القلب و القشرة
هذا الموضوع بدات اكتبه كتعليق على موضوع قويدر
و لما شفت انه التعليق طلع اكبر من الموضوع و انه في جوانب تانية بدي احكي فيها قلت احل عن الزلمة و اكتب هون
موضوع قويدر عن الاحذية (اجلكم) و انه البنات بيحكموا على الشاب من خلال كندرته
قويدر زعلان و مش عاجبة هالحكي
طبعا اي حد بالعالم بيقراء هالكلام بيقول اخس اما بنات سخيفات تافهات
معه حق.... يعني ككل شاب بشوف في نفسة ميزات كتيرة يلاقي بالاخر انها تتلخص بموديل و نوع... كندرة؟؟
(بعيد عنكم..)
بس تعالوا نحكي بصراحة شوي عن المظاهر بشكل عام
لنفترض شاب من اروع الشخصيات من انجح الشباب من احسن العيل جذاب متعلم..بس
مش متحمم من شهرين اواعية مش مغيرها من ايام ما تحمم... كندرته فاتحة تمها بتقول لله يا محسنين
هل ممكن اي حد يقول لا كلا..الجوهر اهم من المظهر؟
طب يا اخي انا كيف بدي اتجاوز هالمظهر عشان اكتشف الجوهر؟؟
يعني بدي اعتمد على كلام امه مثلا و هي بتقول
انا ابني ما في منه؟؟
ما كلنا عارفين المثل
لا... مش مثل القرد بعين امه غزال
مثل تاني اسخم
كل من خنانتة على ثمة حلوة
يعني اللي بيكون قريب من اي شخص بيجاوز المظهر لانه بيكون عارف مع مين بتعامل
بس الغريب اللي ما بيعرفه..بدو يحكم علية من اول ما يشوفه حسب مظهره
ملابسة... شعره... شكلة
انا عارفة انه هدا كلام غير منصف او عادل لاي انسان على وجه الارض
لانه كلنا بوقت او تاني انحكم علينا من قبل الاخرين
اللي انا شايفته انه المظاهر عم تاخد من وقتنا و مصارينا و صحتنا كتير
من وقتنا ؟؟ كيف يعني يا ملائط؟
(بتخيل حدا عم يسأل عشان التشويق
الوقت اللي بيصرفة الشاب او بتصرفة البنت قدام المراية
من ميك اب لمنيكير بيديكير شعر تزبيط و شعر تشييل
كريمات مرطبة و كريمات منعشة
و بادي سبراي و بارفان و بعدين شو البس والشنتة و الاكسسسوار
الشاب كمان.... تفكروش يعني.... مش قلال صايرين
حلاقة و تنعيم و تحديد اللحية بطريقة لهلا مش عارفة كيف بيزبطوها يعني لو مسطرة تسطير ما بتطلع هيك
هدا الوقت اللي بيضيع عالمظاهر و هدا جزء بسيط منها
تنسوش الموبايل و نوعة و الرينغ تون اللي علية لازم يكون اخر اغنية نازلة و اجنبية(هاي هلا ها وصلتني كدعم للموضوع)
اه والله سمعت وحدة مرة بتقول يي شفتي شو حفرتلي الرينغتون عنده
للجسمي هاهاها
طب حر هوة و انتي مالك؟
يعني كتير هيك
اما المصاري الي بتنصرف
الصرف الغير معقول على اللبس و اللوك و الشعر و الوانة وغيرو غيرو هذا عدا عن انه بعض الشباب او البنات بغيرو السيارة كل سنةعشان برضة المظهر العام
اوكي انا قربت انجلط
اما الصحة
في صبايا ما بهمهم اذا الكندرة مريحة او لا المهم تكون حلوة يعني انا بحب الكعب العالي بس لمناسبة اكم ساعة مش لشغل طول النهار
بس في بنات ما بهمهم الراحة او الصحة المهم يكون المنظر صح و حلو
مرة كنت مع وحدة اشترت كندرة كعبها 12 سم بقولها اذا للشغل رح تموتي
قالت لي بنفاذ صبر: انسي.. المهم حلوة ولا لا
قلت :حلوة
قالت: انا ما بهمني اكون مرتاحة
