اول انجيليش اول زا تايم

مش قادرة اقاوم اني اعرض هالدعايات لميلودي تونز

مع اني بفضل الافلام الاوريجنال انتاج المنشر

بس قلت يعني اللي بيضحك لحاله بيتشردق

Dont you wish your girlfriend was hot like me??





OooOps!! he did it again

Smack that

هوة الولد تبع شخبت شخابيت

طبعا في كمان كتير بس ما حبيت يصير المنشر بطيء التحميل
انجوي

الشاطر يطلع من هون

تسالي لعطلة نهاية الاسبوع

هاي اللعبة اللي قلت لكم عنها

هاي غرفة و انتو محبوسين

كل واحد محبوس لحاله طبعا

عشان اساعدكم تطلعوا

بتفتشوا على اغراض بالغرفة و بتحطوها على جنب

لازم تلاقو تلات مفاتيح

بطارية

كاسيت

علبة حمرا لتشغيل الكاسيت

حلقتين كل وحدة مرمية بجهة

شقفة زغيرة حديد...بتلزم

و بعدين عشان تفتحوا الباب لازم تفتحوا الخزنة

رح يساعدكم واحد بيرقص لتفتحوا الخزنة

الخزنة الها رقم سري

الرقم موجود على ورقة بتوصلولها من خلال الموقع الموجود عالورقة

و بما انه الموقع واقع و ما رح تستفيدو من الورقة بشلن

و بما اني متزكرة الرقم السري من زمان

رح اعطيكم اياه

الرقم هوة

1994

كل واحد يجرب

و غوود لاك

Crimson Room Can you escape the mysterious Crimson Room? An awesome flash game, hailed as possibly one of the best of all time.

الحل

حلقة في الصحن جنب السي دي بلاير
الحلقةالتانية لما تكبسو عالبرداية كزا مرة بيوقع عالارض
مفتاح تحت المخدة
مفتاح تاني على حفة الشباك
في 4 جوارير تنين منهم مفتوحين و اتنين مسكرين
مفتاج بيفتح جارور و بتلاقوا فية كيبل لتشغيل السي دي و هناك بتلاقو المفتاح التالت
طبعا لازم تشغلو السي دي
الجارور التاني فية علية حمرا
هاي العلبة بنحط عليها من برة الحلقتين كل وحدة بمحلها
و عصاية حديد زغيرة بتلاقوها لما ترفعوا المخدة بتكتبسو على المنطقة بين الفرشة و الهيد بورد للتخت
العلبة الحمرة بتفتح بس انتو بحاجة لبطارية
البطارية بتلاقوها لما تكبسو على التخت من تحت ناحية المنطقة الليلكية
و طبعا لازم كاسيت لنشغله
الكاسيت تحت الدريسر او قطعة الاثاث الي نسيت اسمها و فوقها السي دي

شغلنا الكاسيت
بيطلع بروجيكتر لواحد بيرقص
لازم تستنوا ليخلص بون ما تكبسو اي اشي
باخر الرقصة بيصير يأشر على نجمة بتتركوا الماوس شوي هناك يعني تكة بس
و كليك بسيط
بتلاقوا الخزنة
بتكبسوا عليها
ولازم تحطوا الرقم السري اللي هوة مفروض انه على ورقة مكوب عليها ويب سايت بس الرقم هوة 1994
بتفتحوا الخزنة بتلاقوا مفك
بتخلعوا الباب و بتطلعوا
,,,,

اسفة للصوت اصلا انا ما كنت اعرف انه الها صوت الا لما نزلت هون و نئزت و انا بقول المنشر انسرق و صار ديسكو

