حريقة في المنشر

و الحريقة اعزائي ليس سوى الدكتور حريقة الذي يطل علينا اليوم في برنامج

قلبي.. قلبي.. قلبي..

في لقاء حصري مع المنشر

حبيباتي المشاهدين

معانا اليوم في الاستوديو الدكتور حريقة اختصاصي في الامراض المعدية و الحميات

ملائط: اهلا و سهلا د. حريقة

حريقة: يا هلا

ملائط: يا ريت بكلمات بسيطة تقدم نفسك للمشاهدين

حريقة:إسمي حريقة وبالانغليزي هاريغا وبالمكسيكي خاريكا الفونسو عمري سبعة وعشرين ربيعا داخل عالثلاثين

ملائط: هل اقسمت قسم ابقراط اللي تعدل و صار اسمه قسم الطبيب؟

حريقة:آه أقسمت قسم السيد أبقراط اول ما خلصت لمّونا كلنا ووقف قدامنا العميد وحكالنا يلا يا أمامير إحلفوا وراي

ملائط:برايك اكم طبيب حافظ على هذا القسم و عمل فيه؟

حريقة: برأيي إنه معظم الأطباء كل فترة وفترة بخالفوا القسم خصوصاً هاي "وأن أوقر من علمني ، وأعلم من يصغرني ، وأكون أخاً لكل زميل في المهنة الطبية متعاونين على البر والتقوى" قال أكون أخاً قال!! كل دكتور ما بصدق يأسفن زميله... قال أخاً

ملائط:دراسة الطب صعبة شو اللي خلاك تدرس طب هل كانت رغبة عائلية ولا رغبة شخصية يعني في عائلات بيجبروا اولادهم عليها

حريقة: أبوي ما كان بدو اياني أدرس طب حكالي شو بدك تقعد اثنعشر سنة تدرس فيها لتصير دكتور وحالياً في السنة احدعش بلشت أقدر الحكمة من قوله لكني وقتها كنت شاب طائش مش عارف البلاوي اللي كانت عم تستناني بس حتى لو يرجع فيي الزمن مش راح أغير رأيي

ملائط:-شو كانت اصعب مرحلة بحياتك الدراسية؟

حريقة : أصعب مرحلة كانت سنة ثانية وثالثة وقتها بلشت أستوعب الفكرة إنو المرحلة القادمة يعني العشر سنين الجايات راح تكون مرحلة منيلة بستين نيلو وراح يكون فيها تضحيات و عرق ودم ودموع وصراعات بقاء

ملائط : طيب.. ليش اخترت تخصص الامراض المعدية او الحميات؟ فكرك بالاردن رح يعرفوا انت ليش فاتح العيادة ولا بتتوقع يجي يدخل واحد و يسالك انت شو بتبيع؟

حريقة : التخصص ممتع جداً جداً وللأسف في الاردن شبه معدوم لكن الأخصائيين في كل المجالات بحتاجوه.اكثير من الوفيات التي يمكن منعها وعلاجها تحدث بسبب إلتهابات في الدم أو الرئة أو الدماغ غير عن التهابات مرضى السرطان والحمة المالطية أو السل الخ الخ لا أعتقد إنه الناس في الأردن راح تفهم بالتحديد شو هالتخصص حتى عائلتي دايما بعاني وأنا بشرحلهم، في اميركا الوضع ليس مختلفاً، بشكل عام الأطباء يقدرون أهمية هذا التخصص أكثر من الناس

ملائط : شو رايك بالموضة السائدة بالبلد و هي انه المواطن بس يمرض بروح عالصيدلي و الصيدلي بيعالجه؟

حريقة: الناس بشكل عام بتكره تروح عالدكتور لأنها لازم تاخد موعد وتستنى ساعة عالدور وتدفع كشفية لذلك أسهلها تروح عالصيدلي وغالبا إذا المشكلة بسيطة ممكن علاجها بسهولة لكن الصيدلي ما بقدر يفحص لمريض أو يعمل فحص دم أو اشعة لذلك ممكن يكون التشخيص خاطئ تماما حتى لو كان الصيدلي شاطر، ياما شفت بلاوي لمرضى تعالجوا اعتمادا على تشخيص خاطئ وأحيانا أمراض زي السرطان بتسبب أعراض زي الحرارة البسيطة والصداع