البنات و الشباب على حد سواء بيهتموا بالمظهر
الشاب كمان مش رح يجي يحكي مع وحدة شعرها ما سمع باشي اسمة مشط او حواجبها متل حواجب الحريري الله يرحمه
يعني يا جماعة رضينا ام ابينا الزمن و كل زمن بيفرض علينا اشياء يمكن نحنا نكون داخليا رافضينها
بس منضطر اننا نتماشى معها عشان نقدر نعيش بمجتمعنا
في فيلم ذهب مع الريح ما بنسى منظر سكارلت و هية بتدحش حالها جوة كورسية و بتضل تقول لمامي الخادمة شدي شدي ليبين خصرها زغير
من زمان و مش هلا المظهر بيلعب دور كبير
و كل مجتمع و اله مظاهره
اللي بيكون قمة الفياعة و الموضة بمجتمع ما ممكن يكون قمة الاولد فاشن و مش رح اقول الحفتلة
نرجع لموضوعنا
مكن نحكم عالشاب من خلال كندرتة؟
عملت استطلاع و سالت اكمن بنت
كان الجواب طبعا..مع نظرة متشككة الي انو شو هالسؤال
لو كان شاب بجنن بياخد العقل ولابس كندرة بردقاني برباط مثلا(هيك قالوا انا ما خصني) او جلد تمساح بعرف باي مدرسة كان و باي جامعة و مع مين بمشي و شو مستواه الاجتماعي
وحدة تانية قالت لي بتطلع عالاسنان
تالتة بتطلع على الساعة
هلا ممكن حدا يقول شو هالســـــــخافة
كل واحد منا بيخاف يساء الحكم علية من اي حد
بس لو كل واحد فينا رجع لنفسة شوي رح يلاقي انه في يوم من الايام و في وقت من الاوقات حكم على شخص من خلال لبسة او سيارته او بيتة او اي شيء مادي بيخصه
هلا كتر الاهتمام بالمظهر بينسي البعض الاهتمام بالجوهر و بينشأ عنا جيل كنادرة حلوة بس اللي جوة....يعععع
يعني الاعتدال مطلوب
اما الشغلة التانية اللي زكرها قويدر و هية الي مزعليته.. و انا كمان سمعتها بداني هاي بطريقة مختلفة شوي ..
ارجو من الشباب رجاء حار ما يزعلوا
..
وحدة مرة قالت: بشلح كندرة و بلبس كندرة لتيجي كندرة على اجري و تريحني
طبعا كانت تقصد الشباب و الخطاب و الاصحاب اللي بتترككهم واحد ورا التاني
تشبية بذيء و بعتزر عنه لكل الشباب عن هالبنت اللي ما بعرفها ولا رجعت شفتها
اما باقي النقاط اللي ذكرها قويدر فما راح اتطرق لها هنا لانه مش مجالها
نرجع لموضوع المظاهر
هلا نحنا لما نروح على محل نشتري شنتة (جزدان يعني) اول اشي بيتطلع علية البياع او البياعة هية الشنتة اللي نحنا حاملينها
نوع من التقييم ليعرفو مين نحنا؟؟ ااديش معنا مصاري؟؟ شراّيين ولا جايين نتفرج
و اذا رايحين محل احذية بتطلعوا على كندرتك برضة نوع من التقييم
مرة سألت صاحب محل سؤال مباشر( و كان محل ملابس مش احذية): انتو بتطلعوا على الكندرة اللي بتكون لابسيتها الست لما تدخل محلكم؟
قالي طبعااول اشي منطلع علية الكندرة لانها بتعطينا فكرة عن الست
قلت له:بس هدا ظلم لانه لما نطلع عالسوق منلبس كنادر مريحة عشان المشي قال: برضة نحنا منعرف
المظاهر الها دور مهم في اعطاء فكرة عامة عن الشخص الي قبالك بس برضة ما تسيطر على كل اهتمامتنا و تنسينا الاهم
تزكرت درس العلوم
كلما اقتربنا من قلب الكرة الارضية ابتعدنا عن القشرة
للاسف حياتنا كلها قشور..ما في قلب ولا لب..
32 comments:
Endare.