لو مزعجكم قولولي

كرهتك يا حبيبي من ريحة رجليك

كرهتك يا حبيبي من ريحة رجليك

استعمل يا حبيبي البودرة و الفنيك

هتروح الريحة حبة

و يمكن تستخبى

و يومها يا حبيبي يمكن

يمكن اعود اليك

بعد قراءة ابيات المعلقة المشهورة

بكل فخر و اعتزاز يقدم لكم المنشر تاغ الروائح

برعاية شركة نريات للحوم البلدية

و شركة براء للعصير

و بما ان المنشر عودكم على المتعة والفائدة

فسوف نقدم لكم ايضا موضوعا هاما عن الروائح فانتظرونا

المطلوب في هالتاغ ان نخبر الجميع بالكلمة و الصورة (اختياري) ما احب الروائح الينا

في احلى من ريحة رقبة البيبي لما يكون صاحي من النوم ؟

على شرط ما يكون عامل عملة سودا طبعا يكون متحمم

ولا ريحة الفلافل و هية تنط من يد العامل في حركة بهلوانية اولومبية و تتطش في المقلي و تعمل فششش

ريحة البحر في الليل او الصبح قبل ما الناس و يجو يخلطو مية البحر بمياه اخرى(بضم الالف او بدون ضم)

الشاي بالنعنع بس ما يكونش النعنع مغلي مع الشاي ..يكون نازل بكل حنان في الكباية و مستقر بكل ثقة على وجه الشاي

ريحة الخبز اول ما يطلع من الفرن او بعد بشوي(اول ما يوصل عالبيت

طبعا اولا و اخيرا و ابدا

ريحة الغسيل النضيف

لما ينلم عن المنشر و يكون المنشر لفحته الشمس شوي

طبعا هذه الفئة تضم كل انواع الغسيل بس على شرط يكون مغسول منيح مش اشطف و ارمي

اكيد ممكن اكتب للابد

لانه الروائح المحببة كتيرة بس بما انه اكتشفت انه معظمها اكل قلت بلاش يقولو عنك فجعانة و همك ع بطنك

الملوخية لما تتغلغل في ثنياتها التومة وورق الدوالي لما ينزل من الطنجرة ورا الكوسيات و يفرد عالصينية بكل رقة و دلال

ريحة الكلمنتينا اول ما تمزع عنها القشرة

كنت اتمنى يكون في سوفتوير يوصلكم الروائح

يمكن كمان اكم سنه ينزل هيك اشي

و يمكن على قد ما ننبسط نزعل

تخيلو يعني واحد مش متحمم من اكم يوم و قاعد بكتب جنب الشباك

و الهواء عليل(هون عليل يعني مريض من الريحة

و السوفتوير شغال

او ماكل فلافل عالفطور و مجدرة عالغدا ..و السوفتوير شغال

الحمد الله انه السوفتوير لو نزل رح يكون في اوبشن : اوف..

حاسة الشم الها قدرة لترجعك سنين لورا..بتضرب على وتر الذكريات على طول

يعني لما تشم ريحة الاسكيمو الاحمر ابو كف

و ترجع بذكرياتك الى ايام الحارة

و اللعب و انت حافي بالشارع

يا سلام

ولا تشم ريحة اول عطر استعملته بحياتك

عطر كروان من سقف السيل

او تشم ريحة منسف تلوح في الافق فتتدفق مشاعرك و تدمع عيناك

او تشم ريحة البصل الني و تتذكر اول بنت حبيتها و تتذكر ليش تركتها و تشكر الله على نعمة النسيان

في روائح تعيد الذكريات و روائح تزيد التركيز مثلا و روائح تنبهك لخطر محدق

متل ريحة الغاز و ريحة الطنجرة بتنحرق عالنار بعد ما تكون الحرمة التهت بمسلسل مكسيكي عالتلفزيون