ملائط: طيب و موضة الانتي بيوتيك اللي الناس بتببلبعة عالطالعة و النازلة يعني وحدة بعرفها مرة بتقولي اما شو هالسوبراكس منيح بس اخدت حبة مبارح صبحت منيحة ..فا بطلت اخده

حريقة: هاي مصيبة. لازم نفهم إنو البكتيريا ذكية جداً و بسهولة ممكن تشكل مناعة ضد المضاد الحيوي إذا الواحد ما اخدو بلشكل السليم بالاردن شفت أنواع فتاكة من البكتيريا كانت تقتل ناس يمين وشمال بسبب الاستخدام الخاطئ للمضادات الحيوية وكثيرا ما تكون اخطاء طبية في استعماله

ملائط : اخر فترة بالاردن انتشر مرض المونو نيوكلوسيس او كيسنغ ديسيز يعني هم بقولو عنه هيك لانه بنتقل باللعاب هل هذ مؤشر اخلاقي سيء ولا مؤشر صحي سيء ؟

حريقة : المونو مرض دراسته حلوة لأنه من الامراض النادرة اللي بتزيد نسبتها كلما ازددت نظافة المجتمع وغالباً هذا السبب في انتشاره لانه الشخص إذا تعرض للفيروس وهو طفل بتتشكل عنده مناعة والاطفال عنا لما نفحصهم بنلاقي إنه نصهم صار عنده مناعة مثلاً لما الطفل تيجي جدته وتلحوسله وجهه أو لما يلعب بالعاب كانو كل عيلته لاعبين فيها وملحوسينها بصير عنده مناعة من المرض

ملائط : يعني اول مرة بسمع عن مرض سببه النضافة..شكرا د. حريقة على هالمعلومة..يعني لازم الست تترك ولادها يلعبو براحتهم

ابقوا معنا

سنعود

بعد الفاصل

هذا البرنامج برعاية

دومينوز بيتزا
لقلبك


جبنة كيري
لتعزيز الدهنيات

اهلا و سهلا مرة اخرى و نذكركم ان معنا اليوم الدكتور حريقة

ملائط: نحكي شوي عن حريقة المدون .. هل تفكر بانشاء مدونة طبية شاملة ولا التدوين بالنسبة الك انك تبعد عن جو الطب و تفش خلقك

حريقة: لن أشكل مدونة طبية بصراحة انا صرت بلوغرجي للتسلية واحيانا طرح افكار ومشاكل ومتابعة ردة فعل الناس لها لكن احيان بدحش شوية طب

ملائط :هل برأيك انه الحادثة الاخيرة اللي صارت مع زميلنا المدون و اللي اثبتت انه التدوين صار اله صوت عالي رح تغير من نظرة الناس للتدوين و يصيرو يفكرو فيه و يعملولو حساب؟

حريقة: ممكن المسؤولين بدأوا ينتبهوا للمدونات شوي لكن أكثر من تسعة وتسعين بالمائة من الشعب الاردني ما بعرف شو هو التدوين فلساتنا في بداية الطريق. من المؤسف إنو كان لازم مصيبة زي هيك تصير عشان المسؤولين ينتبهوا شوي

ملائط : طيب بدون احراج و لو ما بدك ما تجاوب في عندك مدونات مفضلة ولا بتخش عالاغريغيتر و اللي بيعجبك بتقراه؟

حريقة: المدونات اللي حاطها عالبلوغ عندي شوي مفضلة لكن اكثر من نصف المقالات الممتازة بتكون من بلوغات ثانية

ملائط : الفيس بوك برأيك هل تأثيره سلبي اكتر من ايجابي؟ هل ساعدك انك تقترب من ناس زمان ما شفتهم ولا اضفته لقائمة التسالي

حريقة : الفايس بوك زيه زي أي ابتكار ثاني فوائده أو مضارة بتحكم فيها الشخص نفسه أنا النسبة الي كان الها فوائد بشوف صور العيلة والأصحاب عطول

ملائط : شو هوايتك المفضلة حتى لو ما بتلاقي وقت لممارستها

حريقة : هوايتي المفضلة متابعة وليست ممارسة كرة القدم وإذا عنجد في مباراة مهمة بلغي العيادة وبروح أحضرها بس بكون في دكتور تاني بغطي عني