والله يا ملاقط شوفي..انا بتفق معاكي في موضوع المظاهر..بس رح أختلف شوية في التفاصيل
ضروري جدا الاهتمام بالمظهر..ولكن بحدود المعقول..يعني الموضوع مثل ما قلتي بياخذ من المجهود والمصاري والوقت وكل شيء..فلازم الواحد يعمل توازن..مش يا طخو يا إكسر مخو
لازم يكون في توازن بين المظهر والجوهر
مش ضروري كل واحد مثقف يكون لابس نظارة مثل سيدي ومظروا مثل جولدا مائير...ومش ضروري كل واحد مرتب يكون مابعرف بالحياة غير ستار اكاديمي وسبيس تون
التوازن هو الأساس
كلام جميل ,
احكيلك كم شغلة , هلا اذا عمرك قرأتي عن لغة الجسم او العلاقات العامة , بتلاقي في ارتباط وثيق بالمظهر الخارجي و تأثيره
هلا بما انه هي شي من اختصاصي الفترة الأخير شوفي
انا بالنسبة الي , بتطلع على الوجه و بعدين على الحذاء شباب او بنات ما بتفرق يعني من فوق لتحت و فعلا بإدر اعرف اكتير من جوانب الشخصية ,و اعرف شلون احكي مع يلي ادامي ,
بالنسبة لأي حدا كلامك صحيح بحب يكون مظره منيح , و مو عدل الحكم 100% من المظهر بس متل ما الشباب بتحكم على البنت من للبسها بظن انه عادل انه البنت تحكم على الشب كمان بنفس الإسلوب ,
و بلفت نظري اللبس الرسمي لأي شخص موضوع الكسرة مثلا كسرة البنطلون القماش او القميص بتعطي انطباع معين للشخص
انا موسوس من هي الناحية يعني اذا القميض او البنطلون القماش ما كانت الكسر واضحة و مستوية 100% ما بلبس البنطلون و برجع بكوي و انا بكوي شخصي عشان يطلع متل ما بدي ,
و موضع اللحية بميزها اذا كانت عند الحلاق ولا شغل يدوي ,
و بحدد طبيعة للبسي للمكان يلي انا رايح على و على نوعية الشركة كمان,
يالنسبة للبنات في اكتير شغلات بتحدد شخصيتها من صبغ الشعر , او الحجاب, اللبس حتى الألوان يلي بتختارها و الإكسسوارات , حتى نوع السيارة يلي بتلفت نظرها او بتركبها
احيانا نوع الحلق كمان , و اذا بتلبس دهب , في اكتير شغلات بتبين معك من اختلاطك بالناس
يمكن تستغربي بس طريقة حمل المفاتيح لما تدخل البنت على اي محل تشتري الها دلالة , و كمان الجذان هاد يلي بكون متل الدفتر اوب 60 طبقة و بتكون حاطة الهوية و صورتها من غير حجاب او صورة حدا
الها دلالة ,
اه كنت بشتغل بياع بأكتر من محل و باليالي العيد بتلاقيني بالحسين بساعد ببيع احذية
على العموم
القشور هي مو دائمة ولا تنسي انها دائما بتتقشر و ببين اللب
اه صحيح
احيانا كلمة بتحكيها البنت بعد الحكم على مظهرها بأنها رح تشتري بتغير النظرة كلها على انها جاي تتسلى و اضيع وقت
بتضلّك كبيرة يا ملاقط.. دايما
الفكرة ان الانسان يوازن.. المبالغة في اي شيء مرفوضة.. المظهر الخارجي مهم، لكن مش اهم شي
يعني اذا واحد رايح يخطب ... ماشي الحال .. بس اذا انا طالع على السوق... انشالله بدّي اكشّخ علشان شغّيل محل الكنادر يرضى عنّي! امّا و الله اذا طالع على السوق علشان ازبّط صبايا .. فهاي قصة تانية
حكمنا على المظاهر مأساة.. و دليل خلل فينا كأشخاص!
