بحبك يا..مايكروسوفت

***

***

من زمان كان لازم نشكر مايكروسوفت

و بيل غيتس

و وويندوز

بس اليوم حسيت اني مقصرة معهم و قلت لازم يعني اشكرهم

و الله انهم محترمين و اوادم

اقولكم ليش

اول ما بشغل الكومبيوتر كل يوم بيطلع لي الويندوز ابديت

و بقولولي يعني بعد اذنك بدنا نزبطلك المسائل

انا دايما بقول لا بديش

بكون مستعجله

اليوم قلت اشوف شو بدهم

ولا طلع ويندو زغير

مايكروسوفت بتاخد اذن انه تنزل برنامج للتأكيد انه نسخة الويندوز عندي مش كراكد و اصلية

طبعا و بيناتنا و ما تقولو لحدا

النسخة مش اصلية

انا قلت

نــــــــو

نو بالتلاتة و طلعت

قالولي شكرا بس التحديثات المطلوبة ما نزلت

شوفو الزوء

شوفو الاخلاء

يعني انا متاكدة انهم عارفين

و متاكدة انهم بقدرو بمليون طريقة انه يحددوا النسخ المضروبة

بس برضة و بكل زوء بقولو بعد اذنك يعني عشان في ناس نوتي بدنا تساعدينا

هلا طبعا بنسخة ويندوز مضروب ما بتقدر انك تنزل الاكسبلورر 7

و انا حاولت انزله ووصلت لاخر مرحلة لما قالو انه سوري اسفين النسخة الي عندك ما بتنفع

و عاملين موقع بتدفع فيه مبلغ 50 دولار بيفهموك انه انت يا مسكين انضحك عليك

و انك ما كنتش عارف انه نسختك مضروبة و عشان هيك نحنا بدنا نساعدك

و لما تدفع مننزلك الاكسبلورر

مش عارفة مين بيضحك على مين

و مايكروسوفت عارفة انه ملايين النسخ المضروبة شغالة و شايفين بس طبعا الهم مصلحة تضل

متل ما كننا زمان لما نعمل ايميل و يقولك وين بلدك و نروح نختار امريكا عشان ناخد سعة ايميل اكتر(زمان )

هم عارفين نحنا وين

يعني هلا في اي موقع قبل ما تسجل بتلاقي اسم بلدك و علمك مشعشع قدامك

بس برضة الك حرية الاختيار

..

