الخنازير سابقا H1N1 تجربتي مع انفلونزا
الانفلونزا صار اسمها اتش وان ان وان
H1N1
لانه صارت تنتقل من انسان لانسان
و الخنازير نفضوا ايدهم من الموضوع
***
قررت اكتب الموضوع لسبب واحد: فائدة لكم
فرق لما تقرأ عن الموضوع و لما حدا كان بنص الميمعة يقولك عنه
بدات الحكاية بشهر اكتوبر لما اصيب احد افراد عائلتي بحرارة عالية جدا
و تعب و سعال
و نحنا زي اللي ما بدنا نفكر حتى بموضوع الانفلونزا السائدة
عملنا حالنا انه انفلونزا عادية
و عالجنا الاعراض
يعني تخفيض حرارة و سوائل و كمادات
بس الامر زاد شوي عن حده فقلنا يالله منعمل هالفحص
مع انه كنا متأكدين انه رح يطلع سلبي
لانه حسب ما منسمع انفلونزا الاتش وان ان وان عم تقتل الناس
و مش هيك
المفاجأة كانت انه الفحص طلع ايجابي
و في نفس اليوم بديت انا اشعر بالم في الحنجرة
هلا لو ما في انفلونزا القرود هاي ما بتفرق
يعني كل شتوية الا الواحد ينصاب بشوية انفلونزا
بس لانه عنا حالة بالبيت قررنا وبالاجماع انه الكل ياخد تاميفلو
بدون فحص
فحص المرض بمستشفى خاص بيكلف 60 دينار
ثمن التاميفلو 36 دينار و تلاتين قرش
و اشترينا التاميفلو للكل
لانه كما قرات و حسب الاجراء المتبع
فأن العيلة اللي فيها مريض واحد بالانفلونزا
وكوقاية بياخد كل شخص علبة تاميفلو حبة كل يوم لمدة عشر ايام
اماالمريض بياخد حبتين باليوم
و الاطفال المفروض في الهم شراب بس غير متوفر من شركة روش
هلا الصيدليات بحلّوا الكبسولات بشراب حلو و بيزبطوا العيار و بيعطوا الطفل
مع انه
انا سمعت من صيدلي انه شركة ادوية الحكمة انتجت الدواء و الشراب للاطفال
بس ما نزل على السوق
ليش بالله؟
التاميفلو
بعطيك شعور اسوا من المرض نفسه
ممكن يعمل الم في المعدة فيستحسن انه المريض ياخد الدوا مع حليب او اكل
من الاعراض الجانبية كمان غثيان صداع و في بعض الحلات طفح
طبعا في حالات غير مستحب ياخدوا الدوا
بس انا مش دكتورة و ما رح احكي باشي ما بفهمة
الحقائق و الوقائع
واقعة
انا كنت متأكدة انه الانفلونزا رح تدخل بيتنا عن طريق المدرسة
و هيك صار
المدارس مليانة و وزارة التربية ما بدها تسكر صفوف ولا مدارس
ووزارة الصحة بطلت تسال مين مرض و مين شفي
و بطلت تقدم فحص ولا علاج
بقولولك" اهدار للوقت و المال و الجهد"
والله نحنا اسفين كتير انه مرضنا و اهدرنا وقتكم و جهدكم و مالكم
وزارة التربية حسبما قال طبيب المدرسة عاملة خط ساخن عشان الحالات في المدارس
بس الخط طلع لا ساخن ولا حتى دافي
لا حدا بيرد عليه ولا حدا بسأل فيه
حقيقة
الانفلونزا متل اي انفلونزا عادية بس اعراضها اقوى شوي
يعني الحرارة ببتجاوز ال 39
والتعب اقوى
الخوف مش على الانسان العادي ابوصحة منيحة
الخوف على الانسان المريض اصلا او على الحوامل
و الخوف من تطور الحالة الى التهاب رئوي
و هادا سبب الوفيات الثمانية لهلا
طبعا من وقت ما بدأ المرض عنا و انا نزلت على الانترنت بحث و تمحيص
و رح اقولكم اهم الاشياء عشان تستفيدوا
اول اشي واهم اشي
الوقاية
واقعة حصلت معي
بعد ما شفيت باسبوع طلعت على سيتي مول لامر ضروري جدا
و كنت خايفة انه لسة ممكن اعدي حدا
فكل الوقت كنت مغطية منطقة الانف و الفم
بس لاحظت انه الناس ولا كأنه في مرض بالبلد
شفت وحدة عطست ماسكة ورقة كلينكس زغيرة جدا
يعني قد الورقة اللي بتكون باخر رول التواليت مرات لما تفوتوا على الحمام بالليل
هاي الورقة الزغيرة حطتها على تمها و نظفت مناخيرها
