عمان و البرلمان

طبعا و بدون مقدمات كلنا منعرف اننا داخلين على العرس الوطني الكبير
عرس الانتخابات

و العروس الاردن
و السحيجة المواطنين

وقاعة الاحتفالات الشوارع

و شهر العسل بالمجلس

و متل اي شهر عسل

بيكون اوله عسل
واخرة بصل

ونرجع للانتخابات

مع اني بفضل اشيل النقطة و اعملها انتحابات
في يوم و ليلة امتلئت الشوارع بالصور و الشعارات الوهاجة المعلعة الواعدة الصاعدة
كأنة كل واحد بيستأجرله ناس يشعرلوه (يعني يعملولوه شعارات

ناس بتلاقيها مركزة على فلسطين و حق العودة..اللي النا منحكي فية قريب الستين سنة بس برضة هيو شغال و بينفع

ناس بتركز على الوحدة الوطنية
هدول بدهم الكل..يعني مش موفرين حدا

ناس بتقولك العراق و تحرير ارضه..مش عارفة هالمرشح عينة على مين؟؟

ساكون ممثلا للشعب لا ممثلا على الشعب

عجبتني هاي

كل الاردنيون اردنين...عن جد؟؟
الوطن للجميع..شعار لمرشح تاني

من اجل طفولة امنة

شو نعمل؟

طيب مين قال الطفولة عنا مش امنة؟

لن اساوم على الحقيقة مهما غلا الثمن
فيها معاني مخبية ( يعني في ناس ساومت و قبضت و كان في ثمن
الفساد لايحارب بالفساد

الفساد لا يحارب نقطة وسطر جديد

على العهد باقون

عهد مين و شو و ليش
بس هالمرشح بحبه كل انتخابات بنزل و بنجح..تعودنا عليه
يمكن هدا هو العهد؟ انه يترشح كل مرة؟
الشباب هم فرسان المستقبل لهم كل اهتمامنا

طبعا منلاحظ كيف كل مرشح اله فئة معينة بدو يستقطبها

الحريم مثل الرجال مش اجر كرسي

لا الشعار مش هيك بس انا زهئت و بدي اكتب اكم شعار

الشباب زهور المستقبل..سنبني لكم مزيدا من الحدائق
نعم لبيع العلكة على الاشارات

(لاستقطاب بياعين العلكة

ارجيلة و شدة و فول مش بس برمضان..على طول

(لاستقطاب الفئة المأرجلة لعيبة الشدة
ولا واحد قال مثلا لضريبة مبيعات اقل او لا لضريبة المبيعات
شعارات
هل تم تطبيق اي منها في الماضي؟

كلام حريم

الانتخابات عنا عشائرية عائلية

بتزكر قبل اكم شهر لما صارت الانتخابات البلدية وحدة ست رشحت نفسها اظن بالمفرق

ما جابت ولا صوت
و ربحت

يعني هية ما صوتت لحالها
قال شو: ما بطلع عن رايي زوجي و عشيرتي

وين بتصير هاي؟
انا سمعت نساوين تنتين بالانتخابات اللي قبل هاي

انا انتخب ست؟

انا بنتخب اللي بدو ياه جوزي

او ابوها
او عشيرتها

طبعا ما ننسى غيرة الحريم من بعض
عشان هيك ما بينفعنا الا الكوتا

في انتخابات زمان ايام ما نزل علي ابو الراغب(مع حفظ الالقاب)

وحدة ختيارة لا ببتقرا ولا بتكتب سالوها انتي يا حجة مين بدك تنتخبي

قالت لهم
راغب علامة
لزيزة
ابصر على هالرشة راغب علامة جاب اكم صوت
الصور و الشراشف اللي كتبوا عليها غطت الطرقات و الشوارع
بتقرب عالدوار بدك تشوف الطريق فاضية ولا لا بطلع بوجهك صورة واحد بشنب بقولك
الامن و الامان
بتصدقه
بتقطع ولا انت فايت بشاحنة
الدواوير تغطت صار منظرها متل حبل الغسيل اعلاه
و الصور بتلهي الواحد

بتعمل ديستراكشن

بتغطي مسارب النظر و بتعمي الضو
يمكن اصدق شعار وقع بين الشعارات بالغلط و كان للفحص البكر عن سرطان الثدي

اول يوم شفت الصور حسيت انه الفيس بوك فرط بالشارع
و الشعارات هية ال

status
و حتى عالسادس في صورة ممزوعة عند الوجه قلت هادا حدا عمله

poke
عمان صار الها مدونة
لو صار الها فيس بوك و الفريندز من النواب المرشحين
بتكون تقريبا هيك


اضغط على الصورة و تمعن جيدا ..يعني ما تشلفقوا هاي اخدت شغل 3 ساعات

وهاي صورة صديق رفضت عمان تضيفه لقائمة الاصدقاء

هلا هاي منظر بلد؟ هيك صارت عمان كأنها سطوح

لا وا لاحلى الموضة اجديدة المكعبات اللي بتنزل من فوق راسك تحت الجسور متل زينة اعياد الميلاد

شو الجديد السنة؟؟؟

انه بدهم يجربوا التصويت الالكتروني

يعني عشان هديك المرة كانو الناس يكووا الهوية بمكواية و يضيع الختم و يصوتوا كزا مرة

يعني الانترنت امان؟؟؟

تسجيل بالرقم الوطني و الاسم الرباعي

مش عارفة اذا في ميتين رح يصوتوا السنة بس يمكن صعب اذا ما في كونيكشن هنا

هل يستطيع الهاكرز اقتحام التصويت الالكتروني؟

مهنة جديدة ستنضم لمهن المستفيدين من الانتخابات مع بياعين الكنافة و المناسف

المهم

انا وقت الانتخابات البلدية عملت مقر انتخابي و رشحت..نفسي

و هلا بعيد الترشيح ..يـــــــــــالله

بدي اعبي المدونات شراشف

و اكتب عالحيطان

و الزق صورتي على عمدان الكهربا عشان الولاد الزغار يخافو و ينامو

و اطلعلكم من ورا الشرطي عالدوار

و كل انتخابات و انتو بخير

****
الصور مقدمة من المصورة الموهوبة سمر

شكرا سمر