تعرفي، مرة كنت في مؤتمر و كان بيل جيتس و ستيف جوبز موجودين... لبسهم على بعض ارخص من قميص واحد من الفشخرجية
مش مهم اللي فوق الجلد... المهم اللي جوّا العقل و القلب (والمحفظة) :) و هذه حكمة اليوم
abda3ti mala2e6 .. abdaaaaa3ti :)
kol had mn ta7t ras Qwaider o postato :D ...
howi shoofi a7keelek 3azeezti, kalamel lazboot, bs kaman e7na ma bne7kom 3ala el nas bel motlaq mn shakelhom, ana momken a5od "enteba3" 3an el 7ada bs mo ma3naha a7kom 3aleah, ba3dean da6eel 3eanek ana... el wa7ad lazem ydal labes o metlabes bs mshan yerdi el 3alam?? walahi enni marat batla3 bel bejama, o meen elo 3endi??? ba3dean zai ma be7koolek "erda2 el as '3aya la todrak" mshan heak ana la battal3 3ala 7ada o la ba7eb 7ada yetlla3 3alai, benesbeh elli kolha sat7eyyeh mo aktar...
ya lahwi 7akeat kteer ana :)
صباح الخير و مساء الخير
hamede
شايف بالله
يعني اشي بيحير
abed
طبعا
التوازن بكل شي
الصورة المرسومة براسنا عن المثقف انه لازم يكون اشعث الشعر مهلهل الثياب اصفر الاسنان
صورة كاريكاتورية لزقت بروسنا
انه معوش وقت يرتب حاله
دايما بقول في بالنهار 24 ساعة ممكن جدا تقسيمها بطريقة تعطي حق لكل شي
بس بالله تسال اكم شاب مين رئيس وزراء الاردن و شوف اكم واحد بيعرف
مرة سمعت واحد بيقول وصفي التل
qabbani
احكيلك شغلة
هلا اول انطباع بتاخدة عن الشخص بيكون من خلال مظهره الخارجي
بس اكم شخص انظلم من ورت عالاشي؟
انا بس اتطلع على ست او بنت مثلا بعرف كتير شغلات
الاهتمام بالتفاصيل الزغيرة مش معناتو شخص اجوف
بالاخر كله بيرجع لخبرتنا في هالامور
مش متزكرة وين قرات مرة لكاتبة شافت ست بندوة و الست كانت من النوعية اللي مكياجها كتير خواتم بالاصابع و لبس بيبين انه مكانها مش هون و داخلة غلط بس خلصت الندوة اجت فرصة و حكت مع هالست و اكتشفت اديش كانت غلطانة بحكمها عنها لانه الست طلعت بغض النظر عن مظهرها ست مثقفة جدا
القشرة مهمة لتساعدنا نقدر نوصل للب
بس يا ريت لما نوصل ما يخيب املنا
qwaider
اللي بتقولو صح
لكل مقام مقال
و اللبس الي بينفع للعريس مش بالضرورة ينفع لواحد طالع يجيب حمص يوم الجمعة
بس والله بعرف بنات لو بدها تروح تجيب من السوبرماركت اشي بتقعد ساعة عالمراية
برضة في اشي تزكرتة
ناس من النوع اللي بيقولك المظهر مش مهم
صارت قصة مع صديق
كان واقف قدام مول و شاف زلمة من لبسة و منظرة فكره شحاد
قام طلع ليرة و حطها بايد الزلمة
ولا الزلمة تطلع علية نظرة مستنكرة رمى الليرة و راح على مرسيدس شبح شغلها و طلع
ما كانش الشوفير كان صاحب السيارة لانه متل ما منعرف الشوفيرية الخاصيين بيكونو مزبطين حالهم عالاخر عشان برضة يعطوا فكرة لما يكونوا سايقين لحالهم انهم اصحاب السيارة بس هدا موضوع تاني
التوازن و الاعتدال و عدم التسرع في الحكم على الاخرين
بس اهم اشي
انت شفت بيل غيتس شخصي؟
سلم لي علية المرة الجاي كثير السلام
maioush
ميوش
اولا ما حكيتي كتير ولا اشي عادي
بالفعل يا عزيزتي ارضاء الناس غاية لا تدرك
و هاي مشكلة بعض الشباب و الصبايا اللي ثقتهم بنفسهم شوي مزعزعة
ممكن يلبسوا او يعملوا ااي اشي عشان يطلعوا بانطباع جيد من الناس
الانطباع ممكن يكون حكم للبعض
و اول انطباع ممكن يلزق براس الواحد و تغييره يكون صعب
بتعرفي ميوش هالايام لزقت بجينز و اكم بلوزة و مرتاحة فيهم و مش سائلة عن حد
************
شكرا لاغنائكم الموضوع بتعليقاتكم
Good Morning Mala2e6!