روائح بتنبهك ما تسرع و تشفط بالسيارة متل ريحة الجلد و السيارة لما تكون جديدة

بتخاف تشطبها مثلا

اشكر نريات و براء على هذا التاغ الممتع

و انا بدوري و من موقعي هذا ادعو كل من

سمر الحلوة

بكوز العظيم

المشاغب حميدي

عبد حمدان

وندرز

حسين المعروف بأسم هو-سين

ابو الشريف المعروف باسم شريفو ملك البطاطا

sel3

شروط التاغ كما وردت من المصدر

1. link to the one who Tagged you

2. Type at least 5 Smells you like

3. Tag at least 3 :)

4. Any language :D

5. Photos is an option

بلعربي

بدك تحط وصلة اي لينك للي عبرّك و تيغك

تكتب على الاقل خمس روائح بتحبها

تبلي كمان على الاقل تلاتة بهالتاغ

تستعمل اي لغة مقروءة مش ياباني يعني

الصور خيار و ليس فقوس

كمشة افلام _ريفيو

صباح الخير

مجموعة افلام منها لسة بصالات العرض و منها نزل و طلع غيره

منها ما يعتبر افلام رعب _ مع انه ما في اشي بيرعبنا حاليا

و منها مصنف كوميدي _مع انه صار صعب نضحك

بدون مقدمات زيادة خلينا ندخل بالموضوع

نبدا بالكوميدي_عشان ما تقولو المنشر يروج للرعب

license to wed

بالعربي "معه رخصة يزوج

الفيلم لروبين ويليامز من الممثلين اللي بحبهم كتير و طبعا لما تحب ممثل بتتوقع منه كتير

بس الفيلم للاسف ما وصل لحد التوقعات

الفيلم رومانتيك كوميدي عن اتنين بحبوا بعض و بيقررو يتزوجو و العروس (ماندي مور)

تصر ان يتم الزواج في كنيسة اللي تزوجو فيها اهلها و اللي مسؤول عنها القس روبين ويليامز

هلا لهون منيح

بروحو للقس اللي يصر انهم يدخلو اكم امتحان لاثبات انهم قادرين على حياة زوجية و عشان يطلعهم من وهم الحب و الغرام و يورجيهم انه الزواج اشي مختلف تماما

طبعا بيدوخهم و طلباتو ما بتكون سهلة

ما راح اخرب الفيلم و اقول شو بيصير بس طبعا انتو اذكياء و عندكم فكرة هاي الافلام كيف بتنتهي نهايات متوقعة جدا

برايي الفيلم بايخ جدا ولا يليق بمستوى روبين ويليامزولا تاريخه العريق بالكوميدي

ممكن اله رساله :و هو انه الزواج مش لعبة اتنين بحبوا بعض و فية مسؤوليات كتيرة

****

الكوميدي التاني

I now pronounce you chuck and larry

بالعربي

اعلن انكم الان تشاك ولاري اي زوج و زوجة كما هو المفروض بهيك اعلان بعد اتمام الزواج

بس العرسان زلم يعني رجال

تشاك هو ادم ساندلر و لاري هو كيفن جيمس

(اللي بيمثل كنج اوف كوينز و مثل في هيتش)

تشاك و لاري اصدقاء بيشتغلوا سوى في اطفائية

تشاك يعتبر من الشباب الحلوين بالفيلم و البنات حوالية بالكوم و لاري متزوج و عنده طفلين مرته ماتت من سنه

ولانه بحبها اكتر من كل شي بيرفض يتخلى عن اي اشي بيخصها و كمان ما بيفتح اي مكتوب موجه الها و هيك

بيروح علية مكتوب من مكتب التقاعد عشان هية المستفيدة الوحيدة في حال وفاته و بيضل قدامه اما انه يتزوج

عشان مرته الجديدة تحافظ على التقاعد او يخسر كل شي و بما انه رافض لفكرة انه اي ست تحل محل مرته بيعرض على صاحبة تشاك انه يتظاهرو انهم شواذ و يتزوجو و طبعا طول الفيلم بيحاولو يثبتوا هالاشي للحكومة