المهم..برجع بقول..بحبك يا مايكروسوفت

و مش مزح

***

يا مدارس ..يا مدارس

صفقوا للعلم يا ملايين و اخرجوا للحياة بالعلم مدججين

و أي علم ذلك الذي عنه تتكلمين؟

التاريخ مشوه و الكذب فيه شمال و يمين

و الجغرافيا تغيرت و الأحياء يهمنا منها موضوعين

و الكيمياء معادلاتها لا تتزن فلقد حاولوا منذ ابد السنين

هل سأكون أنا البطل الذي عرف لماذا تساوي صاد سين؟

و هل سأثبت نظرية لماذا لا تطير في الفضاء البلالين؟

العلم في مدارسكم ممل و كتبكم بحاجة لتفنين

و مناهجكم لا تفيد إلا من كتبها و طلع بقرشين

و الشهادة إن لم تكن كلها عشرين على عشرين

يعني هذا أني طالب كسول متقاعس مشين

علاماتي لا تقرر من أنا و ماذا أصبح بعد حين

كم من كسول تربع على كرسي وزارة و تباهى بالعلم المتين

و كم من متفوق داسته أقدام الواسطة و محسوبية الراسبين

في المدرسة كنت دائما الأولى و اسمي على لوحة المتفوقين

و تخرجت و درست ما أحب قلبي لغات أتقنتها إلى حين

لكن الأيام لم تسر بي إلى ما أردت.. يا فرحة الشامتين

***

**

كان هذا المفروض تاغ من منوش..عن المدارس و المفروض كمان انه انا اتيغ ناس

بس رح اعمل متل منوش و كل اللي بيحب يكتب عن المدرسة يتعتبر نفسه\نفسها\ متيغ\متيغة

***

فاصل اعلاني و سنعود بعد قليل..ابقوا معنا

***

هل كذبت داليا عندما اخبرت حسام ان والدها مريض؟

انا حسيت انها كزابة

هل حلقت لحسام بشفرة مصدية؟

لأ الحقيقة كانت شفرة ماك ثري

هل ستتزوج من المهندس الذي يعمل في الخليج؟

و بعدين تسافر و بعد عشر سنين بسافر حسام و بتشوفه هناك وووو

..برضة بتعمل حالها مش شايفتة

**

ام ان والدها مريض فعلا و ستواجه مشكلة باكمال دراستها؟

يمكن ابوها عندو هظاك المرظ..يعني رشح و انفلونزا تؤدي الى وفاة

هل سيعرف قلب نعيم المتحجر الحب؟

ما هوة ما بطب الا اشكالو و بيجي على بوزو و بعدين..بينتقم..