ملائط: انا بعرف انك فيصلاوي ارجينتيناوي طيب لنفرض مثلا مثلا يعني الفيصلي لعب مع الارجنتين ..بقول مثلا. مين بتشجع؟

حريقة: سأتمنى للفيصلي الفوز ولن أتمنى للأرجنتين الخسارة

ملائط :حتى لو حاولت ..بس بما نك قلت الفيصلي اول معناتو دمك ازرق ....طيب ننتقل لمرحلة سابقة بحياتك

حريقة: فيش عندكو عصير .نشفتو ريقي

ملائط: طبعا..و ساندويشات كمان

.نتوقف مع الاعلان و نعود بعد قليل

مكدونالدز

مطعم الوجبات السريعة الاول

الشاطر يمسكنا

عــــدنا

ملائط: نحكي عن حريقة الشاب بعيدا عن الطب.. احلى ذكرى من ايام المدرسة

حريقة: بتزكر كان عنا مديرة مخيفة قد مية زلمة الكل يخاف منها ما كان عندها ولاد ...يوم عيد الأم كانت تلف علينا بالطابور وتبوس كل واحد فينا وكنا نحكيلها كل عام وانتي بخير

ملائط: حلو كتير.. بما انه جبنا سيرة المدرسة هل برايك انه الطالب المتفوق بالمدرسة بيكون متفوق بالحياة كمان ولا مش شرط

حريقة : الطالب المتفوق بالمدرسة عنده فرصة كبيرة يتفوق بالحياة بس لازم يختار شغلة بحبها عشان يكمل فيها حياته لأني بعرف طلاب أبدعوا باتوجيهي لكنهم اتبهدلوا بعدها لانهم درسوا ما لم يعشقوا الاشي الثاني الممكن يخرب عليهم هو الادمان مثل الادمان عالسهر او البنات او الشرب او حتى القمار والمخدرات

ملائط : طيب يا حريقة هلا انت بس تخلص دراسة بتصير عليك العين يعني بتبدا محاولات التزويج ..شو مشاريعك بالنسبة لهالموضوع

حريقة: :ما في نية اطلاقاً وهذا تحذير لجميع الفتيات إذا مثلا قلت لأ ي وحدة خلال الثلاث سنوات القادمات إني راح أتجوزك فراح أكون كذاب وعم باكل بعقلك حلاوة

ملائط : طب و نحنا لسة هون و قبل ما ننقل شو رايك بالبنات و الطب.يعني انت بتفضل تتزوج من طبيبة او تفضل تبعد عن المجال كله

حريقة: أهم إشي بالمرة تكون بنت حلال وهنية مش مهم شو بتشتغل

ملائط : برايك لو الزوجين اشتغلو بنفس المجال او نفس المكان بيكون اشي منيح ؟ انا برايي بيكون ممل جدا

حريقة : بتعتمد على الاشخاص في ناس ممكن يكونوا مسليين وين ما بروحوا بس بصراحة كل الأزواج بعد فترة معينة بصيروا مملين جداً لول أكلنا هوا سامحوني

ملائط : ما يهمك العرايس الي عنا جداد.. ايمتى اكتر مرة ضحكت فيها بحياتك يعني سخسخت ضحك

حريقة : أنا بسخسخ ضحك بسهولة وبغار كتير مرة صحابي قعدوا يغرغروني وأنا بسوق صارت السيارة تروح يمين وشمال وبتزكر بشيكاغوكان دكتوري ياباني محترم وقصير شوي رحنا نشوف مريض عنده انفصام شخصية كان المريض يحكي للدكتور اتطلع فوق ولما الدكتور يتطلع فوق يلطشه كف والدكتور يصير يهز يمين وشمال

نتوقف مع الاعلان و نعود كمان شوي

ملائط :نرجع شوي للطب..شو كان شعورك اول مرة شفت فيها جثة و قالولك تلمسها قبل التشريح

حريقة : شعور مش كتير لطيف كانو منبهين علينا ما ناكل من الصبح وانا دخلت على المشرحة لقيت الجثة مغطية واصابع إجرين مبينين قلت الله يستر، بس لما بدينا بلشنا باليد فقط وكانت مقطوعة عن باقي الجسم فما كان الوضع سيء للغاية
بصراحة رؤية بني آدم عايش بس شكله كأنه ميت أصعب بكتير من رؤية الجثة