الفيلم مش حلو ابدا كفكرة

في دفاع عن الشواذ و حقوقهم و بتشوف انه حتل باميريكا مش مقبوله هالفكرة

الفيلم غير منطقي لانه معظم الاحداث بتتم امام اطفال لاري و ما اظن انه حتى باميريكا هالحكي مقبول

الاشي الوحيد الايجابي ومتل ما انا شفت انه لاي درجة ممكن صديق يضحي من اجل صديقه

كفيلم كوميدي ممكن تضحكوا شوي

****

الي بعدو

The simpsons

شفت كتير مدونين كتبوا عنه ما راح اطول عليكم

ممكن تقولو الفيلم عبارة عن حلقة سيمبسون مطولة شوي

ما في اشي جديد

هومر و انانيتة و فجعه و اهمالة يؤدي الى تلويث بحيرة سبرنغفيلد مما يدعو الحكومة و لجنة محافظة البيئة انهم يحطوا قبة كبيرة زجاجية حول سبرنغفيلد لمنع انتشار التلوث و السيمبسونز بيطلعوا بطريقة هبلة و بيصيرو مطاردين

الاشي اللي ممكن يكون ايجابي بالفيلم هوة علاقة بارت ب هومر اللي منعرف انه اساسها الخنق و البهدلة الدائمة و كيف بارت بيحزن بالفيلم بيحاول يعمل من جارهم فلاندرز اب اله

وكيف مارج كزوجة مكن تعمل اي شي عشان زوجها و لو بتعتبره مش صح

***

shrek the third

هدا فيلم انا حبيته كتـــــير

شريك بيموت حماه(الضفدع هارولد

و بيتركله مملكة يحكمها ولانه شريك حفرتلي و مش تبع هالشغلات بيروح يدور على ملك تاني

مرته فيونا بتطلع حامل و منشوف شريك خايف كتير من هالمسؤولية

يعني شريك ما بقدر يتحمل مسؤولية اشي

الفيلم حلو و بيعطيكم فكرة عن الجانب الاخر من القصص الخرافية

جانب الاشرار و شو شعورهم و كيف انه سندريلا و رابونزل و سنووايت و الاميرة النائمة حتى لو كانو بطلات القصص القديمة هم بنات سخيفات بتكرهوهم بالفيلم

بيزبطوا وضعهم بالاخر و بيتخلوا عن فكرة الاعتماد على الامير لانقاذهم

اظن هدا الفيلم مع انه فيلم كرتون فيه عبر و افكار احسن من افلام كتيرة

الفيلم باصوات مايك مايرز,ايدي ميرفي,انتونيو بانديراس ,كاميرون دياز و جولي اندروز

***

نيجي للرعب

الي بيخاف ما يكمل

ولا اقولكم كملو

***

1408

هدا اسم فيلم

البطل جون كوزاك

بتموت بنته بهظاك المرظ

و بيتعقد و بيصير يحاول يتصل بعالم الاشباح و بيكتب كتب عن هالمواضيع

مع انه مش مقتنع انه الاشباح موجودة

بيسمع عن فندق اسمه الدولفين و انه في غرفة ممنوع حدا ينزل فيها

طبعا لانه دقر و بيموت بالجكر بيصرلازم ينام بالغرفة

مع انه سامويل جاكسون(بيكون مدير الفندق و مسكر الغرفة لمدة 20 سنه ) بيقولو يا زلمة بلاش

ولا يمكن... راسه زي الحجر

يا بني ادم ما راح يكون معك وقت لتندم

فيش فايدة

قاله ولك هاي الاوضة مات فيها 56 واحد

طبعا اصر اكتر لانه معتقد انها خرافة

طبعابنزل بالاوضة

اللي رقمها 1408

و طبعا متل ما بتعرفو الاوتيلات بتشائموا يكون عندهم طابق 13 ف بتلاقي الطابق التلاطعش بيسموه رقم اربعطعش بس فعليا هوة تلاطعش و ما تنسوا انه لو جمعتوا رقم الغرفة 1408 بيكون 13..شوفو التشاؤم

