كله في الهوا
عالمنا صار هوا..جيجا و ميجا تيرا و الله اعلم شو بعد
صرت اخاف امشي بالشارع ليخبطني ايميل
او تدعسني اس ام اس
او يفعصني فيديو بلوتوث
حياتنا عم تتغير و نحنا ماشيين معها و بدون ما ننتبه
بطلنا نشتري كروت معايدة
انا جديد انتبهت انه اللي موجود عندي عالايميل بعّيد عليه
و اللي مش موجود عالايميل
مشكلته عويصة معي
بنسى انه موجود
و هاي مشكلته مش مشكلتي
اذا حدا نقلّني رقم تلفون بطجه عالموبايل
او على الكومبيوتر
طباعة
نسيت كيف امسك قلم
و انا متاكدة انه خطي صار عفشيكة
يا حرام عل تعب الايام و نحنا نتعلم نكتب
كنا نطبع الصور و يكون عنا البومات
و الله يخلي فليكر و اخواتها صار كله عالانترنت
بطلنا نبعت صور بالرسائل
صورة طرّوقة لما ولد و هو نايم على بطنه مشلّح
هلأ بخاف اصلا الواحد يصور طفل مشلّح بقولو عنه بيدوفيل
صارت الجدات الحديثات اذا بدهم يورجوا صور الاحفاد
تفتح الموبايل
و شوفي ما ازكاها و اورجيكي اخر اشي قالته و تفتح فيديو
راحت صور الاحفاد من جزادين التيتات
صور العيلة اللي كانت تعبي الحيط استبدلت باطار ديجيتال
بوسع كل الصور
البوسات صارت موا موا و العبطات هاغ هاغ
و اذا حدا مات
يفتح جروب عالفيسبوك لتقبل العزاء
و موضوع على المنتدى لعزاء اخونا فلان بوفاة جده
و اخر صرعة نازلة و لسة ما كملت
مقابر عالانترنت
و صورة الميت و رثاء و المعزين بيقدروا يجوا و يعزوا بالفيديو
***
الزواج صار عالماسنجر
و العروس بتشوف العريس عالكام
و المعازيم بستنوا بتشات رووم للتهنئة
و يمكن للرقص
\
\
/
(هيك الرقص الافتراضي ان لم تتوفر لك الايقونة المناسبة)
تعلمّوا
اما
الفساتين و العفش و التسوق و انت قاعد محلك
و بتدفع و انت محلك
شعرك قبل ما تقصية بتجربي الموديل برضه عالانترنت
الفيلم بتحضروا و لويش السينما ما هيو ببلاش نازل
الاولاد بطلوا يلعبوا طابة بالشارع
الا ما ندر
و لعيبة الشدة بلعبوا تريكس عالانترنت
فنجان القهوة بوصلك من صديق على سكايب
و كباية عصير تروّق عليها بتوصلك على الماسنجر
و ارجيلة مولعة بتوصلك بموضوع على منتدى
الاعداء كمان عالانترنت مع الطوشات و الخناقات
و بدال ما يقوله اطلع بره لاورجيك
بنزل فيه مسبات ما هوة ما حداعارف مين مين
و الحمد الله الخناقات يتم السيطرة عليها بتدخل المراقبين
ولا بتصير الردود للركب
ممكن تربي حيوان اليف
و تطعميه و ممكن تاخد ولادك برحلة على الملاهي
كله و انت قاعد بمحلك
شايفين الراحة!
و بعدين بيجي واحد عمره 15 بقولك مش عارف ليش وزني زايد
و كتافي بوجعوني
و رقبتي مصنجة
واذا قلت له اطلع مع صحابك
بقولك صحابي معي دايما الي صحاب بهنجاريا واليونان و نيوزيلاند
اذن المشكلة الكبرى
ليس
ان كان عندك اصدقاء او لا
ان كنت محبوبا او اجتماعيا
ان كان لديك عائلة او زوجة او ابناء
المشكلة الكبرى
الكارثة العظمى
اذا فصلت الانترنت او كان اتصالك بطيء
انا اعترف
انا منهم
و انا كلهم
7 comments:
طيب شو الحل يا ملاقط؟
ما هو هيك صارت الحياة و لو سألتي أيا واحد شو الأشياء اللي ما بتقدر تعيش بدونها بقلك المسنجر و الفيسبوك و التويتر
يعني شوفي النقله كيف:
حتى بطل حدا يحكي ما بقدر يعيش بدون انترنيت لأنه وجودها مفروغ منه .. قبل 3 سنوات كانت الانترنيت ما حدا بقدر يعيش بدونها .. بس الكمبيوتر كان اشي مفروغ منه والموبايل .. يعني وجوده غير مدعاه للتساؤل .. و قبل 5 سنين كان اي حدا بحكيلك الكمبيوتر والموبايل ما بقدر أعيش بدونة
على اساس انه الكهربا بتيجي هيك مع الهوا .. وقبل 25 سنة
أيا حدا بتسأليه بحكيلك الكهربا
تخيلي لو اليوم حدا يحكي ما بقدر أعيش بدون كهربا!! بصير مضحكه
انا ما اعترضتش
انا منهم
بتصيبني جلطة اذا ما في انترنت
انا بس بوضح حياتنا كيف صارت
مرات بحن لايام ما قبل الموبايل و الانترنت
بس لا غنى عنهم
الكتب عالانترنت
المجلات عالانترنت
الجرايد عالانترنت
كله افتراضي
مش غلط لو فكرنا اديش منوفر ورق
و منحمي الطبيعة
يعني نحنا اللي عايشنا العصرين بتلاقينا بين جذب و شد و مد
انا كل شي بدي اياه بلاقية عالانترنت
بس بتعرف
بتمنى يوم افك و اهرب لقرية
و انام
مزبوط كلامك كتير بس أنا ما حبيت الvirtual cemetery!
يعني في أشياء بتكون
Untouchable!
أنا يمكن أموت من غير ال
WiFi
أنا و إنت و كلنا في الهوى سوى
Girl u are so creative
..wallah internet 3ndo tather b nesbe 80% 3leena ! bjoz aktar
Summer
yesterday i read in the newspaper that a russian guy will start his own online graveyard,aslan many funeral homes have a website now where u can pay ur respects to the deceased..3anjadd summer think about it..everything is becoming virtual..
where is the real thing!!
mais
you know what is so good about this virtual life,if one day u felt u don't want it anymore..pull the plug.and you wont die
thats the beauty of it
ضحكتيني يا ملاقط
بدك تهربي لقرية؟ .. مهو القرية فيها انترنيت و وايرليس و دارنا هوت سبوت
:)
حتى انت يا بروتوس
وين اروح
وين القّي
Post a Comment