و انا شفت من بعيد اشياء بتلمع طلعت و بعد ما خلصت تركتها بايدها
(يمكن تستعملها مرة تانية)
و مسكت عرباية كارفور و دفشتها و مشيت
مش غلط يكون معنا حاليا قنينة هايجين
(معقم الايدي)
و مش غلط انه قبل ما نمسك عرباية سوبرماركت ننظفها بالمعقم
على فكرة كوزمو بيقدم المعقم بكل انحاء السوبرماركت
ونحاول نقلل من التواجد باماكن مضغوطة متل المولات و السينمات
و ان اقتضى الامر نغطي مناخيرنا و تمنا
هلا الدنيا شتا يعني لو لفحة على الوجه ما ببين غريب
التعقيم
تغسيل الايدي بصابون معقم مش صابون عادي متل ديتول و لايف بوي
في بالسوبرماركت ورق معقم للايدي و الاسطح من كلوركس بتلات روائح
ممكن تنضف فيه اسطح الاماكن و ايدين الابواب و كل شي بنمسك بالايد
و في بخاخ لقتل الجراثيم اسمه لايسول
ممتاز هادا لانه مش معطر جو بالعكس هدا بيطهر الجو و بينعش رائحة الغرف
وكمان في عدة معقمات للاسطح بروائح مش قوية
اقولكم اشي
الواحد لما يمرض بيصيرو مناخيره حساسين كتير
حتى العطر العادي بيضايقه و بيزعجه
كل واحد تكون اله منشفة وجه خاصة به
و المريض تغير مناشفة بشكل مستمر
هلا مش ضروري تنغسل لحالها
تغيير وجه المخدات و الشراشف للمريض و تهوية الغرفة
استعمال الكمامات الواقية عند العناية بالمريض
عادات لازم نغيرها
عن جد نحنا ما نتعلم ولا منتربى
التبويس بداعي و بدون داعي لازم في هالمرحلة يتوقف
في الاعياد العزى الفرح لما نشوف اصحاب
و اهم اشي ما تبوسو الاطفال و الحوامل و مرضى السرطان و القلب
اقولكم
بلاش بوس هلايام
موضة ذوقني و بذوقك
شو ساندويشتك؟ ياي اذوق؟ بذوقك
لازم نعلم الاولاد بالذات انه ما يشربوا ورا حدا ولا ياكلوا من اكل حدا
و نستعمل ادواتنا لحالنا
العطس
ما معك كلينكس تعطس او فاجأتك العطسة؟
اثني كوعك و اعطس فيه
هاي الطريقة المتبعة في المستشفيات حاليا لانه الجراثيم ما بتعيش على القماش
لمدة طويل
شاهد الفيديو للمزيد من التوضيح
اللقاح
سمعنا عنه بلاوي لدرجة انه الواحد صار يقول امرض ولا باخد اللقاح
اشاعات على اكم فيديو منهم واحد لوزيرة الصحة الفنلندية السابقة تحذر من المرض
وفي سياسيين بقولولك انا رح اخد اللقاح على التلفزيون
طيب نحنا شو عرفنا انت اي لقاح عم تاخد يمكن فيتامين او يمكن في لقاح نخب اول للسياسيين
كيف بدنا نثق نحنا؟
دور وزارة الصحة و نقابة الاطباء
اطباؤنا من الاحسن في الوطن العربي ما في شك
بس المرض جديد
و الطب بتقدم كل ثانية
و وزارة الصحة و نقابة الاطباء حسب معلوماتي
لحد هلا ما جمعوا الاطباء
و عملولهم محاضرة و لو بسيطة عن المرض و عن الدواء و عن اللقاح
انا برأيي ضروري جدا
استشرت دكتور حريقة و اكد لي الاشياء اللي بعرفها
واضاف لمعلوماتي
و بتمنى لو هوة يكتب عن الموضوع و يصحح اي خطا انا كتبته
اذا تزكرت اشي تاني برجع بكتبه
سلامتكم
افضل موقع وجدته عن الموضوع
16 comments:
اولا الحمد لله على سلامتك وسلامه الاهل
شكرا كتير عالمعلومات اللي جد مفيده خصوصا ان ما حد راضي يطلع و يحكي بشكل صحيح عن المرض و اعراضه
يعني بعطونا كل الاعراض اللي ممكن تصير لمرض و انها بتكون كتير قويه
شكرا ملاقط :)
انا ما بفتح على تلفزيون الاردن و ما بعرف اذا عملوااي برامج توعية
بتمنى ما اكون بظلمهم
بس لازم يعملوا برامج للناس و يعلنوا عنها
شكرا ويسبر و الله يسلمك
Salamtek inti wil 3aileh kaman...biroo7 el sharr 3ankum
nice post wallah...minkum nastafeed!!
