أنا الأردن _ يوم التدوين الاردني

 

الاردن  قرر  بعد  تفكير  يروح  للطبيب  النفسي  الخاص  بالبلاد

 و هوة  طبيب  غير  شكل  تخصص  دول  عربية  فقط

بيشبه  دكتور  فل  لكن  على  صلعة  لميع  اكتر  و  كرش  اكبر

طبعا الصلعة من كتر ما نتف شعره كل ما سمع قصص البلاد العربية

و كرشة نما و ترعرع في خير هذه البلدان

دخل الاردن اجر ورا و اجر قدام

ولا الدكتور بقوله: و اخيرا! اقتنعت انه عندك مشاكل و جيت

الاردن بتردد ووجل: انا انا ما عندي مشاكل انا جاي بس عشان

الدكتور: طب تفضل تمدد ع الصوفا

الاردن رجع تلات خطوات لورا و صاح بطريقة دراماتيكية :لأ لأ

الدكتور: ممم..... عندك مشكلة مع الصوفا؟

الاردن: لأ مشكلتي مع كلمة تمدد او تسطح او او او انسدح  بيصير اضل واقف؟

الدكتور: لا طبعا بتتعب اقعد و رووق

الأردن: انا ما عندي مشاكل انا بخير مبسوط و كل شي تمام

الدكتور : مفهوم مفهوم بس قوللي شو حااسس هلأ

الأردن :حاسس بمصيبة جايالي هه ها هيي .. بتقول اية؟ ايه  يا دوك ما تخليك ظريف معايا

الدكتور ازبهل

الأردن: ما كو مشاكل عيني اشدعوة

الدكتور انصعق

الأردن: بكولك اخرى مرة انا اشلب من كوسيات ابو زهير

الدكتور احس انه امام حالة غريبة

الأردن: لك يؤبرني انا ما اتيبو

الدكتور: انت مين..بتقدر تعرف نفسك؟

الأردن مغنيا: انا .. والمجد .. والتاريخ ... والعلياء .. والظفر

رفاق منذ كان البدء  والانسان والعمر

من سمائي شع نور الحق يهدي البشرية

من ربوعي سار ركب الخير

ركب المدنية ... انا الاردن

الدكتور : جميل جميل..معظم البلاد فقدت  الهوية

الأردن: الا انا يا دوك

الدكتور: طيب انت  شو حاسس هلأ

الأردن: حاسس انني ساندويش

الدكتور فنجر عيونه و فتح تمه و تدلى لغلوغه:كيف؟

الأردن: بحس اني ساندويش و كل واحد بدو  ياكل  مني لقمة

الدكتور: ممم..شعور بالاستغلال

الأردن: لا و الانكى من ذلك يعني الازفت  نازلين فيي عمليات تجميل

 اشي  نفخ (شفت البرجين و الله هيفا  غارت)

 و المول هاها عارف مول بالانجليزي يا دوك يعني حسنة

 بس انا صار عندي كتير حسنات

 ولا الجسور يا دوك..و انا ما بشكي من سناني

الدكتور: مم طبيعي تحس هيك

الأردن:كيف طبيعي..انا  شغل تلميع واجهة انا... انا.. انا فصلت يا دوك

 مش عارف شرقي من غربي جنوبي ولا شمالي

الدكتور: شو مخاوفك؟

الأردن:مخاوفي كل يوم بتتغير و بتزيد و بتتنوع ..

انا يا دوك مديون بنامش الليل..

شحدوا علي ..

خصخصوني..ركز عالحروف الله  يسعدك

الدكتور: اه اها....اكتر اشي بيخوفك

الأردن: اقولك اشي..على بلاطة  الديون مقدور عليها

  عمليات النفخ و الشفط ماشي

 انا بخاف على ولادي يا دوك

 ولادي يا دوك ... مش طايقين بعض...

هو بالله شربة مي و الله  ريقي ناشف

الدكتور: اسف ما في مي..بدون  ذكر اسماء مبارح زارني بلد مش من ضمن قائمتي

 بس  بحاول يدحش حاله معاكم و الله وكيلك سحب المي و خلع

الأردن: عرفته..فيش غيره الله لا يوفقه كل مشاكلي منه

الدكتور: ما بيصير ترمي بمشاكلك و تحملها  لغيرك انت كمان مسؤول

دخلت السكرتيرة اللي مش حسناء و قالت  للدكتور انه الموعد التالي حان و انه المريض بالانتظار

الدكتور: بشوفك الاسبوع الجاي بنفس الموعد..

خرج الاردن من الباب و رأى في قاعة الانتظار  فلسطين جالسة تلملم ثوبها و دموعها ملأت المكان

عاد الى الدكتور و قال له: بشوفك بعد  سنتين..