و بتبدا معه احداث غريبة عجيبة و بيشوف ناس بينتحروا و بيموتو قدامه و طبعا الخروج من الغرفة مستحيل\الفيلم حلو انا عجبني كتير

الفيلم عن قصة قصيرة لستيفن كينج و قبل هيك كتب هالقصة اتش جي ويلز و كان اسمها ريد رووم او الغرفة الحمراء

انا بتزكر كان في عالنت لعبة اسمها ريد رووم حلوة كتير لو لقيتها بعطيكم لينك تتسلوا

*****

Dead Silence

او بالعربي

الصمت المميت

او اذا بتصيح بطير لسانك..و اللي بيشوف خلقة هالحرمة و ما بيصيح بيكون بطل

فيلم عن اسطورة سيدة كانت زمان تحرك الدمى و بتحكي من بطنها

يعني

ventriloquist

و اسمها ماري شو

بتعمل عرض و بيجي ولد بيقولها: حركتي شفايفك انا شفت

و الله ما يحطكم محله

الحرمة بتبرقلة بعيونها

و اللعبة الي معها و اسمه بيلي بيصير يخترف و يبربر و الولد المسكين بعد اكم يوم بيختفي و ما بيلاقوه

المهم بيتهموها بقتلة و بيروحو بيقطعو لسانها و بيقتلوها

هية بيكون عندها 101 لعبة بيدفنوهم جنبها

بتحلف لترجع و تقتل كل واحد من عيلة الولد مايكل

بعد ستين سنه بترجعلهم

شوفو الحقد..... انا من اول قلت هالولية عندها مشاكل نفسية

بيورجونا بطل الفيلم و هو اخر واحد بالعيلة و بتكون مرته حامل و بيوصلهم هدية اللعبة بيلي

اللي مفروض انه مدفون

و بتموت يا حرام و بيروح لسانها و بيبدا زوجها التحقيق و بيرجع لبلده و هناك بيلاقي البلد مهجورة ما عدا ابوه مرت ابوة العروس الحلوة و الزلمة المسؤول عن الدفن و مرتة الهبلة اللي بتضل تحكي لحالها

طبعا متل كل فيلم امريكي بتلاقي شرطي لاحقة هيك لحاله من راسه عشان يمسكه و ما بيكون مصدق قصة ماري شو و بيتهم الزوج بقتل زجته

الفيلم حلو

ما راح اكمل عشان ما تقولو خربت و حرقت الفيلم

احلى اشي بالفيلم صوت الهدوء

نعم

الهدوء اله صوت

صوت مخيف

بس تزكرو

اذا خفتو

لا تصرخو

لانه اذا صرختو

بينقطع لسانكم

________

beware the stare of mary shaw

******

في افلام كتيرة ما راح اكتبها لانها زنخة متل جورجيا رول لجين فوندا و لينزي لوهان و فيليستي هوفمان

فيلم عائلي ستاتي حريمي ما في اي مفاجات

المخرجين انبسطوا انه جين فوندا رجعت تمثل و بتكون جدة لينزي لوهان البنت اللي كل مشاكل العالم فيها و اللي

امها بترميها عند جدتها و امها فيليستي هوفمان و اللي اصلا ما بتكون تطيق امها حالها متل حال كل الاميركيات

بالافلام

اقول كمان افلام ولا بيكفي

اظن بيكفي

و يعطيكم العافية اذا وصلتوا لهون بالقرأة

قصة صحيفة الدستور المصرية

كان يا ما كان في قديم الزمان و سالف العصر و الاوان ..... كان في بنت اسمها تررررم ضحكتها مش طبيعية

لا غلط
هديك قصة تانية

كان في 6 مدونين قاعدين لحالهم كافين خيرهم شرهم و مش بلشانين بحدا

يعني زي ما تقولو ماشيين الحيط الحيط و بيقولوا يا رب الجاكيت(السترة بمعنى اخر
عيلة زغيرة اخوة و خوات

