من هوليوود مع تحياتي

هوليوود و افلامها و مدى تطابقها مع الواقع

مشاهدها المكررة و كليشيهات صارت معروفة

الافلام الرومانسية

تدخل البنت عالبيت و لا الارض مفروشة ورد

تتفاجا

تكمل مشي

تدخل اكتر تلاقي الشموع..مئات منها معبية البيت

و تفرح
و تنبسط
و تنشكح

على ايش فرحانه يا هبلة مين بدو ينضف كل هالميمعة

**

المشهد اياه..الخاتم بكباية عصير تفاح كارولينا (هية شمبانيا بس عشان الاطفال منقول عصير)

بتكون دايرة معه سنين و مش عارفة راسها من اجريها و شو شعورة و قال يعني بتتفاجأ لما يطلبها للزواج

و بيركع على الارض و بيقولها تتجوزيني

و بتقولو و هية مدمعه.اه

و كل اللي بالمطعم بيدمعو و بيزقفوا

*

طبعا اذا الفيلم رومانتيك كوميدي بتتشردق بالخاتم و بتبلعوا و بعد غسيل معدة او طرق اُخرى بتسترجعه و بتلبسة

دايما بس يتخانقوا و يقرر يحكي معها و لمرة واحدة و يرن التلفون بتكون لسة بتفتح باب البيت و ما بتلحق ترد

و هوة طبعا بخلال ثواني بيكون يئس و بيلم كراكيبة و بنص ساعة بتلاقية تارك البيت و تارك شغله و البلد

**

ولا افلام المدارس

دايما البنت الهبلة اللي مفروض بشعة(بتكون شقفة بس لابسة نضارة غلط و ما بتحط مكياج)
هية البطلة اللي عليها العين

و دايما البنت المحبوبة بتكون شقرا و تافهة

و دايما بينتهي الفيلم بانتصار البشعة على الحلوة
بعد ما تشيل النضارة و تعمل حواجبها

يعني ما بيصير بنت حلوة و محبوبة و كمان تكون منيحة؟

المدارس دايما بتدرس شكسبير و الادب الانجليزي الراقي و الشعر يعني قلما تشوف حصة كيمياء مثلا

بيكونو الاولد مطلعين عين الادارة وناويين يحرقوا المدرسة قد ما بكرهوها و من غير انذار بتلاقيهم كلهم بيدمعوا وقت التخريج

*
افلام الرعب

دايما اخر واحد بتفكر انه هو الوحش بكون هو الوحش
وب تقتله
و بتفكره مات و دايما بيوقف البطل جنبه يحس بالراحة
طبعا كلنا منكون نصيح ولك لسة ما مات
ولا الوحش ماسكة من اجره
و دايما بينقذه شخص منكون فكرناه مات بأول الفيلم

و للي بيلاقي شلن عالارض وبيطلع اثري فرعوني علية لعنة بيجيب الدور لكل الفيلم
و الي بيلاقي لعبة او غرض قديم بالطابق التحتاني(البيسمنت) و بتكون بوابة لجهنم
بتنضفوش بيوتكم؟
بتعرفوش شو في عندكم؟
*

القاتل دايما دايما بيجي للناس و هية بتحمم ..ليش؟

معروف ليش..لانه فيلم رعب ما في مجال للرومانس و لازم يندحش فية منظر واحدة لابسة من غير هدوم عشان البيع و عشان يصير اسمه فيلم الرعب و الاثارة و التشويق

يعني صارت النضافة هية الرعب

و الاثارة انك تلاقي الصابونة

و التشويق لما تقطع المي و الصابون على عينك

*
و دايما لما يكون البطل في كافتيريا بكونو حاطين على المحطة اللي بتعلن خبر بهم البطل مع انه في مليون محطة يعني ولا مرة بتلاقيهم حاطين على ميلودي او محطة اغاني زي عنا مثلا

*
افلام الاكشن

البطل بنط نطات عجيبة
يعني بتلاقية نط من عمارة لعمارة 7 كيلو و بنجح
و نحنا اصلا بالفيلم شايفينو ما عندة لياقة بالمرة

*
و كلهم بعرفو يستعملو اي نوع من الاسلحة بيلاقوه مرمي عالارض
بدون تدريب
بدون ما يعلّق معهم

طبعا دايما في سيارة مع مفاتيحها جاهزة للهرب

و بافلام الرعب لما تحتاج السيارة بتبطل تشتغل و بيكون القاتل او الوحش وصلك و صار عالازاز

(بس هاي صراحة انا جربتها مش مع وحش او قاتل ..السيارة طفت عالاشارة و لما انلخمت بطلت تشتغل ..

و دايما و ابدا الشرطة بتوصل و كل شي خالص و منتهي بس بتلاقيهم بيكلبشوا المجرمين
و البطل و البطلة ملفوفين بحرامات بيشربو قهوة

البنات بالافلام بتلاقيهم لابسين كنادر(اجلكم) كعب 20 سم
و لازمن و حتما تكمل الفيلم و هية بتركض بالكعب
طبعا بكل لياقة
اي نحنا ما منقدر نمشي بمكة مول بكعب
*
و طبعا شو ما صار الماكياج متل ما هوة حتى لو وقعت ببير مي
(نوع المكياج رهيب..لو في منه بس
اي نحنا منحط المسكارة و اذا نسينا و حكينا عيوننا بتشحط
*
بتلاقي السي اي ايه ملبوخة و مش عارفة تدبر حالها الا لما تستعين بعميل قديم عنده عقدة نفسية
و عايش لحاله ببيت قديم و بيسكر طول النهار
و قال شو بيوم و ليلة ولا هو راجع متل الاول و طبعا ينقذ الموقف
بالاشتراك مع زميل ما بيكون طايقة اصلا و مستهبله
و بالاخر بيصيرو اعز اصحاب

**

و افلام الطيارات اللي بتوقع

دايما في عالطيارة واحد طيار عندو عقدة من الطيران بس بتغلب عليها و بنزل الطيارة بعد ما يموت الطيار و المساعد و برضة بيوصلو و بيلفوهم ببطانيات و بتسمع صوت الاسعاف و فنجان القهوة المشهور

**

بشكل عام و بكل الافلام

الكل بيعرف يرقص نفس الرقصة بس تبدأ اغنية و البطل او البطلة بيبدأوا رقص بتلاقي الكل صف معهاهم و ياللا

مع انه هيك رقص بدو تدريب شهور

*

البيوت دايما نضيفة و بتلمع بس ما بتشوف حدا بينضف حتى لو كانو قاعدين يفطروا كلهم(مع انه نادرا ما بيتحضر فطور بالحياة اليومية)

و بتطلع الام عالشغل بترجع بتلاقي البيت نضيف..

و دايما بس يكونو تنين يحكوا عن اشي المفروض سري بتلاقي حدا سمع..ليش ما بتصير بالحياة العادية؟

و الاطفال الهبل اللي بيكون في مصيبة و ما بيصدقوا يهربوا و بيرجع لينقذ كلبه الاجرب و انا بكون اقولو ولك يعدمني اياك اتركة

الاكل مباشرة من علبة الايس كريم دليل احباط عاطفي..و اذا مع باكيت شيبس معناتو ازمة كبيرة و اذا مع لوح شوكلاته معناتو اللوح الاصلي تركها

**

يعني بتمنى اتفاجأ بفيلم بتمنى ما اتوقع مشهد او يصير اشي متل ما هوة بالحياة اصلا

يمكن حضرت افلام كتيرة يمكن..