الاجنبية بتكون الماركات مخبية او بيخترعوا ماركة للفيلم

بس برضه مستر تشيبس مناخده من واقعنا اليومي

لو شيبس هلا معه او تسالي او لايز يعني ما بيكون واضح انه دعاية

المهم
الفيلم برايي الشخصي بيستحق المشاهدة لعدة اسباب

اولا :انه حلو

تانيا: انه من بلدنا وواقعنا و بين بيوتنا ما بتحس بغربة و انت بتشوفه

تالتا: نحنا منروح عالسينما عالطالعة و النازلة و قليل لنحضر فيلم يستاهل الخمس ليرات

ليش ما نشجع فيلم اردني و شاب اردني و ندعمه بلكي هالفيلم كان بداية لصناعة سينما بالاردن

نحنا عنا مخزون رهيب ممكن تنعمل منه افلام رائعة

ليش لأ ؟؟

و يصير عنا بدال هوليوود و بوليوود عمان وود

اماكن و اوقات العرض

االقيلم يعرض في سينمات غراند: زارا سنتر او سيتي مول

اوقات العرض

سيتي مول:

12

ظهرا2:30

5

7:15

9:30

11:45

مساء

زارا

الصبح 11

1:30

بعد الظهر

4

6:30

9

11:15

اسعار التذاكر خمسة دنانير و اللي بدو يجعص ورا بالاخر بيدفع ستة

(هدا بالسيتي مول
مشاهدة ممتعة مع تمنيات المنشر لامين مطالقة و طاقم الفيلم بالنجاح الدائم و الف مبروك الجوائز