كانت سمر و نريات و ملائط بالمطبخ بحضرو للغدا

و قالو لمحجوب يجيب فراخ م الجمعية

و احمد يجيب زيت سيارات للطبخ

و موفق راح يجيب ربطة خبز

دق الباب

موسيقى تصويرية من فيلم سكريم

راحت سمر فتحت ولا بوجها هالايميل

الايميل من صحفي مصري اسمه علي عبد المنعم يعمل بجريدة مصرية اسمها الدستور

الظاهر يا اخوان هالجريدة محبوبة بمصر و مشهورة بين القطاع الشاب و فيها صفحة مخصصة للمدونات و الصحفي قال انه معجب بالمسلسل و بدو يكتب عنه

موسيقى تصويرية من فيلم ميشين امبسيبل

الكتاب في الحقيقة ابتهجوا و انشكحوا يعني شفت و حدة منهم بترقص بريك دانس و اظن كانت سمر لا لا كانت ملائط _للدقة و المصداقية

راحوا بعتولو متل ما طلب كلام عن المسلسل و كيف بدا و احلامهم و امنياتهم و هالحكي صار على مدى ثلاثة اسابيع يعني مش سلق بيض

الصحفي كتر الله خيره ما صدق وصلو الاميل و شكلو كان هوة يرقص بريك دانس كمان لانه ما قرا الاميل منيح ولا دقق بالمسلسل

و راح نشر بعد ما استنتج بطريقتة الخاصة

موسيقى من دعاية سنسيلك
و شوفو العنوان : حياتي دوت كم مسلسل يكتبه 8 مدونين ما تخش تشارك معاهم

ملاقط: الهدف من المسلسل هو ارساء ثقافة العمل الجماعي لدى المدونين العرب .. لان اغلبهم لا يهتم سوى بمدونته

اي موسيقى تصويرية من سي دي خربان

شو هالحكي يا ملاقط ...عيب

للعلم فقط ملائط_ او ملاقط كما يحلو للبعض ان يدعونها_كتبت عن المسلسل و اخذت مقطع من لقائها مع دون عن كيف بدا المسلسل بتقدرو تقراوه هون (يعني مش رح تغير حقائق ووقائع قالتها قبل

هية هناك ما قالت هالحكي بس هوة بذكاء لماح فهم اللي ما قالته و كتبه..الله يسامحه بس
بعدين بيجي شوية كلام و اخبار عن المدونين و مين هم ..طبعا الاغلاط واضحة متل ما شايفين

دوّن استضافت المسلسل قبل نشره و ليس بعد

حسام بطل المسلسل اردني مش مصري

و نعيم بيغار من حسام مش العكس

و سمر مدونتنا الحبيبة اردنية و ليست لبنانية

يعني سمر سمعت هالسمعة صارت تقول: يا دلي يا دلي لك شو هيدا

عاشت الدور

اما ملاقط فحياتها لا تتشابه مع حياة داليا

انا بعرفها معرفة شخصية صدقوني

عمرها قالت اشي عن حياتها اصلا عشان يقرر هالحكي؟

عمرها قالت انه حياتها بتشبه داليا باي اشي؟

او اي حدا

يعني ياجماعة كل الناس بيفكروا انه اذا حدا كتب عن اشي بيكون تجربة مر فيها

معنى هالحكي ان شكسبير قتل عمه و نجيب محفوظ اشتغل فتوة

مع كل الاحترام و بدون تشبية طبعا لكاتب كبار بس لتوضيح الفكرة

طبعا في النهاية كتب رايه الخاص بالمسلسل الذي لم يقراه

يا حبيباتي الكتاب ما قالوا انهم مثل اسامة انور عكاشة و لا احسان عبد القدوس و انتو عارفين كويس كيف بدأوا