ملائط : هلا انت كطبيب شرّحت ميتين و مسكت جروح و ابر و الله يعلم شو كمان شو الي بيخوفك ..غير السحالي

حريقة : في سنة ثانية بالمختبر كان علينا نقطع راس ضفدع ونفحص نخاعه الشوكي والمشكلة إنو الضفدع بضلو عايش حوالي دقيقة دقيقتين بعد ما نقطع راسه. بالامتحان طلعلي إنو اشرح الضفدع فقطعت راسه بعدين الحيوان صار يحرك إجريه وصار ينط على الأرض وهرب مني أنا قلت خلص سقطنا بالامتحان راح أعيد السنة بس واحد من المشرفين عالمختبر جابللي ضفدع مشرح من اليوم القبل واعطاني إياه أمتحن عليه. طبعاً شكرته وبحرارة وقلته بنردلك إياها بالأفراح

ملائط : يعني بخاف من الزواحف الخضراء..طيب نحكي عن مشاريعك بعد التخرج..عيادة خاصة ولا مستشفى؟ طبعا انت عارف العيادات الخاصة و شغل المافيات و كيف بيلقفوا المريض لبعض

حريقة : بفضل أشتغل في مستشفى تعليمي لأني بحب أعلم خصوصاً إنه التعليم الجامعي عنا متدهور ومزبوط شغل المافيا هادا موجود بأميركا كمان ومسؤولة عنه شركات التأمين الطب صار فعلا تجارة لكن معظم الأطباء ليس لديهم اي خيار لانه الشركة بتقلهم إذا بتعالجو المريض ببلاش أو بتحولوه على دكتور مش من جماعتنا بدكو تدفعولنا كشفيتو من جيبتكو

ملائط :ممكن انك تعمل يوم بالاسبوع مجاني للفقراء ولا بتحس انه الناس رح يستغلوا الموضوع و يفشل

حريقة : إذا بعملو يوم للفقراء فراح ييجي الغني يصف المرسيدس برا ويقلي تعال عالجني ببلاش لكن أعتقد إنه واجب علي وليس فضل أن أخدم الفقراء في بلدي ممكن اروح على مكان فعلا فيه فقراء واعمل عيادات مجانية بس انشالله ما يلحقني الغني بالمرسيدس تبعه

ملائط : و اذا اجالك واحد و قالك انا زميل مدوّن بتعالجة ببلاش؟

حريقة :ولا ببلاش و لا سخام بيصير المريض قبل ما يجي يفتحلو مدونة على بلوجر و يقولي انا زميل بس اذا صديق و بعرفه من زمان ف اه بعالجه ببلاش

ملائط : اوصف لي بالزبط شعورك لما عرفت انه الشاورما منعت بالاردن.. لانه من المعروف انك من المؤيدين و بشدة للشاورما و خصوصا ريم

حريقة :ليش فتحتي علي المواجع كان من أسوأ الاخبار اللي سمعتها وخلتني أفكر اشتري شاورما بالجملة من أميركا وابيعها بالاردن

ملائط: هلأ هلأ و انت معانا شو اكتر اشي مشتاقلو بالاردن(غير اهلك و الشاورما

حريقة :أقعد مع صحابي بكوفي شوب واحضر مباراة فوطبول

ملائط : طيب سؤال اخير ..شو رأيك بالمنشر؟

حريقة : بلوغ طقع ويمكن اكتر بلوغ عربي واردني فيه ابتكارات وافكار جديدة كل إشي فيه جديد ومدروس باستثناء هالموسيقى أم الخمس ثواني اللي بتطلع أول ما أفتح عالبلوغ بصير معي احتشاء في عضلة القلب كل ما اسمعها

ملائط : سلامة عضلة قلبك ..هاي الموسيقى انا نقزتني اول مرة سمعتها.و قعدت ادور الصوت من وين طالع..ولا هو موضوع في لعبة الغرفة الحمرا هلا ما راح تسمعه لانه الموضوع صار عالصفحة التانية و شكرا كتير على عالمقابلة الممتعة و على وقتك و على اجاباتك... خصوصا الاخيرة

تمنى لك كل النجاح بحياتك و نتمنى لما نيجي عندك تتزكرنا و منحب نقدملك هدية رمزية من المنشر و قرائه

اعزائي

و شكرا لكل وحدة وواحد اخد من وقته و قرا كل الموضوع

و الى لقاء اخر و حلقات اخرى