و بيصير عدو المراة

و من تلك اللتي سيحبها؟

وردة
نادين
ام

داليا؟

ام ام سرور؟

شفتو صورتها ..حلوة بتنحب يعني فارق السن مش مشكلة

**

**

لقطات من المسلسل ما صارت و ما رح تصير

***

ابو حسام و سفراته الكثيرة هل هي للعمل؟

ام ان هنالك زوجة ثانية؟

يا عيني شو رح تعمل فيه هيام

ام يسافر للعلاج؟

يمكن بروح على رومانيا بتعالج

هل ممكن انه عميل لدولة اجنبية؟

يمكن مخبر؟من اللي بيحملو جرايد مخرومة و بتطلعوا منها؟

لماذا تكره والدة وردة داليا؟

هل تحس ان زوجها معجب بداليا؟

ممكن..مراهقة سن التسعين

و من هي التي تعلق بها قلب فيصل؟

مين..مين؟؟

هل سيبقى حسام الولد المدلل ام ان الايام ستقلب به القارب و يعود الى حياة الفقر؟؟

حسام احس بالفقر لما ما كان في شاي ..ما تبهدلوه اكتر

**

***

هل ميراندا بالفعل طالبة ؟

صراحة..انا حاسة انها مشروب غازي

لا مزح ..ول شو بتزعلو بسرعة

هل ستتطور علاقة الدكتور حسين بداليا؟

ممكن تمرض و تروح تتعالج في القصر العيني..يعني بيصير هيك مسلسل مكسيكي

هل من الممكن ان يلتقيا يوما ما؟
و من هي التي يذهب رزق لرؤيتها في كلية الطب؟

ما بعرف؟ مين؟

**

كل هذا انتم تقررونه

لانكم لستم فقط القراء

انتم ايضا الكتاب

مسلسلنا تفاعلي

انتر اكتيف يعني..للالي ثقافتة الماني

متعدد الامكانيات

ممكن مثلا تقلبوه من مسلسل لمطعم

قابل للتعديل

و لأية نهايات تفكرون بها

لا تجلسوا و تنتظروا ماذا سيحدث

اه صحيح قاعدين ساكتين كدة لية؟ نسوتنا ولا ايه

لانكم تستطيعون قلب مجريات الاحداث

بس شوي شوي بالله

تستطيعون ان تجمحوا بخيالكم و تكتبوا الاحداث التي ترونها مناسبة

المسلسل مسلسلكم

***

بقي من الوقت

خمسة ايام

***

لنتوقف و ننشر الحلقة الاولى من الموسم الثاني

و الابطال تحت تصرفكم

شلفطوهم..اعملوهم بياعين جرايد

لا بمزح مش تصدقوا

فابداو الكتابة و ضعوا خيالكم على شاشاتكم

اجعلوه واقعيا حقيقيا

****

***

نرحب بتعليقاتكم ,ردودكم, توقعاتكم, نقدكم البناء

من وحي المناسبات

**

عيدك..عيد الربيع..عيد الكرامة

عشانك الشمس رسمت ع السما ابتسامة

و الارض اتكلمت عربي و قالت للورد سلاما

و فتحت انا الراديو و كان الوكيل بينكّد عاليتامى

ست الحبايب و احن الى خبز امي و يامو..يا ماما

و بالمدارس انشد الاولاد و غنوا ماما ماما يا انغاما

و جابوا للمس هدايا.. ضمة ورد بلكي ترفع العلامة

طب شو اجيبلك هدية؟ ولا بس بتتمنيلي السلامة؟

اقولك! رح اهديكي اغنية راغب علامة

انتي الحب الكبير الاول و الاخير يا احلى ماما

**

***

مزعل و سهى متزكرينهم؟

سهى زعلانة و مبوزة

مزعل:يا فتاح يا عليم مالك عالصبح؟

سهى: اليوم عيد الام

مزعل:طيب شو يعني؟

سهى:ما قلت لي كل سنة و انتي سالمة

مزعل:ليش انتي امي؟

سهى: انا ام ولادك..شو يعني ما رح تجيبلي هدية؟

مزعل: لسة من شهر جبتلك بهظاك العيد الاحمر ولا نسيتي الفيلم الي عملتية

سهى: عيد الحب وما بدك تهديني..يعني ما بتحبني؟

مزعل: و الشهر اللي قبله كان عيد ميلادك و جبتلك هدية

سهى:شو يعني

مزعل: يعني ضل اجيبلك على عيد الشجرة هدية

سهى: اه صحيح هو ايمتى عيد الشجرة؟

مزعل:

***

و كل عام و انتو بخير

بمناسبة كل الاعياد الواردة اعلاه

تنعاد عليكم بالصحة وا لسلامة

***

و الى كل الامهات المدونات

كل سنة و انتن سالمات

في عيدكن نرفع لكن اسمى التهنئات

وصلت الامهات الى الانترنت و البلوجات

فانفذوا بجلودكم يا اولاد و يا بنات

نشرة اخبار المنشر النصف شهرية

عاجل.... عاجل... عاجل

**

مجموعة من الثلوج تغزو مدينة عمان و تفاجأ السكان

و اعلنت المدارس عن توقف الدراسة و سادت حالة من السرور الطلاب

و هرع كل من او مفلح و ابو الوليد لشراء كميات من الخبز تكفي للشتوية القادمة

اما ام ساري و ام خليل فقد اضطرتا للتوقف عن شرب القهوة الصباحية و البدأ بالتحضير للكارثة الغير متوقعة

**

اما المدونين فكانوا في سبات عميق حتى هذه اللحظة غير عابئين بالحدث الجلل

و انتقلت مراسلتنا النشطة جدا و التي لا يوقفها ثلج ولا غيرو الى بعض المدونات لنقل اخر الاخبار

**

صادف الاسبوع الماضي اليوم العالمي للمراة

و الملفت للنظر ان المدونات الستاتية ما جابت خبر... ما عدا مدونة خالدة_المعروفة بأسم خوخة_ اللي كتبت و اسهبت عما يعني هذا اليوم و كيف نحتفل به و تمنت بعض الامنيات للمرأة في يوها(ما تنهان ولا تنضرب ولا تنقل قيمتها ))

اما بعض المدونات الرجالية فقد قامت بالتعليق على الحدث

**

جاد اهدى المرأة شعرجميل..شكرا جاد

**

واكتب بالرصاص فقد نشر كاريكاتيرا مدسوسا لما قد يتصوره البعض لعقل المرأة..و قد قوبل ببعض الهجمات من بعض المدونات النشطات

اما فراس الذي يحب عمان فقد تسآل عما نفعله لنجعل وجود المراة في المجتمع اكثر فاعلية و لندعمها

و قويدر كتب ايضاَ عن يوم السخماط العالمي مهنئا المراة بيومها اللي مش عارفة شو تعمل فيه..و قدم الدكتورةنوريت بيلاد الهنان في حديث مطوّل..