و شو صار

و في منكم ناس متابعين و لو ما بيكتبوا

على كل : كتاب المسلسل _و بالرغم من كل الاغلاط اللي اكيد مش مقصودة _يشكرون الاستاذ علي عبد المنعم على اهتمامة بالمسلسل و يتمنون الا يكون هالاهتمام لسد فراغ بجريدته

****

المشهد الثاني

بعد اكمن يوم و الاخوة الكتا ب قاعدين بحضرو توم و جيري و لا دق الباب كمان مرة

قامت سمر تفتح الباب و ايدها على قلبها

(هية ايدها كانت على جيبتها لانه ملائط كانت عينها على شوكولاته جالاكسي معها

و لا عالباب ايميل تاني من صحفي تاني لصحيفة مصرية جديدة الكترونية معجب بالمسلسل و بدو ينشره على صحيفتة اسم الشاب : كريم علي و اسم الجريدة الاكترونية المصري

واليوم نشر ملخص نفس الكلام اللي بعتوه لعلي عبد المنعم (يعني مش رح تتغير الحقائق

فقام الاستاذ كريم بنشر ما وصله بدون تحريف او اضافة و سيبدا بنشر حلقات الموسم الثاني بعد نشر ملخص الموسم الاول..الكتاب بيشكروا كريم على اهتمامه و بيشكرو مجلة المصري كمان

و توتة توتة و ما اظنش خلصت الحدوتة

و هيك يا حبايبي منتعلم من هالقصة انه ما نفتح الباب بدون ما نسال مين برة و انه لازم نسمع كلام ماما و بابا و ملائط و كمان منتعلم انه زيت السيارات انضف من زيت مازولا