Thanks summorty alla ysalmmek w inshalla ma 7ada beshoof shar wala marad
i've started reading your blog a long time ago & this is the first time i comment .. el 7amdella a salamtik enti wel ahel o ma tshofo shar, thanks for sharing it.
thanks hb and you are always welcome to comment here
hello :)
maybe its my 1st time visiting ur blog ,..
but all i can say is .. el7amdolella 3al salameh :)
o nshalla btenzaker ma bten3ad !
thanks farah this is sweet of you
you are always welcomed here
اولا حمد الله على السلامة
بالنسبة للمعلومات اللي نشرتيها فهي معلومات غاية في الاهمية و الدقة و خصوصا معلومات الوقاية من المرض ،
بالنسبة لنقابة الاطباء و المجلس الطبي بالفعل كان في عدة نشرات عن المرض و محاضرات يعني في الكثير من النشرات اللي وصلت المستشفيات عن كيفية علاج المرض و التعامل معه (لأ مش بفتي من عندي انا دكتور)
المهم ، بالنسبة للعلاج فاذا كنت حامل او رجل كبير بالسن او اي واحد عندو امراض مزمنة او امراض بالمناعة لازم لازم نوخذ المطعوم ، بس اذا كنت زي حالاتي لساتك شباب و مش فارقة معك تفلوز شوي و صحتك تمام فانك توخذ المطعوم اشي برجع الك الا اذا حبيت تتفشخر قدام اصحابك انك اخذت المطعوم
على كل حال احنا ما بلزمنا غير شويت تثقيف مش اكثر بس المشكلة الناس بحبو يسمعو الاشاعات دون ما يقرءو اي تفاصيل
كا عام و انتو بخير
Salamaaat mala2e6
any way thX for the advices
Dr Mohammed
اولا اهلا بك نورت المنشر و كل عام و انت بخير
تانيا شكرا لمرورك و تعليقك
تالتا
انا بطلت اسمع اية اخبار عن المرض
هل اختفي
اوفي تعتيم
او انا بطلت اسمع؟
و الله يا دكتور محمد المرض مش بالصورة المخيفة اللي بيصوروها
و مش عارفة ليش عالضجة يمكن ليغطوا على اخبار تانية نوع من تحويل الانظار لانه بالزمنات مات ناس كتير من انفلونزات عديدة
ما سمعنا هالقصص
om il mees
منورة از يوجوال
و شكرا الك
كلامك صحيح كل الصحة ، فقط هي تمثيلية من شركات الادوية مش اكثر ، يعني كثير من الامراض موجودة و بتصيب الناس و ما حدا عمرو سمع عنها ، فلما تيجي شركة ادوية و تبلش تعمل فحوصات لهاد المرض البسيط بتلاقي نص الشعب مصاب فيها ،
مثال على شغلة معروفة جدا في المجال الطبي و بين الاطبا ، مثلا بنعرف انو الان سبب قرحة المعدة هي جرثومة في المعدة و علاج هاي عن طريق اعطاء 3 انواع من العلاجات و المضادات الحيوية بس النكتة انو 75 بالمئة من الشعب الاردني عندو هاي الجرثومة ، فتخيلو لو شركة ادوية حبت تذيع هالخبر و تبلش تفحص للجرثومة فكل الناس راح يفيعو و يروحو يفحصو و يتعالجو ، مع انو مش كل واحد عندو الجرثومة بتصير عندو القرحة
الحمد الله عالسلامة ملاقط
مع انها نتأخرة
و بحييكي على شجاعتك بالكلام عن الموضوع
ثبت انه اللي صحته و مناعته كويسة بقاوم الفيروس بشكل أحسن من الانفلونزا العادية
Dr mohammed
بعرفها الجرثومة اسمها الهيلكوبكتر
تعيش و تترعرع في معد الناس
دكتور محمد شفت بروفايلك و استغربت انه الك مدونة تقنية
مش اني توقعت طبية اكيد عنا هون دكتور حريقة من وقت لوقت بكتب اشي طبي
يمكن بتحاولو تبعدوا عن جو الدكترة
شكرا دوك
امجد شكرا كتير
و الله كل الهدف تطمينكم و مساعدتكم لا سمح الله لو حدا اصيب
كيفك انت ماللا انت
لا غريبه و لا شي ، يعني لما جيت اعمل بلوج حكت مهو الواحد قرفان الطب و ساعتو و يجي كمان بالبيت يقعد يكتب عن الطب!! لا و الله ! الفكرة انك تكتب عن اشي انت بتحبو يعني هواية او اشي متل هيك!
:)))))))))))))
Post a Comment