**

و بهذه المناسبة ننتقل الى بعض التدوينات الستاتية

*

*

عادت الى ارض المدونات المدونة ام العيال بعد غياب دام اكثر من عشرة ايام و تفقدت احوال المواطنين

**

اما ميوش فقد كتبت عن الاشياء الصغيرة التي تشعرها بالسعادة و ممكن تضيفي يا ميوش الثلج اول ما ينزل

**

و من ناحية اخرى تعرضت احدى المدونات و هي براء لمحاولة خطف شنيعة مرعبة..نهنئها بالسلامة و نوجه تحذير لكل من تسول له نفسه بالتحرش بأي مدونة و منقوله:وراها رجالة

**

اما حياة فتقول ان السعادة مثل فراشة ان طاردتها هربت منك..استنى شوي و كون صبور

مسز الرمحي مدونة اخرى كتبت عن شخص اغلق الطريق و اضطر اخر للتزمير بحرقة ليلفت انتباهه مما اسفر عن خروجها من النافذه و توعدها برمي ول جهاز كمبيوتر على راس الي بيزمر

**

كما اوردت صورة لوحش صغير اصبح صديقها الدائم..اكيد بعد ما قرات قصة براء

**

تمارا قرأت موضوع عن شراء ما لان نحتاج اليه و عن قرارها بتطبيق عدم الشراء ابتدا من اليوم الا للضروري الضروري..يعني بدلا من الميني كوبر رح تشتري تويوتا ياريس..مبروك سلفا طمطم

نتوقف الان مع فاصل اعلاني و نعود بعد قليل

***

الشماغ العربي الاصيل.. شماغ الفرحان..تدفأ و لملم شعراتك ان وجدو..و لا تنسى العقال الذي له استخدامات كثيرة في الطوشات

شماغ الفرحان..فخر المواطن..صناعة سويسرية اصلية

*

**

و نعود بكم الى بعض المدونات الرجالية

**

عاد الى ارض الوطن بيمن الله و رعايته المدون المحبوب بكوز بعد غياب دام اكثر من اسبوع و كان في استقباله العديد من الاصدقاء ..الحمد الله على السلامة بكوز

**

م.كيلاني يزودكم بتقنيات صغيرة مهمة و جميلة و قد قام بعمل تصويت لاحسن تجمع تدويني و فاز بأعلى نسبة تصويت حتى الان قويدر بلانت

**

اما فيصل الدجاني فيتكلم عن ضرورة ان نقول لا من وقت الى اخر حتى لا نهدر قوانا في خدمة الاخرين متناسين حاجاتنا

**

اما عادل و هو من مصر..عندو مدونتين و نشر مسابقة حلوة في مدونة و حلها في المدونة تانية

**

اما سلطان فكتب عن الاردن و عن خطاب جلالة الملك امام الكونغرس

**

محجوب عبد الدايم صديق المنشر الدائم كتب شعرا عن اعتصار المواهب و اشياء اخرى..شعر مضحك مبكي به الكثير من المعاني المخباة تحت ستار من السخرية

**

اما المعلقون الدائمون و الذين لا يملكون مدونات لكنهم متواجدين دائما لدعم المدونين

