في مركز العناية الحثيثة

وصلت لمرحلة ماساوية اضطرتني للتوجه الى مركز العناية الحثيثة

بالاظافر

رحت و انا خجلانة

اي والله خجلانة

و حياة الاخوة خجلانة

خجلانة من نفسي انه الدنيا حرب و الناس بتعاني و انا رايحة الوّن اظافري

بس ما كان في امامي خيار اخر

دخلت

و بعد المواااااة مواااااة و كيفك

قعدت استنى دوري بالمركز اياه مع اني ماخدة موعد

(مش رح اقول اسمة بعملش دعايات ببلاش

فا يا جماعة الخير و الكلام للجميع ولا تهونو و بلا طول سيرة

كانت جنبي وحدة بتحكي تلفون و من لهجتها عرفت انها لبنانية

طبعا كان لازم اتحركش و احكي معها و سألتها اذا هية جاية من لبنان قالت لي انها عايشة بعمان

حكينا شوي

اجت وحدة تانية برضة لبنانية و بلشنا طء حنك

سألتها اذا هية كمان عايشة هون قالت لي لا هية عايشة برة و مش قادرة تفوت علبنان

سالتها كيف مدبرين حالهم (ع اساس اذا بدها اساعدها بأشي..نخونجية انا

قالت لي انها نازلة بالفور سيزنز

هية و كل العيلة

ابتسمت ابتسامة هبلاء(غير عن الصفراء

اكيد هية مش بحاجة لمساعدتي القيمة

اجا دوري و رحت على كرسي العناية و تركتها

و بعد ما خلصت

طلعت من المركز

برضة و انا خجلانه

خجلانة كتير

بس لسبب غير السبب الاول

خجلانة من منظري

و انا مروحة ب سليبر البيديكرو هو عبارةعن زنوبة افرنجي ديسبوزبل بلبسوة حتى ما يخرب اللون عالاظافر

<<<<<<<<<<<<<انظر الصورة

و بنطلوني ملفوف لفوق

كان منظري شماتة

قصة جانبية

المضحك بالموضوع انه الكل جاي لنفس السبب بس ما بمنع انه الكل و بدون استثناء كان يحكي بالسياسة

حتى الصبية الفلبينية بتقولي:هدا اللي اخده اسرائيل هوة اكم وهدة؟؟(قصدها عدد الاسرى اللبنانين)

ما علينا

انا بحكيش بالسياسة لانه السياسة مش ناقصة

المهم اتممت المهمة بنجاح و اختفت من عندي عقدة الذنب