great post! i do not have much time to write but i can always say that first impressions are very important and they do tell about the person but not always! lots of buts and ifs would be argued replying to your post.
for me, i assure you, i get offended when it comes to bad body odor that would tell so much about the person...clean is a plus to have!
very nice post.. well this shoes thing is very common around, to be honest, i dont look out for the shoe, i look in the genereal attire and looks, and it all shows.. and first impressions do matter.. of course in moderation.. sometimes that person would be in a hurry, and didnt clean his shoes, does that mean he is a bad person? some people do exxagerate..
el mostala7 taba3 bghayer kondara hada kaman el shabab bestakhdemo, o iza 7ada beje be balo yeshabeh bani adam khtaro la fatra walaw aseereh be kondara ma3nato hada mostawa! o 3al mazaher el shaghleh azwa2 ya3ne akter el shabab hay el ayam ma betla3o men el beet bedoon wax o fe kteer banat ma be7ebo el shab ele 7atet wax (eeseeha 3ala ashya2 tanyeh kaman) o mo ghalat ino lama netla3 men el beet nkoon mratabeen o 7elween ;op ana shaghlet laish i7na bno7kom 3al wa7ad men lebso coz el lebes howeh bye3kes shakhseyetna la akter el nas, coz fe nas ma behemhom sho yelbaso el mohom sho nazel moda, bas sure el lebes ma elo dakhal iza el wa7ad mnee7 or 3atel
wallahi ana ma3aki 100%!
ya3ni howeh il mazhar mohom o kaman il jawhar mohom. bas ya3ni ana 7abeb a7ki noq6a janibiyeh ino il ka3b il 3ali bi ra2yee ikhtira3 3azeem jiddan :P
تسمحيلي أحكيلك إنك بتسطلي :) إنه عجبني الموضوع أنا بتفق معك بموضوع المظهر .. كمان الله بيحب الجمال .. و مطلوب منا نهتم بحالنا بس بحدود :)
و خير الأمور أوسطها ، بس إنو نحكم على الواحد من مظهره !! إنه ما راح نكون عادلين ... الجوهر مهم بس زي ما قلت إنه بمعنى المظهر جواز سفر للجوهر
حاسة حالي بعيد كلامك :)
بس هاي أول مرة بسمع فيها هادا المثل :"كل من خنانتة على ثمة حلوة" من وين جايباه ؟؟؟؟؟
لازم نعرف إنه إحنا عايشين بمجتمع المظهر في أهم من الجوهر !!!!
summer
good morning
الانطباع الاول مهم
بس متل ما قلتي في كتير اشياء بتخكم و الموضوع ما بوقف عند الاحذية
انا قليل حدا لانتبه لكندرة حدا الا اذا كانت قعدة طويلة و كان الشخص مقابيلي على طول
انا شفتك مرتين ما بتزكر شو كنتي لابسة باجرك مثلا
اما ريحة العرق فهدا موضوع تاني كنت بدي اكتب عنه
يعني لنفرض شخص صديق و اله ريحة كيف بدنا نقولو بدون ما نجرح مشاعرة
كان الي صاحبة مرة كنت عندها بالبيت و قدامي كانت يا دوب مخلصة شاور و لبست طلعنا بالسيارة ولا ريحة متل ريحة البصل
انا صرت اقولها شو في بسيارتك بعدين اكتشفت بعد كزا مرة انه هية عندها مشكلة مش قصة نضافة
يعني كيف بتقولي للشخص
ضليت ساكتة و مسكرة مناخيري و تمي
شكرا سمر لاضافتك
mr ramahi
انا بتطلع بشكل عام و ممكن اعطي عذر للشخص يعني ما رح الوم انسان بعرف انه حالتة المادية ما بتسمح باكتر من هيك
بس لو بعرف وحدة و بعرف انه حالتها المادية كويسة و شفتها مكركبة كزا مرة بقول بعقلي بربوشة
ممكن مرة مستعحلة ممكن مرة مش جاي عبالها تتانق بس اذا دايما بتكون اخدت الحكم النهائي
اهلا بالعروس منورة المنشر
naturalblu
ما كنت اعرف الشباب بتعملوا هالمصطلح
انا بورجيهم
بس قصة الواكس
لول
فكري راح لبعييييييييييد..