و لهم نتوجه بالشكر الجزيل

بيرفيكتو كيلارو ,نادين , زيكا, اسورة

فلا زالو يجوبون المدونات نتمنى لهم التوفيق

****

أخبار المجتمع التدويني

احتفلت كل من ناتشرل بلو و ايضاَ لبنى بمرور عام لكل منهما على بدأ التدوين

الف مبروك لفطوم و لبنى و عقبال العايزين

و يا رب منه لبورتال قولو ان شاء الله

****

**

الحدث الاكبر الذي تصدر العناوين للاسبوع الماضي كان اعلان انطلاق الموسم الثاني للمسلسل في حلة جديدة و هذا المسلسل بدانا بكتابته في ديسمبر الماضي ,المسلسل لاقى التشجيع و الدعم من المدونين و قدانتقل من المدونة التي انشأتها شركة دوّن لدعم المسلسل _و لهم نتوجه بالشكر _الى موقعة الجديد في بلوجسبوت.. وقد تناهت الى مسامعنا اخبار تفيد ان المسلسل سيقوم بطرح مفاجاة جديدة في القريب العاجل فانتظرونا

*

****

و كانت هذه اخبار المنشر النصف شهرية نعود و نلتقي بكم من جديد مع العديد من المدونات و الاخبار

و كانت معكم ملائط_ المنشر_عمان

لولولولييييييييش

و اويها و يا مسلسل ما احلاك

اويها النا شهرين منستناك

اويها و اخيرا صار لك اسم

بين المسلسلات زاد حلاك

لولولولليش

**

***

كلمة و بدها تنقال

المسلسل صار له اسم و عنوان جديد

حياتي..دوت كم تاني شارع عالشمال

و الموسم الجاي رح يكون حديد

و كتاب جداد و مفاجات مش قلال

بس وجودكم ضروري بالتحديد

***

***

المواصلات مؤمنة من و الى الموقع الجديد

الملكة

الملكة

***

فيلم عن الملكة اليزابيث الثانية

**

بطولة هيلين ميرين(الملكة

و مايكل شين(توني بلير

و في كمان ام الملكة و تشارلز و برنس فيليب و شيري مرته لتوني

الفيلم من احسن افلام 2006

عجبني كتير لانه خلانا نشوف شو عم بيصير جوة باكنجهام

الفيلم بيركز على فترة وفاة الاميرة ديانا و تاثير موتها على العائلة المالكة

و رد فعلهم

انا انصدمت

لا جد

يعني اول مرة بشوف فيلم عن ملوك احياء و بهالصراحة

ابصر اليزابيث لما شافتة شو قالت

لانه الفيلم صور اليزابيت كانسانة

ولا بلاش انسانة

لانه بالفلم كانت شوي بعيدة عن الانسانية

كشخص متبلد المشاعر

بس هية هيك تربّت و هيك تعودت

انه تخبي مشاعرها

و هيلين ميرين بدعّت صراحة بتعابيرها الرصينة

بتستاهل الاوسكار و كل الجوائز

و كيف بتحرك عيونها و تمها و بدها تبكي بس بتحبس الدمعة

اللي اعطى الفيلم مصداقية هو الجهد اللي قام فية الكاتب والمخرج لتفاصيل الحياة والتقاليد

بتحسو انكم عنجد جوة القصر، حتى روتين الحياة العادية

يعني الملكة لما بفيقوها من النوم بتطلع من اوضتها حاملة قربة مي سخنة

حسيتها ستي والله

بعدين كيف امها بتحكي معها

امها مش قليلة على فكرة _بس ما بدي احكي عنها حرام لانه ماتت

..كان عمرها لما ماتت 101كانت مفكرة تنزل 102 بس ما جابت معدل

امها بتقولها: و احنا شو خصنا ب ديانا هاي وحدة تطلقت

و طلعت من العيلة خدي الولاد على بالمورال خليهم يشمو هوا و يبعدو من هون

و اليزابيث..بتسمع كلام الماما

شايفين يا بنات و يا شباب

ملكة بتسمع كلام امها

و كمان بتناديها بالفيلم :مامي

مبين من الفيلم انه علاقة الملكة ب ديانا و باقي العيلة مش هالقد

يعني

كنو كاين في زعل بيناتهم

حتى لما اجا خبر موتها كان تعليق مارغريت(اخت اليزابيث بس ما بينت بالفلم)

انه ديانا كانت مزعجة بموتها اكتر من حياتها

اما الامير فيليب جوز اليزابيث

هدا حكاية لحاله

هيك جفص و نكدي و لأ..كمان.. بيلبس تنورة سكوتلندية خضرا ..