و ضحكت .....يعني قلبها مال

ضحكت يعني قلبها مال

وخلاص الفرق ما بينا اتشال

يلا ياقلبي روحلها يلا

قلها كل الي بيتقال

مستني ايه بعد الضحكة

دي الضحكة فاتحالك سكة

مش هيا دي الي انت عاشقها

وبقالها ياما شاغله البال

و بقولولك الاغاني الشبابية هابطة
كل اغنية بحصة في المدرسة

الاستاذ عمرو دياب بيقولكم (بدون ما يقصد ) يا بنات انتبهوا

انتبهوا قبل ما تبتسموا

لمين رايحة الابتسامة لانه ممكن تنفهم غلط

ممكن تقولو شو يعني حرام نبتسم او نضحك؟

لأ طبعا

بس نعرف متى و كيف

و لمين

اافف

صارت الابتسامة هيك مصطنعة

بطلت طالعة من القلب

بس شو نعمل اذا عمرو بنفسه بيقولك ضحكت يعني قلبها مال

يعني مصيبة هالحكي

معقول كل ما ضحكت بنت لشاب يكون قلبها مال

؟؟؟؟؟؟؟؟

بس برضه

متل ما قلنا زمان : البنت بتقرر الشاب كيف يعاملها الشاب

هية بتقرر نوع العلاقة او اصلا اذا في علاقة

هية بتقرر كيف يتصرف معها

كيف يحترمها او لا

يتطاول بالمزح او لا

يتطاول بالكلام او لا

الشاب متل اي ذكر في الكائنات الحية

ممكن يلاحق الانثى

بقول ممكن لاني شايفة الموازين انقلبت شوي بس خلينا بالتقليدي

مبارح شفت بس اسمراني مونَس لاحق بسة

و قتل حاله وراها ما طلع بايدو اشي

تاني يوم شفتها مع بس اشقراني

طلع مش ستايلها الزعرة ..و ك بسة بتعرف كيف تتصرف ..بعدته عنها

و هيك الحال منذ بدء الخليقة

الانثى تقرر من تختار

و عمرو دياب بقول الضحكة فتحالك سكة

يعني عطتة وجه

على فكرة اول ما سمعت الاغنية فكرتها اغنية تامر

سيب الحب لناسه

هون بهالمقطع

مشتاق ايه يا بو شوق ما تروق

ما تصحصح حبة و فوق

انت قابلت الخير بالسوء

دلوقتي تعلم دوق

نفس الجملة الموسيقة

سرقة الالحان مش موضوعنا بس اجا عبالي احكي

انجوي

لمدونات خضراء..انتخبوني

صباح الخير

شوفو...بدون لف و دوران

بما انه راحت علي انتخابات البلديات

و لاني بغار من ايمان و سحر و عامر و جميل و انا بشوفهم

بيطلوا علي من ورا عمدان الكهرباء

فقد توكلت على الله و قررت ان ارشح نفسي للانتخابات النيابية القادمة عن الدائرة التدوينية الثالثة

و بما انكم اصدقائي (المفروض يعني

اتوجه لكم و

اتوسل اليكم

و مشان الله انتخبوني
*****

البرنامج الانتخابي حسب توقيت السعودية

حبوني و انتخبوني

شوفو ما احلى شعري

و ما انغش عيوني

مرشحتكم عن المدونات الاردنية

المرشحة المستقلة
مرشحة عشائر بلوجر الجنوبي
مرشحة عشائر وردبرس الشمالات
مرشحة البادية التدوينية للقوالب الحرة المستقلة

مرشحتكم في الوطن و المهجر

المرشحة الوحيدة

المرشحة العنيدة

المرشحة التي لا تقبل التهديدا

*****

برنامجي الانتخابي

لمدونات خضراء..انتخبوا ملائط

و اعدكم اعزائي بما يلي

الدعم المطلق لكل مدون و مدونة في حالة الاعتقال

و ذلك بوضع البانرز المؤيدة
بانر مايل و عرضي و ممكن بانر نطاط

اللفلفة على المدونات لتفقد احوالها

ايصال صوتكم الى البرلمان و البلديات و المحافظات باستعمال ميجا فون اصلي ياباني

تكييف مركزي لكل مدونة

اشتراك اوربت و اي ار تي رياضة لكل مدون

اقساط شهرية ميسرة لشراء فيلا الاحلام


و اعدكم ان ادعمكم جميعا و ارفع من عدد زواركم

و ان اجعل مدوناتكم في الصفحة الاولى من غوغل

كما اعدكم ان احسن من وضعي الاجتماعي و ان اشتري سيارة جديدة لنغ و فيلا مع مطب و حارس

عشان بريستيجكم مش عشاني

و ان اكون اول المسافرين في اية بعثة و اول الحضور في اي حفل

و اول الطابور على اية بوفية

مميزاتي

حائزة على الحزام الفوشي برمي و التقاط منافض السجائر الطائرة

يعني ما في علي خوف ببيض وجهكم

حائزة على الحزام الاوف وايت برياضة عض الاذان

ستة دان في رياضة قتال الشوارع
خريجة المعهد العالي للطوشات عالكوربات
من كلية الغويرية _الزرقاء

ماجستير في فن اخراج الشفرة من تحت الشفة

بطولة المملكة في السحج و التصفير ومسح الجوخ للحكومة ما يضمن لكم كل الواسطات و المحسوبيات

تعزيز الصلات بين المواطن المدون و المواطن العادي

ازالة الضرائب اللي فرضتها انا عن كل من ينتخبني

توصيل الطلبات للمنزل حتى في عزالصيف
تنظيف الموكيت بالانزيمات

مرشحتكم التي لن تخذلكم ابدا

صوتكم المبحوح في المجلس

صوت الان و ادفع غدا

لكل صوت ثلاث ليرات و نص

و اجرة الباص لمكان الانتخاب

كما نعلن ن وجود وجبات مجانية و بيبسي يوم بعد يوم

هذا البرنامج برعاية مشاوي ابو امل_المقابلين