لحد ما قرات السطر التاني قلت له ولك تعا فضحتنا مش هيك قصدها
قرات بكتاب احلام مستغانمي مرة عبارة ملخصها انه دايما البسي و كوني مرتبة لانه ما بتعرفي بهالطلعة مين بتقابلي ممكن يكون فتى احلامك
اما اللي بيركضو ورا الموضة رح يتعبوا كتير
لانه الموضة سريعة جدا
بستغرب من لبس بعض البنات اللي ما بيلائمهم ابدا و بيبين كلابيظ باماكن كان ممكن تخبى لولا انه البنت ركضت ورا الموضة
اللبس ما بيحدد اذا شخص منيح او عاطل بس ممكن يحدد اذا شخص مرتب و نضيف او لا اذا شخص بيهتم بالتفاصيل او لا
شكرا فطوم
bakkouz
wallahi i am glad too see you here
nawwart
و انا كمان برايي الكعب العالي احلى اختراع مع انه بيشوه العمود الفقري و بيتعب الاجرين و الضهر
بس لا يمكن الاستغناء عنه
حتى المشية بتتغير مع الكعب العالي
شكرا بكوز
vagueraz
تفضلي احكي و لو بتموني
...
اهها
هاي اللي منقولو
اشي و منه
يعني الاهمال الزائد بحجة انه الجوهر اهم غلط و الاهتمام المبالغ فية لدرجة السخافة غلط
اما المثل فهذا يا عزيزتي غيض من فيض
يعني في منه كتير
عجبك؟
انا بحب الامثال الغريبة
شكرا لزيارتك
مرحبا ملاقط..موضوعك عالوجع
أنا من يومين كتبت عن الجوهر و المظهر و أديه إنه المعادلة مو سهلة نوازن بين التنين،،نقول لاو الله نحنا بنطلع عاللي جوا لو كان شو ما كان اللي برا بنكون بنكزب و مو صادقين لأنه نحنا بنتأثر بالمظهر الخارجي. الحليوة بنعطي ابتسامة و احترام و على اهلا و سهلا بدون ما نعرف شو جواته اللي ربنا ما اعطى هالعيون ولا الطول بنعامله بجفا و دوبنا نعطي حالنا فرصة نشوف شو في
عنده
متل ما قلتي بالسوق أنا بحب أنزل بأفرهول و تي شيرت أبيض و سليبر لأانه أريح و لأنه بدك تقعدي تجربي الأواعي هون و هناك بس طلع الواحد لازم يهكل هم نزلة السوق لأنه لاوم يتطقم و هي حكي فاضي
عالعموم نحنا بطبيعة البشرية بنتأثر و بنتأثر بمنظرنا الخارجي بس برأي بكون هدا الانطباع أولي و مع الوقت بنكتشف صدق أو زيف حكمنا
7elw kter.. be3jebni kef btestarsili bel 7aki..
O kalamek mazboot.. el mazaher hl2 sarat kol she... momken mosh la kol el nas.. bas mohemmeh..
redrose
اهلا منال
هاي جيتي من عندك
بتعرفي يا منال الدنيا تغيرت و مقاييس الجمال زادت
اقولك اشي صار قبل اكم يوم
بحكي مع وحدة عن شغلها و انه عندهم بلشغل واحد و الكل بقول عنه شقفة و البنات بموتو فيه
انا هدا الشخص شفته
عادي جدا اذا مش اقل من
عادي
بتعرفي شو اللي مخلية حليوة
المركز يا منال
المركز و اللبس و المصاري بيخلو القرد براد بيت
انا شفت هالشخص بعين موضوعية لانه بعيد عن وسطي
بس هم بشوفوه بعين الموظف
ف اظن انه اذا بدنا نتغلب على عقدة معينة بالشكل لازم نشتغل على المركز و نجمع مصاري و مع شوية اواعي و بدلات ارماني و قمصان غي لاوش و سيارة و ساونا بتلمع البشرة
هالحكي للشباب البنات بعملوا عمليات تجميل و خلصنا
و هيك المظهر و الجوهر يتحدان لخدمة المظهر
شكرا منال
life
حياة اهلا و سهلا
زمان يا بنت
واله يا حياة للاسف الشديد التعميم هون حاصل
صار لنا غسيل دماغ من الميدي بكل انواعها و تحددت معايرنا الجمالية
متل ما قلت لمنال اللي بيغطي على عدم الجمال هو وجود المصاري او المركز اللي طبعا بيجي معه مصاري
هيك صارت الدنيا