و بقول لمرته و هية بتقلب قنوات عشان تشوف شو بحكو بالاخبار

بكفي تقلبي قلبتي راسنا انا رايح انام بالاوضة التانية

كان يمكن بدو يحضر باي واتش..الله اعلم

اما تشارلز ابو خد احمر

برضة بالفيلم خدة احمر

و هيك بتحسة لا بكش و لا بنش

دمع شوي لما راح زار ديانا و هية مرمية بالمستشفى

و طبعا صارت حكاية كيف بدو يروح هناك

و الطيارة مع مين اليوم

بالاخر دبرتها سته ام امة

الشعب زعل كتير لوفاة ديانا و زعلو اكتر لانه القصر ما اعلن الحداد

و لا نكس العلم فوق القصر

ما كانو يعرفو انه مش من عادة الويندسورز ينكسو فوق باكنجهام علم حتى لو ماتت اليزابيث نفسها

بس الشعب الانجليزي طلع اتنح مننا

و زعلو لانها ما طلعت قالت لها كلمتين تعزي الشعب

طبعا هون اجا دور مييين؟

ايوة

توني بلير

و هو البطل في هالفيلم

الفيلم بدأ بنجاحة بالانتخابات و كيف بروح هوة و مرته ليقابلو الملكة

و كيف مرته اخدت تعليمات البروتوكول بس هية بتتمسخر و ما بتعرف تنحني بطريقة لائقة

طبعا منشوف اليزابيث بتنمّ عليها مع رئيس التشريفات

و هديك كمان ما قصرت بعدين فيهم و قالت لجوزها: انت عم تخلط بين امك و بين الملكة

لما شافت كيف قتل حاله عشان ينقذ العيلة و صار يقول

يا عمي حدا ينقذ هالناس من نفسهم

ما دبت خناقة و ما قالها ما تجيبي سيرة امي لانه مش فاضيلها

هلا توني صار يوّن على راس اليزابيث انه لازم تحكيلك كلمة

يعني بصيرش تضلي قاعدة في بالمورال بسكوتلندا

والعزى داير بانجلترا و القصر صار مزرعة ورد من الناس

المهم بتقتنع و بتطلع و بتحكي عالتلفزيون و بتمشي بين الناس

و بتتفرج عالورد و بتقرا كلام كاتبينو الناس بتقول لبلير

ما عمري حسيت اني مكروهة متل هلأ

الفيلم في اكم حدث اصلي مش تمثيلي

و اكم مقابلة سريعة لديانا بتقول: من اول يوم تجوزت كننا تلاته مش تنين

(قصدها كاميلا حبيبة تشارلز اللي تجوزها هلا

طبعا اليزابيث ما بتطيق هاي كمان

بلير انقذ العائلة المالكة من مصيبة

بس اليزابيث قالت له: ما تفكر ما راح يجي يوم و يعملو فيك متل ما عملو فيي

و هالحكي صار

المهم ما بدي احكي اكتر

ع اساس ما حكيت كتير

الفيلم عن جد حلو و بيستاهل ينحضر

حارس العمارة.....اردني؟

وزير العمل بيقول في خبر بالجرايد نزل قبل فترة انه" سكر على 15 مهنة امام العمالة الوافدة

ليترك مجال للشباب الاردني الواعد ليشتغلوا

و من هالوظائف وظيفة حارس عمارة

و بس سمعو الشباب الخبر بدات الطلبات

حارس العمارة الاردني بدو مسكن لائق

ممكن تعرف كلمة لائق حسب القاموس الاردني؟

سكن الحارس بيكون بالطابق اللي تحت الارضي او عالسطح

بس الحارس الاردني يمكن عندو فكرة تانية عن السكن اللائق

انه تكون العمارة بام السماق و هوة يسكن بعبدون

و بدو كمان ظمان اجتماعي
بالظاد

اي السكان ياللا يدفعوا اجار الحارس الوافد بدهم يعطوه ضمان اجتماعي؟

الحارس الاردني ممكن كمان يطالب بمكتب لانه الشاب الاردني بحب يشتغل على مكتب

و ممكن يطالب بأجازات مرضية ( و ما اكثرها) و اجازات ايام العطل الرسمية

اللي مهما نقصت بتكون كتيرة

و اللي العامل الوافد بيشتغلها و هوة ساكت

ممكن تتخيلو حارس العمارة الاردني عالساعة سبعة الصبح بالبرد صاحي و مصحصح و بيغسل سيارة؟

اي بيقوم لاوي سحنته و ضارب بوز اردني اصلي

و بيقولك ول على شو مستعجل وراك الديوان بدي افطر بدي اوكل

و ادخن لي سيكارة و اشرب لي كاسة شاي

ليكون مفكرني بشتغل عند اللي خلفوك

او حتى بيشطف درج

او بيجيب اغراض لام الوليد من السوبر
(السوبرماركت اسمه سوبر عند الحراس

sooobar

ولا ياخد الزبالة عالحاوية


و بعدين كأي موظف اردني لازم الجريدة و لازم يحل الكلمات المتقاطعة

و يمكن ياخد مغادرة و يطلع و ما تعرف وينه

او يمكن يوم يتصل و يقول مريظ مش جاي عالشغل

او ابوي طلق امي.. او مات جدي

و يمكن تلاقيه مروح عالواحدة و نص ع اساس الدوام للتنتين

في حدا فكر انه رح يشتغل مثلا طول النهار او بالليل؟

بس في اشي واحد ممكن يعمله احسن من الوافد

دفع الفواتير
بيروح عالاتصالات يدفع مثلا

و مرحبا يا قرابه و شلونك يا ابن العم بالله شوفلنا هالفواتير
يسعدك
انداري !! هاظي ام الوليد طول نهارها تطق حنك
شوف بالله شوف اكم مكالمة..ترى هاظي اختها اللي بتحكي معها..ام ربحي

يا زلمة ظابعتو لابو الوليد اليوم اللي بيخش بايده فاظية بتشل امله
شو بدنا بطول السالفة
خليني ادفع و اروح عالدار اشوف امي شو طابخة

نشرة اخبار المنشر الاسبوعية

ملائط برس \وكالات

قام فريق المنشر و المكون من شخص واحد بالتجوال بين المدونات

لالتقاط اهم الاخبار بعد ان اعلنت الصحف عن اختفاء المدونين

و اليكم الانباء بالتفصيل

لوحظ في الاونة الاخيرة اختفاء عدد من المدونين بظروف غامضة

و ابتدأ الامر بنريات التي اعلنت و دون سايق انذار انها اغلقت المدونة

و تلتها مدوّنة اخرى لن نذكر اسمها الان لانه كما يبدوا قد عدلت عن فكرتها

اما عن الذكور من المدونين

فقد اعلن موي عن رغبته بالتوقف عن التدوين لانشغاله الشديد بعدة امور

و قام ايضا بكوز بوضع اعلان ب رب اي ساعود كمان شوي

و مما يدعوا للشك و الريبة ان لم توجد مؤشرات لهذه الاعمال

**

و قام مراسلنا بعمل فنجانين قهوة حلوة اشي بجنن

**

اما مراسلتنا النشيطة فقد قامت بجولة سريعة للمدونات

*

عاد الى ارض الوطن المدون فادي بعد غياب طويل

و اعلن ان زفافه سيكون في 4تموز مبروك

**

من ناحية اخرى اعلن جاد انهم بحاجة الى مبرمجين للعمل في شركتهم لحقوا حالكم

اما عبد حمدان فقد اعلن انه لا يستطيع الابتسام امام الكاميرات مما يقلل من فرصته للعمل في كادرنا في المستقبل و يفتح له مجال العمل بالتلفزيون الاردني كمذيع اخباري او في قناة الجزيرة كبديل لعازر