مش عارفة كيف ممكن نطلع من هالدوامة و نصير نركز شوي عالمضمون و نهتم انه اذا حققنا ااشي بحياتنا يكون لاجل تحسين مجتمعنا وطننا بلدنا لخدمة الغير
شفتي يختي صرت اهلوس
ما حدا بيفكر بحدا الا بنفسه
حياة شكرا لمداخلتك
تطوليش الغيبة
انا بعتبر الحذاء والحزام والنضاره والساعه والخاتم الاءنيق والكف لينكس ولمحرمه ومربط الجرفته يجب ان تكون كلها ذات علامه تجاريه مميزه طبعا هادا من وجهة نظري وبس
yeah sure, bas wallah beda7ko ele bekoon tale3elhom lazaleez :P ma 3aleena hala2 tell me la wain ra7 fekrek? :P
Hatem
good morning
حلو الكلام
حلوة الاناقة
بس انا دايما بناقش هالموضوع
هل الملابس او الاكسسوارات ذات العلامات التجارية او الماركة او السينية بتكون افضل من مثيلاتها
ولا انا عم بدفع ثمن دعاية بعملها لديزاينر لاني لابسة من عنده
هلا ممكن اشتري بوتس ايطالي مرتب بربع سعر بوتس من بالي
انا بدفع تمن الليبل
و من ناحية اخرى
الماركات العالمية الها اسم تحافظ علية ف اكيد لازم تعمل بضاعة ذات جودة عالية
ممكن شوي مبالغ في سعرها
لانه لو كل انسان قدر يشتري البضائع السينية بتفقد ميزتها
حاتم شكرا لاضافتك
naturalblu
saba7o
you said :
akter el shabab hay el ayam ma betla3o men el beet bedoon wax
w fekri akho fekreyeh..ra7 lal waxing ( hair removing..loooooool)
till i read the next ,line with the word y7oto wax..fhemt asdek
te7keesh la 7ada
والله يا ملائط اللي جوا بينعكس على اللي برا، واللي بيهتم بحالو اكيد رح يهتم بغيرو، هي بس النظرية اللي عنا، يعني والله ازا الشب ما كلّف حالو ينضف كندرتو وملابسو وحالو، شو بيعرفك بكرا بالبيت شو بدو يكون؟ نحنا بس بنحكم على نضافة المظهر، وملائمة المظهر للعمر وللمناسبة، وما حدا فينا رح يطلب يشوف شو ماركة اللي لابسو، يعني ممكن البس صيني بس مرتب، الرتابة والنضافة ما بدها كتير مصاري
المظاهر ذابحيتنا والله و الايام هاي انا شايف انها زايدة كثير عند الشباب ، ما بحكي انه الشاب لازم يكون مبهدل بس يا اخي الصبايا معروف انه المظهر عندهم من اهم الامور و هذا اشي منطقي يعني لو زاد شوي ما بنحس فيه اما الشباب فلا والله زايدة عندهم الحالة و بتلاقيه شغله الشاغل بس كيف يرتب حاله و بقعد ساعة عالمراية يزبط منظره
انا شخصياً بحسد حالي و الشباب اجمالاً انه احنا ما عندنا تعقيدات البنات باللبس ، يعني كله هالبنطلون و التي شيرت او القميص و توكل ، فبس بدي احكي الله يعين الشباب يلي المظهر ماخذ تفكيرهم زيادة عن اللزوم و مرات من كثر تفكيرهم بالموضوع بطلع معهم اشكال عجبة بفكروها حلوة و مرتبة :)
و اما بالنسبة للحكم عالمظهر من خلال الكندرة (بعيد عن السامعين) فأكيد انه النظرة الاولى ممكن تعطي انطباع سلبي عن هذا الشخص بس بجوز لو نقعد معه و نسولف بنكتشف انه الزلمة ما بعيبو اشي و بالعكس فهمان و واعي ، بس كله بالنهاية لا يمنع من انه يكون فيه توازن بين القلب و القشرة لانه هيك المنطق بيحكي
ok that was the longest funniest post I've read in weeks :D
and I cudn't agree more with u that's all I have to say.. appearance gives a big first impression.. Though im not the kind of ppl who looks at shoes, I always look at clean teeth and ears, I just hate guys with dirty ears! yukki!