*

احتدام التصويت بين انجلينا جولي و جوليا روبرتس اسفر عن فوز الاخيرة في مناظرة قامت بها ناتشرل بلو و بكوز

**

اما حلا فلم تفقد الامل ان لصوتنا قيمة في تغيير بعض التوجهات السياسية و الاجتماعية و قامت بحملة للتصويت شاملة انضم اليها العديد من المدونين

*

ابو شاكوش تعهد لكل من يقوم بالتعليق على موقعة و ان ربح اللوتري ان يرسل له عشرة الاف دولار

برضه لحقوا حالكم

*

اما خالدة فقد استعانت بفيديو لابو محجوب لتعزيز فكرة"نحنا شعب فاظي اشغال" و كتيرين حكي عالفاظي كمان

*

و في جولة سريعة الى مدونة قويدر لقيناه يا ولداه خرمان على سيجارة بعد ان توقف عن التدخين لمدة عشرة ايام

نقول لاخينا قويدر سر و نحن من ورائكم و يا جبل ما تهزك سيجارة و ان غدا لناظره قريب

*

اما السمورة الامورة بنت بطوطة فقد عادت من رحلة سريعة الى القاهرة لحضور زفاف احدى القريبات مبروك عقبال العايزين

**

اما عمر و نص فقد اعلن هن رغبته الشديدة بالسفر الى طوكيو و اتبعها بعدة لينكات كالعادة

*

سند لا يجد الوقت الكافي للتدوين ندعو له بالتوفيق في امتحاناته

*

اما منوش فتناقش فقرة من كتاب محارب النور لكويللو مع ابدا الرأي الخاص بها

*

موفق كتب عن جدول اعماله اليومية الحافلة و تضمن الموضوع ايضا بعض الاطعمة التي ساعدته في تجاوز هذه الاعمال

**

د.حريقة و من مكانه الحالي بالولايات الامريكية ملّ من ان الانباء التي تكررت في الاونة الاخيرة ان دلت على شيء فهي تدل على غباء الامريكين و جهلهم بما يحدث في العالم و تركيزهم على امورهم الداخلية التافهة

يا ريت هالكلام صحيح يا دكتور حريقة

**

فيصل قام بالتعريف بأول فيلم اردني ثلاثي الابعاد الفيلم جميل من الناحية الفنية و كئيب من الناحية النفسية

*

حياة..في مواجهة مع النفس..من يهم اكثر؟

**

هام

خبر يجوب الاوساط البلوجسفيرية الاردنية و قامت بالتعليق عليه مسز رمحي و جانو , ناتشرل بلو و جزرة, الا و هو قيام شركات الهواتف النقالة في الاردن ,فاست لنك,موبايلكم,امنية و اكسبرس بحسم مبلغ دينار واحد من كل مشترك كتبرع و دعم للجامعات بامر من وزارة المالية(هيك بقولو)

..هذا و الجدير بالذكر ان هذا الحسم خاوة يعني بتعرف عنه بعد ما تتبرع

جعلكم الله من المحسنين دائما

**

عاد الاغريغيتر جوردان بلوغز للعمل من جديد بحلة جديدة و على سيرفر جديد هذا و الجدير بالذكر ان جوردان بلوغز قد اتخد موضعه و حل مكان جوردان بلانت بعد انسحاب الاخير و قام جوردان بلوغز بتقديم الخدمات للمدونين بفريق عمل ممتاز

**

نتمنى للجميع عودة مبمونة