موضوع حلو , بالنسبه إلي بلاقي إنو المظهر بعطي إنطباع بنسبه 70% للشخص اللي قدامك , أهم إشي مو نوع الكندره طبعا ,الأهم إذا كانت بتلمع أو عالأقل نظيفه ,الإشي التاني المهم الأسنان كتيييير مهم إذا نظاف ولا لأ ,وكمان كتيير بجذب الساعه إذا لابقه مع الأواعي ,الأواعي كمان تكون مكويه يعني زي النقاط اللي حكيتيها,في شغله كمان بالمناسبه بنقهر منها يا أخي حتى وقت رياضه المشي بتلاقي البنات بمشو بكعب عالي
لأ وملبقين معها شنته كمان, ليش كل هاد جايين تلعبو رياضه ولا جايين عاحفله خليكم سبور عادي
jasmina
صباح الخير
كلامك حلو و هدا اللي منقولو
هلا في ناس كتير بهمهم تكون الكندرة ايطالية و ريل ليذر بس نحنا الل منقول انه النظافة و الترتيب اهم
شكرا جاسمينا على مشاركتك
na3ouri
ما هوة يا ناعوري يا خوي مرات النظرة الاولى ما بتسمح بجلسة و حوار يعني في ناس ما بتعطي فرصة تانية و مكن يقولك بموت ولا حدا يشوفني قاعد مع فلان
فكرك لو اينشتين بشعره المكنفش قابل ناس ما بعرفوه اكيد بقولو واحد مجنون مبهدل
بس هلا و بعد ما عرفناه ما بتفرق معنا كتير لو كان لابس خيش لاننا عارفين شو في جوة راسة
في فيديو رة نزلته على اكبس عن كيف انه نحنا عنا صور مسبقة مطبوعة براسنا و كيف منحكم من خلالها
طبعا الفيديو للكوميديا بس برضة بيعطيك فكرة كيف نحنا منفكر و كيف ما منعطي فرصة لالي قدامنا
http://ikbis.com/mala2e6/shot/17152
شكرا ناعوري
manal O
hello manal
i too dont look at shoes but look at aperson as a whole and as days pass by i learn something new,i always give others a second chance and i try not to judge depending on first glimpse
thank you manal for your visit and comment
orangee
صباح الخير
سبور و عادي يعني شوز لمشي و شوز المشي قد ما يكون حلو ما بكون متل الكعب العالي و البنت اللي طالعة تعمل رياضة بالكعب اكيد مش طالعة تعمل رياضة الها
بتعمل رياضة لعيون الشباب
شكرا اورانجي للزيارة و التعليق
والله أنا رايحة علي !! بشتري الكندرة و بظل لابسها لحد ما تهتري و بروح على أول محل بوجهي و بشتري غيرها
طب ليش البنات بحبوش الكندرة برباط؟ قصدي الشب الي بلبس كندرة برباط؟
شكلو يا اخي انه الكندرة برباط للرجال الكبار مش الشباب و الشب الي بيلبس كندرة برباط بكون اولد فاشن او ممكن يشكوا انه لابس كندرة جده
انا شخصيا ما بتطلع ..الا اذا واحد لابس صندل و اصابيعة طالعة بطريقة مقززة ممكن..ما اتطلع برضة يعني بلف وجي
لووول
اذا كندرة برباط أولد فاشن ... بوط صيني على بنطلون قماش شو بطلع
خلص اليوم منزر كندرة تكساس بني فاتح بوز طويـــــــــل ... مع ورده عالجنب
ها هااااااا
بس لضمان اكتر بقترح صندل و يكون نمرتين اكبر عشان الاصابيع ياخدوا راحتهم و يبينو منيح
كووووول
وأربي الأظافر شهرين زمان مشان تكمل؟
loooooooool
انا كنت بدي اقول بس بعدين قلت بلاش
بس بما انك عارف
القوانين
go ahead
walla ana ma3 Abed. Hamdan 7akyo 100%
its so great to see u here bukah..
ana kaman ma3 abed...il tawazon daroury..(i had to scroll up and ead again..:D)
thanks bukah for being here nawart
Post a Comment